కొత్త ఆటో పర్మిట్లు ఎవరికోసం?

హైదరాబాద్‌లో పాత ఆటో పర్మిట్ల స్థానంలోనే ఎల్‌పీజీ, సీఎన్‌జీ, ఎలక్ట్రిక్‌ ఆటోలకు పర్మిట్లు ఇవ్వాలని తెలంగాణ రాష్ట్ర ఆటోడ్రైవర్ల ఐక్య కార్యాచరణ సమితి డిమాండ్‌ చేసింది. కొత్త ఆటోలపై 50 శాతం రాయితీతో బ్యాంకు రుణసదుపాయం కల్పించాలని జేఏసీ నేతలు తెలిపారు.

• పాత పర్మిట్ల స్థానంలోనే కొత్తవి ఇవ్వండి
• 50% సబ్సిడీ, బ్యాంకు రుణం కల్పించండి
• ఏటా 12 వేలు ఇస్తామని కాంగ్రెస్‌ మోసం
• ఫైనాన్షియర్లు, డీలర్ల వేధింపులను అరికట్టండి
• రోడ్డున పడుతున్న ఆటో డ్రైవర్లను ఆదుకోండి
• తెలంగాణ స్టేట్‌ ఆటో డ్రైవర్ల జేఏసీ డిమాండ్‌

హైదరాబాద్‌ సిటీబ్యూరో, జూన్‌ 17 (నమస్తే తెలంగాణ) : హైదరాబాద్‌లో పాత ఆటో పర్మిట్ల స్థానంలోనే ఎల్‌పీజీ, సీఎన్‌జీ, ఎలక్ట్రిక్‌ ఆటోలకు పర్మిట్లు ఇవ్వాలని తెలంగాణ రాష్ట్ర ఆటోడ్రైవర్ల ఐక్య కార్యాచరణ సమితి డిమాండ్‌ చేసింది. కొత్త ఆటోలపై 50 శాతం రాయితీతో బ్యాంకు రుణసదుపాయం కల్పించాలని జేఏసీ నేతలు తెలిపారు. తెలంగాణ రాష్ట్ర ఆటోడ్రైవర్ల జేఏసీ నేతలు హైదర్‌గూడలోని ఎన్‌ఎస్‌ఎస్‌లో మంగళవారం విలేకరుల సమావేశం నిర్వహించారు. ఈ సందర్భంగా జేఏసీ నాయకుడు, బీపీటీఎంఎం జాతీయ ప్రధాన కార్యదర్శి అల్లూరి రవిశంకర్‌ మాట్లాడుతూ తెలంగాణలో ఆటోడ్రైవర్లు ఉపాధిలేక ఆత్మహత్య చేసుకుంటున్నారని ఆవేదన వ్యక్తంచేశారు.

ప్రభుత్వం అండగా నిలవాల్సిన అవసరముందని చెప్పారు. కొత్త ఆటోల పర్మిట్‌లు ఎవరి ప్రయోజనాల కోసమని ప్రశ్నించారు. కొత్తగా కొందరు పెద్దలు ఆటోపర్మిట్ల పేరుతో అక్రమ దందాకు తెరలేపారని టీఏడీయూ నాయకుడు కొమురయ్య, టీఏడీయూ నాయకుడు కొమురయ్య ఆరోపించారు. ఆటోడ్రైవర్ల ఆత్మహత్యలను ఆపాల్సిన బాధ్యతను మరిచి.. పర్మిట్ల దందా చేపట్టడమేంటని నిలదీశారు. కార్యక్రమంలో టీఆర్‌ఏకేటీయూ ఈశ్వర్‌, హబీబ్‌, పెంటయ్యగౌడ్‌, కిషన్‌, వజ్రలింగం, అశ్విన్‌రాజ్‌, సాయికుమార్‌ తదితరులు పాల్గొన్నారు.

ఆటోడ్రైవర్ల జేఏసీ డిమాండ్లు

• కాంగ్రెస్‌ హామీ మేరకు ప్రతీ ఆటోడ్రైవర్‌కు ఏడాదికి రూ.12వేలు ఆర్థికసాయం చేయాలి.
• ఉపాధి కోల్పోయి ఆత్మహత్య చేసుకున్న ఆటోడ్రైవర్ల కుటుంబాలను ఆదుకోవాలి.
• ఇవన్నీ ప్రభుత్వ హత్యలే. బాధితుల కుటుంబాల్లో ఒకరికి ప్రభుత్వ ఉద్యోగం ఇవ్వాలి.
• ప్రైవేట్‌ ఫైనాన్సియర్స్‌, డీలర్ల బెదిరింపులు, దోపిడీలు అరికట్టాలి.
• ఆటోడ్రైవర్లకు వెంటనే సంక్షేమ బోర్డు ఏర్పాటు చేయాలి.
• ఆటో డ్రైవర్లకు ఈఎస్‌ఐ, పీఎఫ్‌ సౌకర్యం కల్పించాలి.