అందరిచూపు ప్రభుత్వ బడుల వైపే

రాష్ట్రంలోని ప్రభుత్వ బడుల్లో ప్రవేశాలు ఏటా పెరుగుతుండగా, ప్రైవేట్‌ స్కూళ్లలో క్రమంగా పడిపోతున్నాయి. 2014-15లో ప్రభుత్వ బడుల్లో నమోదు 47.88 శాతం ఉండగా, 2021- 22లో 49.77 శాతం ఉన్నది.

• సర్కారీ బడుల్లో పెరుగుతున్న నమోదు
• ప్రైవేట్‌ స్కూళ్లలో తగ్గుతున్న ప్రవేశాలు
• ఎకనామిక్‌ సర్వే ఆధారంగా ప్రభుత్వం వెల్లడి

హైదరాబాద్‌, ఫిబ్రవరి 6 (నమస్తే తెలంగాణ) : రాష్ట్రంలోని ప్రభుత్వ బడుల్లో ప్రవేశాలు ఏటా పెరుగుతుండగా, ప్రైవేట్‌ స్కూళ్లలో క్రమంగా పడిపోతున్నాయి. 2014-15లో ప్రభుత్వ బడుల్లో నమోదు 47.88 శాతం ఉండగా, 2021- 22లో 49.77 శాతం ఉన్నది. అదే ప్రైవేట్‌ బడుల్లో 2014- 15లో నమోదు 52.12 శాతం ఉండగా, 2021- 22కు వచ్చేసరికి 50.23 శాతానికి పడిపోయింది. ప్రభుత్వ బడుల్లో నమోదు 2020 -21లో 43.47 శాతమే ఉండగా, 2021-22కు వచ్చేసరికి 49.77 శాతానికి పెరిగింది.

సర్వేలో ముఖ్యాంశాలు

• రాష్ట్రంలోని 1-10 తరగతుల్లో 49 శాతం బీసీ విద్యార్థులు, జనరల్‌ క్యాటగిరీ విద్యార్థులు 22 శాతం, 18 శాతం ఎస్సీలు, 11 శాతం ఎస్టీలున్నారు.
• 2015-16 మధ్యకాలంలో స్కూళ్ల సంఖ్య 40,821గా ఉండగా, 2021-22లో 41,369కు పెరిగింది.
• 2021 ఏప్రిల్‌ నుంచి 2022 అక్టోబర్‌ వరకు టాస్క్‌ ద్వారా 7,21,526 మంది విద్యార్థులు, 14,683 మంది విద్యార్థులు శిక్షణ పొందారు.
• 2021-22లో 2,98,983 టీచర్లుండగా, వీరిలో 1,87, 191 మహిళా టీచర్లు, 1,11,792 పురుష టీచర్లున్నారు.

ఇంటర్‌లో జాతీయ సగటును మించి ప్రవేశాలు
గ్రాస్‌ ఎన్‌రోల్‌మెంట్‌ రేషియో (జీఈఆర్‌)లో జాతీయ సగటుతో పోల్చితే ఇంటర్‌ ప్రవేశాలలో తెలంగాణ ముందంజలో ఉన్నది. జాతీయంగా 57.6 శాతమైతే, రాష్ట్రంలో 64.80 శాతం నమోదైంది. బాలుర నమోదు జాతీయంగా 57 శాతం కాగా, రాష్ట్రంలో 63.10 శాతం, బాలికల నమోదు జాతీయంగా 58.2 శాతమైతే, రాష్ట్రంలో 66.70 శాతంగా ఉన్నది.