Journalists | జర్నలిస్టులు లేకుంటే నీకు సీఎం పదవీ ఎక్కడిది..? రేవంత్ వ్యాఖ్య‌లు అహంకార‌పూరితం

Journalists | జర్నలిస్టులపై అవాకులు చెవాకులు మాట్లాడుతున్న ముఖ్యమంత్రి రేవంత్‌ రెడ్డికి ఆ జర్నలిస్టులు లేకుంటే సీఎం పదవీ దక్కేదా అంటూ పలువురు సీనియర్‌ జర్నలిస్టులు ప్ర‌శ్నించారు.

Journalists | ఖైరతాబాద్‌, ఆగస్టు 3 : జర్నలిస్టులపై అవాకులు చెవాకులు మాట్లాడుతున్న ముఖ్యమంత్రి రేవంత్‌ రెడ్డికి ఆ జర్నలిస్టులు లేకుంటే సీఎం పదవీ దక్కేదా అంటూ పలువురు సీనియర్‌ జర్నలిస్టులు ప్ర‌శ్నించారు. సోమాజిగూడ ప్రెస్‌క్లబ్‌లో ఏది జర్నలిజం.. ఎవరూ జర్నలిస్టు అనే అంశంపై అధ్య టీవీ సీఈవో సరిత అధ్యక్షతన జరిగిన సమావేశంలో మాజీ ఎమ్మెల్యే, సీనియర్‌ జర్నలిస్టు క్రాంతి కిరణ్‌ మాట్లాడుతూ.. ఒక ముఖ్యమంత్రి స్థానంలో ఉండి బట్టలూడ‌దీసి కొడుతానంటూ వ్యాఖ్యానించ‌డం, జర్నలిస్టుల చెంప చెల్లుమ‌నిపిస్తాన‌న‌డం ఆయనలో ఎంత ఫ్ర‌స్టేష‌న్ ఉందో అర్థం అవుతుంద‌న్నారు. ఇటీవల జరిగిన ఓ సభలో ఎదురుగా జర్నలిస్టులు ఉన్న సమయంలో తన మీటింగ్‌కు వచ్చే జర్నలిస్టులను ఉద్దేశించి కాళ్ల మీద కాళ్లువేసుకొని కూర్చోనే జర్నలిస్టును చూస్తే చెంప పగులగొట్టాలనిపిస్తుందంటూ వ్యాఖ్యానించారని, ఓ సీఎం ప్రెస్‌మీట్‌కు వెళ్లే జ‌ర్న‌లిస్టుకు ఏ అర్హత ఉండాల‌నేది చెప్పాలన్నారు. సీఎం వార్తలను కవర్‌ చేసే విలేకరులందరూ 15, 20 సంవత్సరాల అనుభవమే ఉన్న వారై ఉంటారని, ఎవరు పడితే వారు రారు కదా అని ప్రశ్నించారు.

ప్రతి ఒక్కరికి ప్రభుత్వం ఇచ్చిన అక్రిడిటేషన్‌ ఉందన్న విషయం సీఎంకు తెలియదా అని ప్రశ్నించారు. అధికారంలో లేనప్పుడు జర్నలిస్టులను ప్రశంసించి, అధికారంలోకి రాగానే జర్నలిస్టులను విమర్శిస్తున్నాడని, ఈ వైఖరికి సమాధానం చెప్పాలన్నారు. రేవంత్‌రెడ్డి కంటే ఎక్కువ సీనియార్టి ఉన్నవారికి అవకాశం దక్కలేదని, ఎందరో ముఖ్యమంత్రి అవుతామని ఎదురు చూసి చూసి చనిపోయారని, కాని ఒక్క మీడియా వల్లే ఆయనకు సీఎం పీఠం దక్కింద‌న్న విష‌యాన్ని మరిచిపోరాదన్నారు. ముఖ్యమంత్రి రేవంత్‌రెడ్డి వ్యాఖ్యలను ఖండిస్తున్నామన్నారు. నాడు కేసీఆర్‌ ఆయన కుటుంబంపై దాడి చేశారని, నాడు దానిని ప్రోత్సహించిన సీఎం, ఆ మీడియాతో తేడా రావడంతో ఇప్పుడు జర్నలిస్టులందరినీ నిందించ‌డం స‌రికాద‌న్నారు.

అక్రిడిటేషన్‌ కావాలంటే డిగ్రీ తప్పనిసరి అని తమ హయాంలో నిబంధనలు పెట్టామని, కాని దానిని ఎందుకు అమలు చేయడం లేదని ప్రశ్నించారు. ఇప్పటివరకు అక్రిడిటేషన్లు ఇచ్చిన దాఖలాలు లేవన్నారు. నేటికీ గత ప్రభుత్వం ఇచ్చిన అక్రిడిటేషన్లే స్టిక్కర్లతో వెళ్లదీస్తున్నారన్నారు. అధికారంలోకి వచ్చిన రెండేండ్లలో సీఎం రేవంత్‌రెడ్డి జర్నలిస్టులకు చేసిందేమి లేదన్నారు. జర్నలిస్టులు తమ సమస్యలపై ప్రశ్నించవద్దనే ఇలాంటి పరోక్ష దాడులకు పాల్పడుతున్నాడన్నారు.

టీన్యూస్‌ సీఈవో శైలేష్‌ రెడ్డి మాట్లాడుతూ.. ముఖ్యమంత్రి రేవంత్‌ రెడ్డి గతంలోనూ జర్నలిస్టులు కింపపరిచే విధంగా మాట్లాడారని, జర్నలిజం వృత్తిపై వ్యంగ్యంగా వ్యాఖ్యానించాడన్నారు. ఇప్పటికే అనేక డిజిటల్‌ మీడియా సంస్థలు వచ్చాయని, మొదట‌ శాటిలైట్‌ చానెల్స్‌ వచ్చినప్పుడు రాజకీయ నాయకులు ఒక పద్దతిగా మాట్లాడేవారని అన్నారు. కొత్తగా వచ్చిన డిజిటల్‌ మీడియాపై ఇష్టానుసారంగా మాట్లాడడం సరికాదన్నారు. గొట్టం పట్టుకొని వేరే వాళ్ల దగ్గర పెట్టు అంటూ వ్యగ్యంగా మాట్లాడాడని గుర్తు చేశారు.

టీయూడబ్ల్యూజే రాష్ట్ర ప్రధాన కార్యదర్శి ఆస్కాని మారూతిసాగర్‌ మాట్లాడుతూ.. ఇది ప్రెస్‌క్లబ్‌ కాదు.. పబ్‌ అని, కల్లుకంపౌండ్‌ అని వ్యాఖ్యానించారని, ఇది జర్నలిస్టుల వృత్తిని కించపర్చే వ్యాఖ్యలు చేసి ఇప్పుడు ఏకంగా ఆ జర్నలిస్టుల వృత్తిపైనే అభండాలు వేస్తున్నాడన్నారు. ఏది నోటికొస్తే అదే మాట్లాడుతున్నాడని, గతంలో ఇలాంటి పరిస్థితి లేదన్నారు. జర్నలిస్టులలో చైతన్యం రావాలని, ఇలాంటి మాటలు మాట్లాడుతున్న వారిపై ఎలా వ్యవహరించాలో కార్యాచరణ తయారు చేసుకోవాలన్నారు. ఒక ముఖ్యమంత్రి స్థాయిలో ఇంత హీనంగా మాట్లాడితే కింద స్థాయి నాయకులు ఏ విధంగా వ్యవహరిస్తారో ఆలోచించుకోవాలన్నారు. ఆరు గ్యారంటీలు, 420 హామీలను పక్కనపెట్టి జర్నలిస్టులను కించపరిచే వ్యాఖ్యలు చేయడం ఎంత వరకు సమంజసమన్నారు. జర్నలిస్టులను విభజించాలన్న కుట్రకు కాంగ్రెస్‌ ప్రభుత్వం తెరలేపుతుందని, తద్వారా లాభపడాలన్న దోరణితో అక్రిడిటేషన్‌ జారీలో జాప్యం చేస్తున్నట్లు కనిపిస్తుందన్నారు. ప్రభుత్వ చర్యలపై టీయూడబ్ల్యూజే పోరాడుతుందన్నారు. సీనియర్‌ జర్నలిస్టులు కొమ్మినేని శ్రీనివాస్‌, మ్యాడం మధు, టెమ్జు ప్రధాన కార్యదర్శి రమణ కుమార్‌, చేతన్‌, రంజిత్‌ రెడ్డి, శంకర్‌, మేకల కృష్ణ యాదవ్‌, యోగి, విజయా రెడ్డి తదితరులు పాల్గొన్నారు.