Indiramma Indlu | ఉపాధి కార్డు.. రెండు గదులలోపు కచ్చా ఇల్లు ఉంటేనే ఇందిరమ్మ ఇండ్లు

ఇందిరమ్మ ఇండ్ల పథకంలో నిరుపేదలకు ఇండ్లు మంజూరు చేస్తామని ఎన్నికల సమయంలో కాంగ్రెస్‌ హామీ ఇచ్చింది. అధికారంలోకి వచ్చిన తర్వాత ప్రజాపాలన కార్యక్రమంలో 82లక్షల దరఖాస్తులు స్వీకరించింది.

• కేంద్రప్రభుత్వ యాప్‌తోనే లబ్ధిదారుల ఎంపిక
• తప్పుడు వివరాలిస్తే ఆధార్‌ కార్డుతో గుర్తింపు
• అత్యంత నిరుపేదలకే ఇండ్ల మంజూరుకు అవకాశం
• రాష్ట్రం నుంచి చేజారిన మంజూరు అధికారం

Indiramma Indlu | హైదరాబాద్‌, డిసెంబర్‌ 6 (నమస్తే తెలంగాణ): ఇందిరమ్మ ఇండ్ల పథకంలో నిరుపేదలకు ఇండ్లు మంజూరు చేస్తామని ఎన్నికల సమయంలో కాంగ్రెస్‌ హామీ ఇచ్చింది. అధికారంలోకి వచ్చిన తర్వాత ప్రజాపాలన కార్యక్రమంలో 82లక్షల దరఖాస్తులు స్వీకరించింది. తొలివిడతగా 4.5లక్షల ఇండ్లు మంజూరు చేస్తామని ఆర్భాటంగా ప్రకటించింది. కానీ ఇప్పుడు ఇండ్లు ఇచ్చే అధికారం రాష్ట్ర ప్రభుత్వం చేతుల్లో లేదు. కేంద్రం రూపొందించిన ప్రత్యేక యాప్‌ ద్వారానే లబ్ధిదారుల ఎంపిక జరగనుంది. ఇందిరమ్మ ఇండ్ల పథకాన్ని రాష్ట్ర ప్రభుత్వం కేంద్రంలోని పీఎంఏవైతో అనుసంధానం చేయడంతో లబ్ధిదారుల ఎంపిక అత్యంత జఠిలంగా మారింది. దరఖాస్తు చేసుకోవడానికి మహాత్మాగాంధీ జాతీయ గ్రామీణ ఉపాధి హామీ పథకం జాబ్‌ కార్డు, ఆధార్‌ కార్డు తప్పనిసరి. ఆధార్‌ కార్డు ద్వారా దరఖాస్తుదారుల వివరాలను కేంద్రం సేకరిస్తుంది. ఎవరైనా తప్పుడు వివరాలు ఇచ్చినా కేంద్రం రూపొందించిన ప్రత్యేక యాప్‌ గుర్తిస్తుంది.

ఇందిరమ్మ ఇండ్లకు అర్హతలు

ఇల్లు లేని నిరుపేదలు, ఒకవేళ ఇల్లు ఉంటే అది రెండు గదులలోపు కచ్చా ఇల్లు అయితే ఇందిరమ్మ ఇంటి దరఖాస్తులు అర్హులు. దరఖాస్తుదారులు తప్పనిసరిగా రోజువారీ కూలీ అయి ఉండాలి. కుటుంబ సభ్యులు, సంపాదించే వ్యక్తులు, స్థిర, చరాస్తుల వివరాలు, రేషన్‌ కార్డు, ఆదాయం, సొంత ఇల్లు ఉందా? ఉంటే అది పక్కా ఇల్లా కాదా? సొంత జాగా ఉందా? ఉంటే ఎంత ఉంది? కరెంటు కనెక్షన్‌, ఇంట్లో ఫ్రిజ్‌, టీవీ, వాహనం? గ్యాస్‌ కనెక్షన్‌ ఉందా? గతంలో ప్రభుత్వం నుంచి ఏమైనా లబ్ధిపొందారా? వాటి వివరాలు వంటి సమాచారం యాప్‌లో నమోదు చేయాల్సి ఉంటుంది. ప్రజాపాలన దరఖాస్తులు, ఇంటింటి సర్వే వివరాల ఆధారంగా గృహనిర్మాణ శాఖ అధికారులు యాప్‌లో నియోజకవర్గాలవారీగా దరఖాస్తు చేస్తారు. వికలాంగులు, ఎస్సీ, ఎస్టీలకు ప్రాధాన్యత ఉంటుంది.

లబ్ధిదారుల ఎంపిక ఎలా?

కేంద్ర ప్రభుత్వం ఈ ఏడాది దేశవ్యాప్తంగా 2కోట్ల ఇండ్లు మంజూరు చేయనున్నట్టు తెలిపింది. రాష్ట్ర ప్రభుత్వం చెప్పిన 4.5లక్షల ఇండ్లను కేంద్రం మంజూరు చేస్తుందా లేదో వేచిచూడాల్సిందే. ఇళ్ల మంజూరులో కేంద్రం రాష్ర్టాన్ని యూనిట్‌గా తీసుకుంటుంది. నియోజకవర్గాలవారీగా యాప్‌లో వివరాలు నమోదు చేయడం వల్ల అన్ని నియోజకవర్గాలకు ప్రాతినిధ్యం దక్కే అవకాశముందని అధికారులు చెప్తున్నారు.

హామీ సరే.. పైసలెట్లా?

రాష్ట్ర ప్రభుత్వం ఒక్కో ఇంటికి రూ.5లక్షల చొప్పున ఇస్తామని హామీ ఇచ్చింది. కానీ కేంద్రం ఒక్కో ఇంటికి ఇచ్చేది రూ.1.20 లక్షలు మాత్రమే. మిగిలిన రూ.3.80 లక్షలు రాష్ట్ర ప్రభుత్వమే భరించాలి. కానీ ఆ మేరకు బడ్జెట్‌లో నిధులు కేటాయించలేదు. ఈ నేపథ్యంలో ఇందిరమ్మ ఇండ్లకు రోజుకొక మెలికలు పెరుగుతున్నట్టు కనిపిస్తున్నదనే అభిప్రాయం వ్యక్తమవుతున్నది.

ఇందిరమ్మ ఇల్లు , పీఎంఏవై అర్హతలు

• భూమి లేని, ఇల్లు లేని కుటుంబాలు
• రెండు గదుల ఇల్లు, కచ్చా ఇల్లు ఉన్నవారు. ఇంటి పైకప్పు కాంక్రీట్‌తో ఉండకూడదు
• 25ఏళ్లు పైబడిన అక్షరాస్యత కలిగిన పురుష సభ్యుడు లేని కుటుంబం
• దివ్యాంగులు, ఎస్సీ, ఎస్టీలకు ప్రాధాన్యత
• పర్మినెంటు ఉద్యోగం ఉండకూడదు, రోజువారీ కూలీ అయి ఉండాలి

దరఖాస్తు చేసేందుకు కావాల్సిన ముఖ్య ధ్రువపత్రాలు

• ఆధార్‌ కార్డు నంబర్‌, సెల్ఫ్‌ అటెస్టెట్‌ ఆధార్‌ కార్డు.
• దరఖాస్తుదారులు నిరక్షరాస్యులైతే వేలిముద్రతో కూడిన కన్సెంట్‌ లెటర్‌ తప్పనిసరి
• ఉపాధి హామీ పథకం(ఎంజీఎన్‌ఆర్‌ఈజీఏ) జాబ్‌ కార్డు

• బ్యాంకు ఖాతా వివరాలు(ఓరిజినల్‌, డూప్లికేట్‌)
• స్వచ్ఛ భారత్‌ మిషన్‌(ఎస్‌బీఎం)నెంబరు, (మరుగుదొడ్డి కోసం నమోదు చేసుకున్న వివరాలు)