తెలంగాణ అవసరాలకే ప్రాధాన్యం

తెలంగాణ అవసరాలు తీరిన తర్వాతే గోదావరి నీటిని ఇతర బేసిన్లలోకి తరలించాలని రాష్ట్ర ప్రభుత్వం స్పష్టం చేసింది. తెలంగాణ ప్రయోజనాలకు నష్టం వాటిల్లకుండా చూస్తే గోదావరి-కావేరి నదుల అనుసంధానానికి సహకరిస్తామని టాస్క్‌ఫోర్స్‌ కమిటీకి హామీ ఇచ్చింది.

• ఆ తర్వాతే మిగులు జలాలను తరలించుకోవాలని సూచన
• గోదావరి-కావేరి అనుసంధానంపై రాష్ట్ర ప్రభుత్వం స్పష్టీకరణ

హైదరాబాద్‌, మార్చి 24 (నమస్తే తెలంగాణ): తెలంగాణ అవసరాలు తీరిన తర్వాతే గోదావరి నీటిని ఇతర బేసిన్లలోకి తరలించాలని రాష్ట్ర ప్రభుత్వం స్పష్టం చేసింది. తెలంగాణ ప్రయోజనాలకు నష్టం వాటిల్లకుండా చూస్తే గోదావరి-కావేరి నదుల అనుసంధానానికి సహకరిస్తామని టాస్క్‌ఫోర్స్‌ కమిటీకి హామీ ఇచ్చింది. నదుల అనుసంధాన టాస్క్‌ఫోర్స్‌ కమిటీ సమావేశం ఈ నెల 6న హైదరాబాద్‌లో జరిగింది. కేంద్ర జల్‌శక్తి మంత్రిత్వశాఖ సలహాదారు, టాస్క్‌ ఫోర్స్‌ చైర్మన్‌ వెదిరె శ్రీరాం అధ్యక్షతన జరిగిన ఈ భేటీకి రాష్ట్ర నీటిపారుదల శాఖ ప్రత్యేక ప్రధాన కార్యదర్శి రజత్‌ కుమార్‌ హాజరయ్యారు. ఏపీ, ఇతర రాష్ర్టాల అధికారులు ఆన్‌లైన్‌లో పాల్గొన్నారు. ఆ సమావేశ వివరాలను జాతీయ నీటి అభివృద్ధి సంస్థ (ఎన్‌డబ్ల్యూడీఏ) శుక్రవారం విడుదల చేసింది.

ఆ వివరాలు ఇవీ..

• సీడబ్ల్యూసీ ఆమోదంతో గోదావరి జలాల్లో తెలంగాణకు కేటాయించిన 968 టీఎంసీల వినియోగానికి ఇప్పటికే డీపీఆర్‌లను సిద్ధం చేశామని రాష్ట్ర ప్రభుత్వం గుర్తుచేసింది. ఈ అవసరాలు తీరాక మిగులు జలాల లభ్యత ఉంటే ఇతర బేసిన్లకు మళ్లించుకోవచ్చని పేర్కొన్నది. ఇలా తరలించే నీటిలో సగం తెలంగాణకు కేటాయించాలని కోరింది.
• గోదావరి జలాల్లో ఛత్తీస్‌గఢ్‌ వినియోగించుకోని నీటిని మళ్లిస్తున్నందున ఆ రాష్ట్ర సమ్మతిని లిఖితపూర్వకంగా తీసుకోవాలని స్పష్టం చేశారు.
• గోదావరి నీటిని కృష్ణా బేసిన్‌ మీదుగా మరో బేసిన్‌కు మళ్లిస్తున్నారని, ఈ విషయంలో ఎగువ రాష్ట్రాలకు వాటా కల్పించే కేడబ్ల్యూడీటీ-1లోని సెక్షన్‌ 14బీ వర్తించకుండా చూడాల్సిన అవసరం ఉన్నదని పేర్కొన్నారు.
• ప్రతిపాదిత ఇచ్చంపల్లి ప్రాజెక్టుతో దిగువన ఉన్న సమ్మక బరాజ్‌ నిర్వహణకు సమస్యలు ఏర్పడతాయని చెప్పారు. ఏపీలోని పోలవరం ప్రాజెక్టు నుంచి నీటిని తరలించాలని భావిస్తే.. బేసిన్‌ వెలుపలి అవసరాలకు ఏపీ ఎంత మొత్తంలో కృష్ణా జలాలను వినియోగించుకుంటున్నదో గణించి, ఆమేరకు తెలంగాణకు నీటిని కేటాయించాలని సూచించారు.
• దీనిపై టాస్క్‌ఫోర్స్‌ చైర్మన్‌ స్పందిస్తూ.. తెలంగాణ సూచనలను పరిశీలిస్తామని చెప్పారు. ముఖ్యంగా తెలంగాణ కేటాయింపులకు నష్టం కాకుండా చూస్తామన్నారు. సమ్మక బరాజ్‌ నిర్వహణకు సంబంధించిన సాంకేతిక అంశాలను పరిగణనలోకి తీసుకుంటామని హామీ ఇచ్చారు. పోలవరం నుంచి నీటిని తరలించాలని ఏపీ కోరగా.. అలా చేస్తే అనుసంధాన లక్ష్యం దెబ్బతింటుందని చైర్మన్‌ స్పష్టం చేశారు.