పక్కాగా తెలంగాణ లెక్కలు

• అన్ని పంచాయతీల్లో 100 శాతం ఆన్‌లైన్‌ ఆడిటింగ్‌
• దేశంలోనే నంబర్‌ వన్‌.. మిగతా రాష్ర్టాలకు ఆదర్శం
• రాష్ర్టానికి కేంద్ర పంచాయతీరాజ్‌ శాఖ అభినందనలు
• సీఎం కేసీఆర్‌ దార్శనికత వల్లే: మంత్రి ఎర్రబెల్లి
• మన గ్రామాలు దేశానికి ఆదర్శం: మంత్రి హరీశ్‌రావు

హైదరాబాద్‌, డిసెంబర్‌ 23(నమస్తే తెలంగాణ): ‘గ్రామ పంచాయతీల ఆన్‌లైన్‌ ఆడిటింగ్‌లో తెలంగాణ మరోసారి సత్తా చాటింది. వరుసగా రెండో ఏడాది దేశంలోనే నంబర్‌ వన్‌ స్థానంలో నిలిచింది. ఆన్‌లైన్‌ ఆడిటింగ్‌ను 100 శాతం పూర్తి చేసింది. మేము ఇచ్చిన టార్గెట్‌ను అన్ని రాష్ర్టాల కన్నా ముందుగా పూర్తి చేసింది’ అని కేంద్ర పంచాయతీరాజ్‌ శాఖ కొనియాడింది. ఈ మేరకు కేంద్ర పంచాయతీరాజ్‌ శాఖ సంయుక్త కార్యదర్శి కేఎస్‌ సేథి గురువారం అన్ని రాష్ర్టాలకు లేఖ రాశారు. 2020-21 సంవత్సరానికి 15వ ఆర్థిక సంఘం నిధుల వినియోగంపై ఆయా రాష్ర్టాల్లోని కనీసం 25 శాతం గ్రామాలు తాము చేసిన నిధుల ఖర్చులను ఆన్‌లైన్‌లో పొందుపర్చాలని కేంద్ర పంచాయతీరాజ్‌ శాఖ ఆదేశించింది. దీనికి అనుగుణంగా తెలంగాణ నిర్ణీత గడువు కంటే ముందే వందకు వంద శాతం ఆన్‌లైన్‌ ఆడిటింగ్‌ పూర్తిచేసింది. 72 శాతంతో తమిళనాడు రెండో స్థానంలో, 60 శాతంతో ఆంధ్రప్రదేశ్‌ మూడో స్థానంలో, 59 శాతంతో కర్ణాటక నాలుగో స్థానంలో నిలిచాయి. 2019-20 సంవత్సరానికి 14వ ఆర్థిక సంఘం నిధుల వినియోగంపై నిర్వహించిన ఆన్‌లైన్‌ ఆడిటింగ్‌లోనూ తెలంగాణ నంబర్‌వన్‌గా నిలిచిన విషయం తెలిసిందే. కేంద్రం ప్రశంసలపై స్పందించిన రాష్ట్ర పంచాయతీరాజ్‌శాఖ మంత్రి ఎర్రబెల్లి దయాకర్‌రావు.. ఇందుకు కృషి చేసిన పంచాయతీరాజ్‌ అధికారులు, ఉద్యోగులను అభినందించారు. సీఎం కేసీఆర్‌ చేపట్టిన పల్లె ప్రగతి వంటి పథకాలు మన పల్లెలను దేశానికి ఆదర్శంగా తీర్చిదిద్దాయని చెప్పారు. ఆర్థికశాఖ మంత్రి హరీశ్‌రావు కూడా పంచాయతీరాజ్‌ శాఖకు అభినందనలు తెలిపారు. ఆర్థిక క్రమశిక్షణ పాటిస్తూ, నిధులను సద్వినియోగం చేసుకొంటూ, ఆన్‌లైన్‌ ఆడిటింగ్‌లో నంబర్‌ వన్‌గా నిలిచిన మన పంచాయతీలు దేశానికి ఆదర్శంగా నిలిచాయని కొనియాడారు.

ఆన్‌లైన్‌ ఆడిటింగ్‌లో కింగ్‌.. తెలంగాణ

• 100 శాతం.. తెలంగాణలో ఈ నెల 5 నాటికే ఆన్‌లైన్‌ ఆడిటింగ్‌ పూర్తి
• 23 శాతం.. అరుణాచల్‌ప్రదేశ్‌, హర్యానా, పశ్చిమబెంగాల్‌లో పూర్తయిన ఆడిటింగ్‌
• 2 శాతం.. ప్రధాని మోదీ సొంత రాష్ట్రం గుజరాత్‌లో పూర్తయిన ఆడిటింగ్‌
• 1 శాతం.. బీజేపీ పాలిత యూపీలో పరిస్థితి. పంజాబ్‌లో 3 శాతమే.
• 30 శాతం.. దేశవ్యాప్తంగా ఆడిటింగ్‌ జరిగిన పంచాయతీల్లో తెలంగాణ వాటా.
• 17 రాష్ర్టాలు.. కనీసం ఒక్క శాతం పంచాయతీల్లో ఆడిటింగ్‌ పూర్తి కాలేదు. ఈ జాబితాలో మహారాష్ట్ర, మధ్యప్రదేశ్‌ వంటి రాష్ర్టాలు ఉన్నాయి.