జూన్‌ 3 నుంచి బడిబాట

రాష్ట్రంలో బడిబాట కార్యక్రమాన్ని జూన్‌ 3 నుంచి 19 వరకు నిర్వహించాలని పాఠశాల విద్యాశాఖ నిర్ణయించింది. ఇందుకు సంబంధించి మార్గదర్శకాలతో కూడిన షెడ్యూల్‌ను బుధవారం పాఠశాల విద్యాశాఖ డైరెక్టర్‌ శ్రీదేవసేన విడుదల చేశారు. ప్రభుత్వ బడుల్లో విద్యార్థుల నమోదు పెంపు కోసం ఉద్దేశించిన బడిబాటను విజయవంతం చేయాలని జిల్లా కలెక్టర్లను, జిల్లా విద్యాధికారులను కోరారు.

హైదరాబాద్‌, మే 29 (నమస్తే తెలంగాణ) : రాష్ట్రంలో బడిబాట కార్యక్రమాన్ని జూన్‌ 3 నుంచి 19 వరకు నిర్వహించాలని పాఠశాల విద్యాశాఖ నిర్ణయించింది. ఇందుకు సంబంధించి మార్గదర్శకాలతో కూడిన షెడ్యూల్‌ను బుధవారం పాఠశాల విద్యాశాఖ డైరెక్టర్‌ శ్రీదేవసేన విడుదల చేశారు. ప్రభుత్వ బడుల్లో విద్యార్థుల నమోదు పెంపు కోసం ఉద్దేశించిన బడిబాటను విజయవంతం చేయాలని జిల్లా కలెక్టర్లను, జిల్లా విద్యాధికారులను కోరారు. షెడ్యూల్‌ ప్రకారం అంశాల వారీగా బడిబాట నిర్వహించేందుకు జిల్లా కలెక్టర్‌, డీఈవో, ఎంఈవో, ప్రధానోపాధ్యాయుల బాధ్యతలను శ్రీదేవసేన తెలియజేశారు. బడులు ప్రారంభం కాకముందు ఒక షెడ్యూల్‌, బడులు ప్రారంభమైన తర్వాత మరో షెడ్యూల్‌తో ఈ విధంగా రెండు వేర్వేరుగా మార్గదర్శకాలను వెల్లడించారు.

కలెక్టర్లదే ప్రధాన పాత్ర

బడిబాట నిర్వహణకు పంచాయతీరాజ్‌ అండ్‌ రూరల్‌ డెవలప్‌మెంట్‌, మున్సిపల్‌ అడ్మినిస్ట్రేషన్‌, లేబర్‌ డిపార్ట్‌మెంట్‌, ఉమెన్‌ అండ్‌ చైల్డ్‌ వెల్ఫేర్‌ డిపార్ట్‌మెంట్‌, వెల్ఫేర్‌ డిపార్టుమెంట్‌, జిల్లా మహిళా సమాఖ్యలతో కలిసి ఈ నెల 30 లోపు జిల్లా కలెక్టర్‌ ఆధ్వర్యంలో జిల్లా స్థాయి సమావేశం నిర్వహించాలి. జిల్లా స్థాయిలో అన్ని పంచాయతీల వారీగా అన్ని ప్రభుత్వ శాఖల అధికారులు, ఉద్యోగులతో బడిబాట నిర్వహించాలి. ఇందులో భాగంగా జూన్‌ 10 లోపు ఒక యూనిఫాం, పాఠ్యపుస్తకాలు, నోట్‌ పుస్తకాలు, వర్క్‌బుక్‌లను పంపిణీ చేయాలి.

బడిబాట కార్యక్రమాలు

• అర్హత ఉన్న అంగన్‌వాడి పిల్లలను సమీపంలోఉన్న ప్రాథమిక బడిలో ఒకటో తరగతిలో చేర్పించాలి.
• బడి బయట పిల్లలను గుర్తించాలి. అలాగే డ్రాపౌట్స్‌, బడికి పోని పిల్లలు, చాలాకాలంగా స్కూల్‌కు హాజరుకాని వారిని గుర్తించి బడిలో చేర్పించాలి. ఈ విషయంలో ఉమెన్‌ సెల్ఫ్‌ హెల్ప్‌ గ్రూపుల సహాయం పొందాలి.
• బాల కార్మికులను గుర్తించి, వారిని సం బంధిత బడిలో చేర్పించాలి.
• జూన్‌ 8 లోపు ఆన్‌లైన్‌ ప్రమోషన్‌ చేయాలి.
• జూన్‌ 12 నుంచి 19 వరకు బడుల పున:ప్రారంభ సమయంలో తల్లిదండ్రులకు స్వాగతం పలకాలి. కమ్యూనిటీ అండ్‌ ప్రజాప్రతినిధులు సంప్రదాయక పద్ధతుల్లో బడిబాట నిర్వహించాలి.