KRMB | కృష్ణా ప్రాజెక్టులు కేఆర్ఎంబీకి అప్ప‌గింత‌.. చేతులు కాలాక ఆకులు ప‌ట్టుకున్న‌ట్టు కాంగ్రెస్ తీరు

KRMB | కృష్ణానదిపై ప్రాజెక్టులను కేఆర్‌ఎంబీకి అప్పగించే విషయంలో కాంగ్రెస్‌ ప్రభుత్వ తీరు చేతులు కాలాక ఆకులు పట్టుకున్నట్టుగా ఉన్నది. ప్రాజెక్టుల అప్పగింత అంశంపై జనవరి 17న కేంద్ర జల్‌శక్తిశాఖ సమావేశం నిర్వహించింది. ఆ సమావేశ మినిట్స్‌ను అదే నెల 19న విడుదల చేసింది. రెండింటిల్లోనూ ప్రాజెక్టులను బోర్డుకు అప్పగించేందుకు తెలంగాణ సర్కారు అంగీకరించిందని నొక్కిచెప్పింది.

• చేతులు కాలాక.. సర్కారు లేఖ
• పదిరోజులుగా స్పందించని ప్రభుత్వం
• ఆఖరి నిమిషంలో సర్కారు హడావుడి
• తాజాగా కేంద్ర జల్‌శక్తిశాఖకు లేఖ
• కృష్ణాబోర్డు మీటింగ్‌లో అంగీకారం తెలిపిన తర్వాత విడుదల

KRMB | హైదరాబాద్‌, ఫిబ్రవరి 1 (నమస్తే తెలంగాణ): కృష్ణానదిపై ప్రాజెక్టులను కేఆర్‌ఎంబీకి అప్పగించే విషయంలో కాంగ్రెస్‌ ప్రభుత్వ తీరు చేతులు కాలాక ఆకులు పట్టుకున్నట్టుగా ఉన్నది. ప్రాజెక్టుల అప్పగింత అంశంపై జనవరి 17న కేంద్ర జల్‌శక్తిశాఖ సమావేశం నిర్వహించింది. ఆ సమావేశ మినిట్స్‌ను అదే నెల 19న విడుదల చేసింది. రెండింటిల్లోనూ ప్రాజెక్టులను బోర్డుకు అప్పగించేందుకు తెలంగాణ సర్కారు అంగీకరించిందని నొక్కిచెప్పింది. దీనిని ఖండిస్తూ హడావుడి చేసిన రాష్ట్ర ప్రభుత్వం రెండు రోజుల క్రితం వరకూ కేంద్రానికి జవాబివ్వలేదు. అంతా చేయిదాటిపోయాక జనవరి 27వ తేదీన కేంద్ర జల్‌శక్తిశాఖకు లేఖ రాసింది. దానిని కూడా వెంటనే పంపిందా అంటే అదీ లేదు. మరో 2 రోజుల కాలయాపన అనంతరం గత నెల 29న లేఖను పంపింది. తెలంగాణ డిమాండ్లను ముందుపెట్టింది. 17వ తేదీనాటి సమావేశంలో ప్రాజెక్టుల అప్పగింతకు ఒప్పుకోకపోయినా అంగీకరించినట్టు రికార్డు చేశారని, తెలంగాణ వాదనలను సమావేశంలో సరిగా రికార్డు చేయలేదని, వాటిని సవరించాలని కంటితుడుపుగా విజ్ఞప్తి చేసింది. దానికైనా కట్టుబడి ఉందా అంటే అదీ లేదు. ప్రభుత్వం తన వాదనలకు విరుద్ధంగా తాజాగా జరిగిన సమావేశంలో ఏకంగా ప్రాజెక్టులను బోర్డుకు అప్పగించేందుకు మరోసారి అంగీకారం తెలిపింది. సమావేశం అనంతరం కేంద్రానికి రాసిన లేఖను ప్రభుత్వం విడుదల చేయడం కొసమెరుపు.

అభిప్రాయాలు తీసుకోకుండానే

కేంద్ర జల్‌శక్తిశాఖ, కృష్ణాబోర్డు సైతం ప్రాజెక్టుల అప్పగింతపై ఏకపక్షంగా ముందుకు పోతున్నాయి. సమావేశాలను నిర్వహించడం, ఆ తరువాత మినిట్స్‌ను రాష్ర్టాలకు పంపడం, అభిప్రాయాలను తీసుకొని నిజంగానే రికార్డు చేయని అంశాలు ఏమైనా ఉంటే తిరిగి మినిట్స్‌ను ఆ మేరకు సవరించడం పరిపాటి. కానీ తాజాగా కేంద్ర జల్‌శక్తిశాఖ అదేమీ చేయకుండానే నేరుగా మినిట్స్‌ను పంపడం, ఆ మినిట్స్‌పైనే తాజాగా కేఆర్‌ఎంబీ మరోసారి సమావేశాన్ని నిర్వహించడం గమనార్హం.

లేఖలో కేంద్రానికి నివేదించిన అంశాలు

• శ్రీశైలం, నాగార్జునసాగర్‌ ఆపరేషన్‌ ప్రొటోకాల్‌ను ఏపీ పునర్‌వ్యవస్థీకరణ చట్టం సెక్షన్‌ 89 ప్రకారం ట్రిబ్యునల్‌ 2 నిర్ధారించాల్సి ఉన్నది. ప్రస్తుతం వాదనలు కొనసాగుతున్నాయి. అది పూర్తయ్యే వరకు 50:50 శాతం నిష్పత్తిలో కృష్ణా జలాల వినియోగించుకునే విధంగా తాత్కాలిక ఒప్పందానికి మాత్రమే తెలంగాణ సమ్మతం. అది కూడా ఇన్‌ బేసిన్‌ ప్రాజెక్టుల నీటి అవసరాలకు ప్రాధాన్యం ఇస్తేనే.
• శ్రీశైలం జలవిద్యుత్తు ప్రాజెక్టు మాత్రమే. దానిని ఎండీడీఎల్‌ను 830 ఫీట్లుగా మాత్రమే నిర్ధారించాలి.
• శ్రీశైలం నుంచి ఔట్‌సైడ్‌ బేసిన్‌కు కేవలం 34 టీఎంసీలను మళ్లించడానికే కట్టడి చేయాలి.
• ట్రిబ్యునల్‌ 1 అవార్డు ప్రకారం తాగునీటికి వినిగియోస్తున్న జలాలను 20 శాతంగానే పరిగణనలోకి తీసుకోవాలి.
• క్యారీ ఓవర్‌ స్టోరేజీకి అవకాశమివ్వాలి. ఒక నీటి సంవత్సరం జలాలను తదుపరి నీటి సంవత్సరం వినియోగాల్లో పరిగణనలోకి తీసుకోవద్దు.
• ఔట్‌సైడ్‌ బేసిన్‌కు జలాలను తరలించే ప్రాజెక్టులకు ఎట్టి పరిస్థితుల్లో అనుమతులు ఇవ్వకూడదు.
• తెలంగాణ షరతులను అన్నింటిని ఒప్పుకుంటేనే, ఆపరేషన్‌ ప్రొటోకాల్‌ పూర్తయితేనే ప్రాజెక్టులను అప్పగిస్తాం. ఈ విషయాలను ఇప్పటికే బోర్డు సమావేశాల్లో నొక్కిచెప్పాం.
• ప్రాజెక్టులను అప్పగించేది లేదని 17వ బోర్డు సమావేశంలో ఖరాకండిగా తేల్చిచెప్పాం. అంశాన్ని అపెక్స్‌కౌన్సిల్‌కు రెఫర్‌ చేయాలని కోరాం.
• రివర్‌బోర్డుల గెజిట్‌ను సవరించాలని కేంద్రాన్ని కోరాం. ఇప్పటివరకు ఎలాంటి స్పందన లేదు.
• నాగార్జునసాగర్‌ డ్యామ్‌పై సీఆర్పీఎఫ్‌ బలగాలు అవసరం లేదు. తెలంగాణ ప్రభుత్వం తెలిపిన అన్ని అంశాలను బోర్డు మినిట్స్‌లో చేర్చాలి.