Telangana | కాలకృత్యాలు తీర్పుకోవాలన్నా కష్టమే.. 4,740 పాఠశాలల్లో మరుగుదొడ్లులేవు

మూడు లక్షల కోట్ల బడ్జెట్‌. ఈ మూడు లక్షల కోట్లల్లో విద్యారంగం వాటా 23వేల కోట్లు. సర్కారు బడుల్లో ఆర్టిఫీషియల్‌ ఇంటెలిజెన్స్‌ పాఠాలు. 15వేల కోట్లతో ఇంటిగ్రేటెడ్‌ స్కూళ్లు. ఇది సర్కారు వారు డబ్బా. ఇది ఒక పార్శమైతే. మరో పార్శంలో రాష్ట్రంలోని 4,740 సర్కారు బడుల్లో టాయిలెట్లు లేవు. మరీ ముఖ్యంగా 1,704 స్కూళ్లల్లో బాలికలకు టాయిలెట్‌ వసతి లేదు.

• రాష్ట్రంలోని బడుల్లో అధ్వాన పరిస్థితులు

Telangana | హైదరాబాద్‌, మార్చి 28 (నమస్తే తెలంగాణ) : మూడు లక్షల కోట్ల బడ్జెట్‌. ఈ మూడు లక్షల కోట్లల్లో విద్యారంగం వాటా 23వేల కోట్లు. సర్కారు బడుల్లో ఆర్టిఫీషియల్‌ ఇంటెలిజెన్స్‌ పాఠాలు. 15వేల కోట్లతో ఇంటిగ్రేటెడ్‌ స్కూళ్లు. ఇది సర్కారు వారు డబ్బా. ఇది ఒక పార్శమైతే. మరో పార్శంలో రాష్ట్రంలోని 4,740 సర్కారు బడుల్లో టాయిలెట్లు లేవు. మరీ ముఖ్యంగా 1,704 స్కూళ్లల్లో బాలికలకు టాయిలెట్‌ వసతి లేదు. ఇంతటి అధ్వాన పరిస్థితులు రాష్ట్రంలోని సర్కారు బడుల్లో నెలకొన్నాయి.

ఈ బడుల్లో ఒంటికి.. రెంటికి పోవడం, కాలకృత్యాలు తీర్చుకోవడం సమస్యగా మారింది. విద్యాశాఖ లెక్కల ప్రకారం.. ప్రతి 80 మంది విద్యార్థులకు ఒక టాయిలెట్‌ చొప్పున ఉండాలి. కానీ 18.58శాతం పాఠశాలల్లో బాలురకు టాయిలెట్లు లేవు. మరో 6.75శాతం పాఠశాలల్లో బాలికల టాయిలెట్లు లేకపోవడం ఆందోళనకరం. బడుల్లో బాలికలు టాయిలెట్లు లేని కారణంగా మంచినీళ్లు కూడా తాగడం మానేస్తున్నారు. దీంతో అనారోగ్యాన్ని కొనితెచ్చుకుంటున్నారు. తగినంత నీళ్లు తాగకపోవడంతో, మూత్రపిండాల ఇన్‌ఫెక్షన్‌సహా ఇతర రోగాల పాలవుతున్నారు.

వాస్తవ పరిస్థితులిలా..

• సంగారెడ్డి జిల్లాలో అత్యధికంగా 396 పాఠశాలల్లో ఒక్కటంటే ఒక్క టాయిలెట్‌ కూడా లేదు. ఆ తర్వాత మహబూబ్‌నగర్‌లో 249, కామారెడ్డిలో 246 చొప్పున పాఠశాలల్లో టాయిలెట్లు లేవు.
• వికారాబాద్‌ జిల్లాలో 223, నిజామాబాద్‌లో 213, నిర్మల్‌లో 211, భద్రాద్రి కొత్తగూడెంలో 203 స్కూళ్లల్లో టాయిలెట్లు లేని పరిస్థితి నెలకొన్నది.
• అర్బన్‌ ప్రాంతం, రాష్ట్ర రాజధాని అయిన హైదరాబాద్‌లోనూ 50, మేడ్చల్‌ మల్కాజిగిరిలో 46 పాఠశాలల్లో టాయిలెట్ల లేమి సమస్య పట్టిపీడిస్తున్నది.
• చిన్న జిల్లాలైన నారాయణపేటలో 158, ములుగులో 41 పాఠశాలల్లో దారుణమైన పరిస్థితులున్నాయి.
• సెమీఅర్బన్‌ జిల్లాలైన రంగారెడ్డిలో 180 స్కూళ్లల్లో టాయిలెట్లు లేవు. హనుమకొండలో 49, వరంగల్‌లో 69 పాఠశాలల్లో దారుణమైన పరిస్థితులున్నాయి.
• గిరిజన ప్రాంతాలతో కూడిన జిల్లాల్లో ఈ సమస్య తీవ్రత అధికంగా ఉంది. కుమ్రం బీం ఆసిఫాబాద్‌లో 169, మహబూబాబాద్‌లో 133 చొప్పున పాఠశాలల్లో విద్యార్థుల తిప్పలు వర్ణణాతీతం.