వర్సిటీ వేసవి సెలవుల పొడిగింపు

ఎండ తీవ్రతల నేపథ్యంలో రాష్ట్రంలోని పలు యూనివర్సిటీలు వేసవి సెలవులు పొడిగించాయి. రాష్ట్రంలో అధిక ఉష్ణోగ్రతలుండటం, హాస్టళ్లల్లో నీటి కొరత వంటి సమస్యల దృష్ట్యా సెలవులు పొడిగిస్తూ నిర్ణయం తీసుకున్నాయి.

హైదరాబాద్‌, మే 31 (నమస్తే తెలంగాణ) : ఎండ తీవ్రతల నేపథ్యంలో రాష్ట్రంలోని పలు యూనివర్సిటీలు వేసవి సెలవులు పొడిగించాయి. రాష్ట్రంలో అధిక ఉష్ణోగ్రతలుండటం, హాస్టళ్లల్లో నీటి కొరత వంటి సమస్యల దృష్ట్యా సెలవులు పొడిగిస్తూ నిర్ణయం తీసుకున్నాయి. గతంలో ఇచ్చిన ఉత్తర్వుల ప్రకారం మే 1 నుంచి 31 వరకు సెలవులు ప్రకటించాయి. సోమవారం నుంచి పునఃప్రారంభం కావాల్సి ఉన్నది.

ఉస్మానియా, పాలమూరు యూనివర్సిటీలు జూన్‌ 6 వరకు సెలవులు పొడిగిస్తూ ఉత్తర్వులు జారీచేశాయి. జూన్‌ 7 ఆదివారం కాగా, జూన్‌ 8 సోమవారం ఈ వర్సిటీల్లో క్లాసులు ప్రారంభం కానున్నాయి. కాకతీయ, శాతవాహన వర్సిటీలు జూన్‌ 5 వరకు సెలవులు పొడిగించగా, ఇవి జూన్‌ 6న తిరిగి ప్రారంభమవుతాయి. డిగ్రీ, పీజీ కాలేజీలకు ఇవి వర్తిస్తాయి. విద్యావారోత్సవాలు, జనగణన విధుల్లో కొందరు డిగ్రీ అధ్యాపకులుండటం, ఎండల తీవ్రత అధికంగా ఉండటంతో సెలవులు పొడిగించారు.