Govt Junior Colleges | విద్యార్థులు రారు.. క్లాసులు జరగవు.. సర్కారు కాలేజీల్లో పడిపోతున్న హాజరుశాతం

సర్కారు జూనియర్‌ కాలేజీల్లోని విద్యార్థుల్లో అత్యధికులు తరగతులకు డుమ్మా కొడుతున్నారు. చదువుకుని బాగుపడాలని బుద్ధిమాటలు చెప్పాల్సిన తల్లిదండ్రులే విద్యార్థులను పనులకు పురమాయిస్తున్నారు. వారు సైతం పుస్తకాలకు నో చెప్పి.. పనులకు సై అంటున్నారు. ఫలితంగా హాజరుశాతం 40-50లోపే ఉంటున్నది.

• ఎగ్జామ్స్‌కు ప్రిపేరవ్వాల్సిన సమయంలో పనులకు

Govt Junior Colleges | హైదరాబాద్‌, జనవరి 15 (నమస్తే తెలంగాణ) : సర్కారు జూనియర్‌ కాలేజీల్లోని విద్యార్థుల్లో అత్యధికులు తరగతులకు డుమ్మా కొడుతున్నారు. చదువుకుని బాగుపడాలని బుద్ధిమాటలు చెప్పాల్సిన తల్లిదండ్రులే విద్యార్థులను పనులకు పురమాయిస్తున్నారు. వారు సైతం పుస్తకాలకు నో చెప్పి.. పనులకు సై అంటున్నారు. ఫలితంగా హాజరుశాతం 40-50లోపే ఉంటున్నది. ఇంటర్‌ వార్షిక పరీక్షలు మార్చి 5 నుంచి 24 వరకు జరగనున్నాయి.

పరీక్షలకు మరో మూడు నెలలు మాత్రమే ఉంది. ప్రిపేరవ్వాల్సిన సమయంలో పనులకెళ్లడంతో సర్కారు కాలేజీల్లో ఫలితాలపై ప్రభా వం చూపే అవకాశముంది. ఇప్పటికే ఇంటర్‌లో ఉత్తీర్ణతాశాతం అంతంతమాత్రంగానే ఉంది. జోగులాంబ గద్వాల జిల్లాలోని మానవపాడు, గట్టు ప్రాంతాల్లోని విద్యార్థులు కాలేజీలకు డుమ్మా కొట్టి పత్తి ఏరడానికి వెళుతున్నారు. అటవీ ప్రాంతాలకు సమీపంలో ఉన్న వారు ఇప్పపువ్వు, బీడీ ఆకు సేకరణ పనులకు వెళుతున్నట్టు క్షేత్రస్థాయి పరిస్థితులు స్పష్టంచేస్తున్నాయి. పరీక్షలు సమీపిస్తుండటంతో అ ధ్యాపకులు, ప్రిన్సిపాళ్లల్లో టెన్షన్‌ నెలకొన్నది.

ఉదాహరణలిలా..

• కరీంనగర్‌ జిల్లా చొప్పదండి ప్రభుత్వ జూనియర్‌ కాలేజీలో 126 మంది విద్యార్థులుండగా, రోజు 80 మంది విద్యార్థులు మాత్రమే క్లాసులకొస్తున్నారు. ఉదయం 10 గంటలకు వచ్చేవారి సంఖ్య 50శాతం లోపే. మధ్యాహ్నం తర్వాత హాజరయ్యే విద్యార్థుల సంఖ్య తగ్గుతున్నది.
• సిరిసిల్ల జిల్లాలోని ప్రభుత్వ జూనియర్‌ కాలేజీల్లో రోజువారి హాజరుశాతం 40లోపే ఉంది. ఇటీవలీ పరీక్షలు సమీపిస్తుండటంతో అధికారుల ప్రయత్నాలతో హాజరుశాతం కాస్త మెరుగైంది. నాగర్‌కర్నూల్‌ జిల్లా వెల్దండ ప్రభుత్వ జూనియర్‌ కాలేజీలో 183 మంది విద్యార్థులుంటే. ఓ రోజు ఉదయం 10 గంటలకు 10 మంది మాత్రమే క్లాసులకు హాజరయ్యారు. ఆ తర్వాత 20, చివరికి మధ్యాహ్నం 12గంటలకు 40 మంది మాత్రమే క్లాసులకు హాజరయ్యారు.
• ప్రభుత్వ జూనియర్‌ కాలేజీ వంగూరులో వంద మంది విద్యార్థులకు కేవలం 10 మంది మాత్రమే క్లాసులకు హాజరవుతున్నారు. అంటే పదిశాతం మంది మాత్రమే ఈ కాలేజీలో క్లాసులు వింటున్నారు.
• పట్టణ ప్రాంతమైన కల్వకుర్తి ప్రభుత్వ జూనియర్‌ కాలేజీలో 600 మంది విద్యార్థులుంటే సగం మంది క్లాసులకు డుమ్మా కొడుతున్నారు. 300 మంది మాత్రమే హాజరవుతున్నారు.
• ప్రభుత్వ జూనియర్‌ కాలేజీ అమ్రాబాద్‌ లో 300 మందికి కేవలం 30 మంది మా త్రమే హాజరయ్యారు. ఎందుకు క్లాసులకు హాజరుకావడంలేదని ప్రశ్నిస్తే ఇప్పపూల సేకరణ, వేరుశనగ కాయలు తెంపేందుకు వెళుతున్నట్టుగా సమాచారం.