Congress Govt | మొట్టికాయలు పడితే కానీ మేల్కోలే.. కోచింగ్‌ సెంటర్ల కట్టడిలో సర్కారు విఫలం

రాష్ట్రంలో ప్రైవేట్‌ కోచింగ్‌ సెంటర్లను నియంత్రించడంలో రాష్ట్ర ప్రభుత్వం పూర్తిగా విఫలమైంది. జేఈఈ, నీట్‌, ఎప్‌సెట్‌ వంటి పరీక్షలకు కోచింగ్‌ ఇస్తున్న శిక్షణ సంస్థలను కట్టడిచేయడంలో నిర్లక్ష్యంగా వ్యవహరిస్తున్నది.

• జనవరిలో కేంద్రం మార్గదర్శకాలు
• మీనమేషాలు లెక్కించిన రాష్ట్రం
• కేంద్రం ప్రభుత్వం ఆగ్రహంతో అమలుకు నిర్ణయం
• ఇంటర్‌బోర్డుకు బాధ్యతలు

Congress Govt | హైదరాబాద్‌, సెప్టెంబర్‌ 15 (నమస్తే తెలంగాణ): రాష్ట్రంలో ప్రైవేట్‌ కోచింగ్‌ సెంటర్లను నియంత్రించడంలో రాష్ట్ర ప్రభుత్వం పూర్తిగా విఫలమైంది. జేఈఈ, నీట్‌, ఎప్‌సెట్‌ వంటి పరీక్షలకు కోచింగ్‌ ఇస్తున్న శిక్షణ సంస్థలను కట్టడిచేయడంలో నిర్లక్ష్యంగా వ్యవహరిస్తున్నది. చివరికి కేంద్ర ప్రభుత్వం మొట్టికాయలేయడంతో ఇప్పుడు మేల్కొన్నది. ఇటీవలి కాలంలో కోచింగ్‌ సెంటర్లలో విద్యార్థుల ఆత్మహత్యలు పెరిగాయి. దీనికితోడు వసతలు లేమి, సిబ్బంది కొరత వేధిస్తున్నది. అయినప్పటికీ ఫీజులు మాత్రం ఆకాశాన్నంటుతున్నాయి. ఈ నేపథ్యంలో ఈ ఏడాది జనవరిలో కోచింగ్‌ సెంటర్ల నియంత్రణకు కేంద్రం మార్గదర్శకాలు విడుదల చేసింది.

రాష్ర్టాలన్నీ వాటిని అమలుచేయాలని సూచించింది. ఉల్లంఘిస్తే గుర్తింపు రద్దు చేసి తగిన చర్యలు తీసుకుంటామని హెచ్చరించింది. తొలిసారి ఉల్లంఘిస్తే రూ. 25 వేలు, రెండోసారి మళ్లీ అదే పనిచేస్తే రూ. లక్ష జరిమానా విధించాలని సూచించింది. పదేపదే అదే పనిచేస్తే రిజిస్ట్రేషన్‌ రద్దు చేస్తామని హెచ్చరించింది. వీటి అమలు విషయాన్ని రాష్ట్రం పెడచెవిన పెట్టింది. కేంద్ర విద్యాశాఖ అధికారులు ఇటీవల ఆగ్రహం వ్యక్తం చేయడంతో తాజాగా క్యాబినెట్‌ సబ్‌ కమిటీలో చర్చించారు. కేంద్ర మార్గదర్శకాలను అమలు చేయాలని నిర్ణయించారు. ఈ బాధ్యతలను ఇంటర్‌బోర్డుకు అప్పగించాలని ప్రభుత్వం నిర్ణయించినట్టు తెలిసింది.

కేంద్ర మార్గదర్శకాల్లో ప్రధానమైనవి

• రోజులో ఐదు గంటలకు మించి క్లాసులు నిర్వహించకూడదు. తెల్లవారుజామున, రాత్రి సమయాల్లో క్లాసులు నిర్వహించరాదు.
• శిక్షణ ఇచ్చే వ్యక్తి లేదా సంస్థ కోచింగ్‌ ప్రారంభించిన మూడు నెలల్లో కచ్చితంగా రిజిస్ట్రేషన్‌ చేసుకోవాలి. తగు డాక్యుమెంట్లను సమర్పించాలి. దరఖాస్తు చేసిన మూడు నెలల్లోపు ఆయా దరఖాస్తును ఆమోదిస్తారు. లేదా తిరస్కరిస్తారు.
• ఒకే పేరుతో వేర్వేరు ప్రాంతాల్లో శిక్షణ ఇచ్చే సంస్థలు తప్పనిసరిగా ఆయా బ్రాంచ్‌లను రిజిస్ట్రేషన్‌ చేసుకోవడం తప్పనిసరి.
• సెకండరీ విద్య (పాఠశాల విద్య) పూర్తిచేసిన వారిని మాత్రమే కోచింగ్‌ కోసం పేర్ల నమోదుకు అనుమతించాలి.
• శిక్షణ కేంద్రాల్లో అర్హులైన సిబ్బందిని నియమించుకోవాలి.
• విద్యార్థుల తల్లిదండ్రులను తప్పుదోవ పట్టించేలా ర్యాంకు గ్యారెంటీ హామీలు ఇవ్వరాదు. ఫలితాలపై మోసపూరిత ప్రకటనలివ్వరాదు.
• సిబ్బంది అర్హత, కోచింగ్‌ సెంటర్‌ వివరాలు, శిక్షణ అందించే కోర్సులు, వసతి సౌకర్యాలు, ఫీజు రీఫండ్‌కు సంబంధించిన సమాచారాన్ని బహిర్గత పరచాలి.