TG Budget | రాష్ట్ర బడ్జెట్‌ 3,24,234 కోట్లు.. ఏ శాఖకు ఎంత కేటాయింపులంటే..!

TG Budget | రాష్ట్ర ప్రభుత్వం 2026-27 ఆర్థిక సంవత్సరానికి రూ.3,24,234 కోట్ల అంచ నా ప్రతిపాదనలతో బడ్జెట్‌ ప్రవేశపెట్టింది. రెవెన్యూ వ్యయం రూ.2,34,406 కోట్లుగా, మూలధన వ్యయం రూ.47,267 కోట్లుగా పేర్కొన్నది.

TG Budget | హైదరాబాద్‌, మార్చి 20 (నమస్తే తెలంగాణ): రాష్ట్ర ప్రభుత్వం 2026-27 ఆర్థిక సంవత్సరానికి రూ.3,24,234 కోట్ల అంచ నా ప్రతిపాదనలతో బడ్జెట్‌ ప్రవేశపెట్టింది. రెవెన్యూ వ్యయం రూ.2,34,406 కోట్లుగా, మూలధన వ్యయం రూ.47,267 కోట్లుగా పేర్కొన్నది. రాష్ట్ర తలసరి ఆదాయం రూ.4,18,931గా ఉన్నట్టు తెలిపింది. రాష్ట్ర వృద్ధి రేటు 10.2 శాతమని ప్రకటించింది. రాష్ట్ర బడ్జెట్‌ను శుక్రవారం ఉదయం అసెంబ్లీలో డిప్యూటీ సీఎం, ఆర్థికశాఖ మంత్రి భట్టివిక్రమార్క ప్రవేశపెట్టగా, శాసనమండలిలో నీటిపారుదల శాఖ మంత్రి ఉత్తమ్‌ ప్రవేశపెట్టారు. ఈ బడ్జెట్‌లో ఆర్థికశాఖకు 60,438 కోట్లు, పంచాయతీరాజ్‌ శాఖకు 33,688 కోట్లు ప్రతిపాదించారు.

సెకండరీ, ఉన్నత విద్యాశాఖలకు రూ.26,674 కోట్లు, వ్యవసాయం, సహకార శాఖలకు రూ.23,179 కోట్లు, సాగునీటి పారుదల శాఖకు 22,615 కోట్లు, విద్యుత్తు శాఖకు 21,285 కోట్లు, పురపాలక, పట్టణాభివృద్ధి శాఖకు 17,907 కోట్లు, ఎస్సీ సంక్షేమానికి 11,784 కోట్లు, గృహనిర్మాణ శాఖకు రూ.7,430 కోట్లు కేటాయించారు. అసెంబ్లీలో గంట 53 నిమిషాల పాటు డిప్యూటీ సీఎం భట్టి విక్రమార్క, మండలిలో మంత్రి ఉత్తమ్‌ తమ బడ్జెట్‌ ప్రసంగం కొనసాగించారు. వరుసగా 4వ సారి అసెంబ్లీలో బడ్జెట్‌ ప్రవేశపెట్టిన భట్టిని సీఎం రేవంత్‌ మంత్రులు, ఎమ్మెల్యేలు, అధికారులు అభినందించారు.

దళితులకు అన్యాయం కొంగరి శంకర్‌ మాదిగ

ప్రభుత్వం ప్రవేశపెట్టిన బడ్జెట్‌లో రూ.11,784 కోట్లు ఎస్సీ సంక్షేమశాఖకు కేటాయించి దళితులకు అన్యాయం చేసిందని మాదిగ హక్కుల దండోరా రాష్ట్ర అధ్యక్షుడు కొంగరి శంకర్‌ మాదిగ విమర్శించారు. దళితులకు అంబేద్కర్‌ అభయహస్తం పేరుతో రూ.12 లక్షలు ఇస్తామన్న హామీకి అనుగుణంగా బడ్జెట్‌లో నిధులు కేటాయింపులు జరుగలేదని మండిపడ్డారు.

బీసీలకు సర్కార్‌ మోసం బీసీ హకుల సాధన సమితి

బడ్జెట్‌లో బీసీలకు మరోసారి తీరని అన్యాయం జరిగిందని బీసీ హకుల సాధన సమితి రాష్ట్ర ప్రధాన కార్యదర్శి ధూళిపాల ధనుంజయ నాయుడు ఆవేదన వ్యక్తం చేశారు. శుక్రవారం ఆయన మా ట్లాడుతూ కామారెడ్డి బీసీ డిక్లరేషన్‌లో ప్రతి బడ్జెట్‌లో బీసీలకు రూ. 20 వేల కోట్లు కేటాయిస్తామని చెప్పి అమలు చేయడం లేదన్నారు. ఇలా చేయడం బీసీలను మోసం చేసినట్లేనని పేర్కొన్నారు.

2026-27 వార్షిక బడ్జెట్‌లో వివిధ శాఖలకు కేటాయింపులు (కోట్లలో)

• వ్యవసాయం, సహకార శాఖ 23,179
• పశుసంవర్ధక, మత్స్యశాఖ 1,529
• బీసీ సంక్షేమ శాఖ 12,511
• ఎస్సీ సంక్షేమం 11,784
• ఎస్టీ సంక్షేమం 7,937
• మైనారిటీ సంక్షేమం 3,679
• మహిళా, శిశు, దివ్యాంగ,వయోవృద్ధులశాఖ 3,143
• విద్యుత్తు శాఖ 21,285
• పర్యావరణం, సైన్స్‌అండ్‌ టెక్నాలజీ 1,049
• ఆర్థిక శాఖ 60,438
• పౌరసంబంధాలు 7,366
• సాధారణ పరిపాలనా శాఖ 1,190
• వైద్య, ఆరోగ్య, కుటుంబసంక్షేమం 13,679
• హోం శాఖ 11,907
• గృహ నిర్మాణం 7,430
• వాణిజ్య, పారిశ్రామిక 3,747
• ఐటీ, కమ్యూనికేషన్‌ 875
• సాగునీటి పారుదల 22,615
• కార్మిక ఉపాధి కల్పన 998
• న్యాయశాఖ 2,367
• అసెంబ్లీ నిర్వహణ 259
• మున్సిపల్‌, పట్టణాభివృద్ధి 17,907
• పంచాయతీరాజ్‌ 33,688
• ప్రణాళిక శాఖ 7,971
• రెవెన్యూ 4,020
• సెకండరీ విద్యాశాఖ, 21,231
• ఉన్నత విద్య 5,443
• రవాణా శాఖ 4,491
• రోడ్లు, భవనాల శాఖ 8,298
• పర్యాటక, సాంస్కృతికశాఖ 2,127