Telangana | నూలుపోగే ఉరితాడు.. రాష్ట్రంలో నేతన్నల మరణ మృదంగం

కాంగ్రెస్‌ ప్రభుత్వం వచ్చీరాగానే వర్క్‌ ఆర్డర్లు నిలిపివేయడం, చేనేత కార్మికులకు ఎలాంటి ప్రోత్సాహం అందించకపోవడంతో వస్త్ర పరిశ్రమ తీవ్ర సంక్షోభంలో పడింది. మరమగ్గాలు నడుపుతూ కుటుంబాన్ని పోషించుకునేవారు చేతిలో పనుల్లేక తీవ్ర ఆర్థిక ఇబ్బందుల్లో కొట్టుమిట్టాడాల్సి వస్తున్నది. గత ప్రభుత్వ సంక్షేమ పథకాలను అటక్కెక్కించడంతో చేనేతరంగం చితికిపోయింది.

• 7 నెలల్లో 12 మంది ఆత్మహత్య
• చితికిన చేనేతరంగం.. కార్మికుల హాహాకారం
• కేసీఆర్‌ పాలనలో నేతన్నకు పథకాల సాంత్వన
• కాంగ్రెస్‌ ప్రభుత్వంలో ఆ స్కీములన్నీ రద్దు
• వర్క్‌ ఆర్డర్లు లేక మూతపడిన పరిశ్రమలు
• బతుకమ్మ చీరలపై ఇంతవరకు ఊసే లేదు
• పట్టని కార్మికుల గోస.. పైగా అవహేళనలు
• మూలనపడిన సాంచాలు తుక్కుగా అమ్మకం
• పదేండ్ల కిందటి చేనేత దుస్థితి పునరావృతం

బీఆర్‌ఎస్‌ హయాంలో..

• నేతన్నలకు వర్క్‌ ఆర్డర్లు ఇచ్చింది
• మరమగ్గాలు ఆధునీకరించింది
• నూలు, రంగులకు సబ్సిడీ ఇచ్చింది
• పాత రుణాలను మాఫీ చేసింది కొత్తగా పావలావడ్డీ రుణాలిచ్చింది
• సబ్సిడీపై విద్యుత్తు అందించింది
• వరర్‌-టు-ఓనర్‌ పథకం తెచ్చింది

ఇలా చేనేత రంగానికి ఇచ్చిన ప్రోత్సాహకాలతో పదేండ్లలో ఆత్మహత్యలకు అడ్డుకట్ట పడింది.

కాంగ్రెస్‌ పాలనలో..

• గత సంక్షేమ పథకాలను ఆపేసింది
• ప్రభుత్వ వర్క్‌ ఆర్డర్లను నిలిపేసింది
• రూ.2కే ఇచ్చిన యూనిట్‌ కరెంట్‌ను రూ.8.5కు పెంచింది
• అటకెక్కిన వరర్‌-టు-ఓనర్‌ పథకం

ఫలితంగా పనుల్లేక నేత న్నలు అప్పులపాలయ్యారు. కుటుంబ పోషణ భారమై ఏడు నెలల్లోనే12 మంది తనువు చాలించారు.

Telangana | హైదరాబాద్‌, జూలై 21 (నమస్తే తెలంగాణ): కాంగ్రెస్‌ ప్రభుత్వం వచ్చీరాగానే వర్క్‌ ఆర్డర్లు నిలిపివేయడం, చేనేత కార్మికులకు ఎలాంటి ప్రోత్సాహం అందించకపోవడంతో వస్త్ర పరిశ్రమ తీవ్ర సంక్షోభంలో పడింది. మరమగ్గాలు నడుపుతూ కుటుంబాన్ని పోషించుకునేవారు చేతిలో పనుల్లేక తీవ్ర ఆర్థిక ఇబ్బందుల్లో కొట్టుమిట్టాడాల్సి వస్తున్నది. గత ప్రభుత్వ సంక్షేమ పథకాలను అటక్కెక్కించడంతో చేనేతరంగం చితికిపోయింది. రాష్ట్ర వస్త్ర శాఖ కుదేలు కావడంతో సాంచాలను తుక్కుకింద అమ్ముకోవాల్సిన దుస్థితి నెలకొన్నది. ఇటు పనుల్లేక.. అటు కుటుంబాలను పస్తులుంచలేక.. మరోవైపు అప్పులు తీర్చే దారిలేక ఏడు నెలల్లోనే 12మంది నేతన్నలు ఆత్మహత్య చేసుకోవడం పరిస్థితి తీవ్రతను కండ్లకు కడుతున్నది. చేనేత రంగంలో మళ్లీ పదేండ్ల నాటి దారుణ పరిస్థితులు వచ్చాయని కార్మికుల్లో ఆవేదన వ్యక్తమవుతున్నది.

నిలిచిపోయిన బతుకమ్మ చీరల ఆర్డర్లు

బీఆర్‌ఎస్‌ ప్రభుత్వం 2017 నుంచి 2023 వరకు ఏడేండ్లపాటు నిరంతరాయంగా బతుకమ్మ చీరల పంపిణీ పథకాన్ని అమలుచేసింది. కష్టతరమైనా  కొవిడ్‌ కాలంలోనూ చీరల పంపిణీని కొనసాగించింది. ఏటా మహిళలకు కోటి చీరల దాకా కానుకగా అందించింది. 25 నుంచి 30 విభిన్న డిజైన్లలో సుమారు 240 రకాల చీరలను పది రంగుల్లో పంపిణీ చేసింది. ఇందుకు ఏటా ప్రభుత్వం రూ.320 కోట్ల నుంచి రూ.350 కోట్ల వరకు ఖర్చు చేసింది. వీటిలో 90 శాతం వరకు చీరల తయారీ ఆర్డర్లను జనవరిలోనే సిరిసిల్ల, వరంగల్‌, కరీంనగర్‌ చేనేత కార్మికులకు ప్రభుత్వం ఇచ్చేది. చీరల తయారీ ఏప్రిల్‌ నుంచి అక్టోబర్‌ దాకా కొనసాగేది. దాదాపు 15 వేల పవర్‌లూమ్స్‌ కార్మికులకు చేతినిండా పనిదొరికేది. పేద మహిళలు, చేనేత, అనుబంధ కార్మికులు, ఇతరులకు ఈ పథకం ఎంతగానో ఉపయోగపడింది. కాంగ్రెస్‌ ప్రభుత్వం బతుకమ్మ చీరల తయారీ ఆర్డర్లు నేటికీ ఇవ్వకపోవడంతో ఒక్కసారిగా చేనేత పరిశ్రమ సంక్షోభంలో పడింది. పవర్‌లూమ్స్‌లో పనిలేక, బాధలు తాళలేక నేతన్నలు బలవన్మరణాలకు పాల్పడ్డారు. ఇటీవల పద్మశాలి సంఘం, చేనేత సహకార సంఘం ప్రతినిధులు చేనేత, జౌళిశాఖ మంత్రి తుమ్మల నాగేశ్వర్‌రావును కలిసి నేత కార్మికుల సమస్యలు, పరిశ్రమ సంక్షోభం గురించి వివరించారు. ప్రభుత్వ పరంగా అండగా నిలవాలని కోరారు. నేతల ఆత్మహత్యలు ఆగాలంటే తక్షణమే బతుకమ్మ చీరల ఆర్డర్లు ఇవ్వాలని విజ్ఞప్తిచేశారు. కానీ, ఆర్డర్లపై స్పష్టంగా చెప్పకుంండా దీర్ఘకాలిక ప్రణాళికలు రూపొందిస్తున్నట్టు మంత్రి చెప్పారని నేతలు పేర్కొన్నారు.

కరెంట్‌ యూనిట్‌ ధర పెంచిన కాంగ్రెస్‌

బీఆర్‌ఎస్‌ ప్రభుత్వం 4వ క్యాటగిరీ కింద పవర్‌లూమ్స్‌కు విద్యుత్తును రూ.4కు యూనిట్‌ చొప్పున సరఫరాచేసింది. ఇందులో రూ.2 సబ్సిడీ పోను రూ.2 మాత్రమే చెల్లించాల్సి వచ్చేది. ఇప్పుడు దేశంలో ఎక్కడా లేని విధంగా విద్యుత్తును 3వ క్యాటగిరీ కిందకు మార్చడం వల్ల యూనిట్‌కు రూ.8.5 చెల్లించాల్సి వస్తున్నది. 10 హెచ్‌పీ సామర్థ్యం దాటిన పవర్‌లూమ్స్‌ యాజమానులు యూనిట్‌కు రూ.8.5 చెల్లించాల్సి వస్తున్నందున పది లూమ్స్‌ ఉన్న యజమాని ఒక్క కార్మికుడితో ఆరు లూమ్స్‌నే నడిపిస్తున్నాడు. ఫలితంగా చాలా మందికి పనిలేకుండా పోతున్నది. నేతన్న బీమా, త్రిప్ట్‌, నేతన్న చేయూత పథకాలు కూడా సక్రమంగా అమలుకావడం లేదు. నేత కార్మికులను యజమానులు చేయాలనే ఉద్దేశంతో కేసీఆర్‌ ప్రభుత్వం రూ.350 కోట్లతో సిరిసిల్లలో ‘వర్కర్‌ టు ఓనర్‌’ షెడ్లను నిర్మించింది. విద్యుత్తు, ఇతర మౌలిక సదుపాయాలు కల్పించింది. కేవలం లూమ్స్‌ ఏర్పాటు చేయడమే మిగిలింది. ఈ క్రమంలో ప్రభుత్వం మారడంతో వర్కర్‌ టు ఓనర్‌ షెడ్ల వ్యవహారం నిలిచిపోయింది. లూమ్స్‌ రాకపోవడంతో నేత కార్మికుల శాశ్వత ఉపాధికి గండిపడింది. లూమ్స్‌ బిగిస్తే 1100 మంది కార్మికులకు ఉపాధి లభిస్తుంది.

ఆగిన సంక్షేమ పథకాలు

గత కేసీఆర్‌ ప్రభుత్వం చేనేత కార్మికుల సంక్షేమానికి అనేక పథకాలు, ఇతర కార్యక్రమాలు అమలుచేసింది. బడ్జెట్‌ కేటాయింపులూ పెంచింది. మగ్గాల ఆధునికీకరణకు ఆర్థికసాయం అందించింది. రుణాలు మాఫీచేసింది. మార్కెట్‌ అనుసంధానం వంటి చర్యలు చేపట్టింది. వర్క్‌ ఆర్డర్లు పెంచింది. బతుకమ్మ చీరల ఉత్పత్తి, స్కూల్‌ యూనిఫామ్‌ల తయారీ వంటి పనులు అప్పగించింది. ఈ చర్యలు చేనేత పరిశ్రమకు పునర్జీవాన్నిచ్చాయి. ఆర్థిక స్థిరత్వాన్ని తీసుకొచ్చాయి. చేతి నిండా పని దొరకడంతో నేతన్నల ఆత్మహత్యలు ఆగిపోయాయి. గతంలో మహారాష్ట్రలోని భీవండికి ఉపాధి కోసం వలస పోయిన నేత కార్మికులు తిరిగి స్వస్థలాలకు చేరుకున్నారు. బీఆర్‌ఎస్‌ ప్రభుత్వ పథకాలను కొనసాగించడంలో రేవంత్‌రెడ్డి సర్కారు విఫలమైంది. ఫలితంగా రాష్ట్రవ్యాప్తంగా వస్త్ర పరిశ్రమ సంక్షోభంలో పడింది.

నేత కార్మికుల కోసం బీఆర్‌ఎస్‌ ప్రభుత్వం అమలుచేసిన ముఖ్యమైన పథకాలు చేనేతరంగం

1. పావలా వడ్డీ పథకం
2. మగ్గాల ఆధునికీకకరణ
3. చేనేత వస్త్ర ప్రదర్శన
4. చేనేత రంగంలో శిక్షణ, మౌలిక సదుపాయాల కల్పన
5. మారెట్‌ ఇన్సెంటివ్స్‌
6. హ్యాండ్ల్యూం పారు గద్వాల

పవర్‌ లూం రంగం

1. సిరిసిల్ల టెక్స్‌ టైల్‌ పారు
2. మినీ టెక్స్‌టైల్‌ పారు వరంగల్‌
3. టీ-టీఏపీ 2017-2020
4. సిరిసిల్ల అప్పరెల్‌ పారు
5. వరర్‌-టు-ఓనర్‌ పథకం
6.  మరమగ్గాల సేవా కేంద్రం ఏర్పాటు
7. మరమగ్గాలకు వినియోగించే విద్యుత్తు పై 50% సబ్సిడీ
8. మరమగ్గాల ఆధునినికీకరణ

గతంలో బీఆర్‌ఎస్‌ ప్రభుత్వం అమలుచేసిన పథకాలు

• చేనేత మిత్ర పథకం కింద ముడిసరుకు కొనుగోలుపై 40 శాతం సబ్సిడీ
• నేతన్నకు చేయూత పథకం కింద పొదుపు చేసుకునే 8 శాతం వేతనానికి ప్రభుత్వం 16 శాతం కలిపి ఖాతాలో జమ
• రుణమాఫీ పథకం కింద ఏప్రిల్‌ 2010 నుంచి మార్చి 2017 వరకు రూ.28.96 కోట్ల రుణాల మాఫీ. ఫలితంగా ఒకొకరికి రూ.లక్ష వరకు మాఫీ అయింది. 10,148 మంది చేనేత కార్మికులకు లబ్ధి కలిగింది.
• కార్మికులెవరైనా మరణిస్తే అతడి కుటుంబానికి నేతన్న పథకం ద్వారా రూ.5 లక్షల ఆర్థికసాయం
• నేత కార్మికుల నైపుణ్యతను గుర్తించి వారికి కొండా లక్ష్మణ్‌ బాపూజీ పేరిట అవార్డుల ప్రదానం
• పావలా వడ్డీ పథకం, మారెటింగ్‌ ప్రోత్సాహకాలు
• చేనేత సంఘాలకు 49 కామన్‌ వర్‌ షెడ్ల నిర్మాణం
• ప్రతి సోమవారం ప్రభుత్వ ఉద్యోగులంతా చేనేత వస్త్రాలు ధరించాలనే నియమం
• బతుకమ్మ చీరెల ఆర్డర్లు, పిల్లల యూనిఫామ్‌లు, ప్రభుత్వ కార్యాలయాల్లో ఉపయోగించే వస్త్రాల ఆర్డర్లు

కాంగ్రెస్‌ ప్రభుత్వమే బాధ్యత వహించాలి

తెలంగాణలో జనవరి నుంచి ఇప్పటి వరకు 12 మంది చేనేత కార్మికులు ఆత్మహత్య చేసుకున్నారు. ఇందుకు కాంగ్రెస్‌ ప్రభుత్వమే బాధ్యత వహించాలి. నేత కార్మికుల ఆత్మహత్యల నివారణకు తక్షణ చర్యలు చేపట్టాలి. రేవంత్‌రెడ్డి ప్రభుత్వం మృతుల కుటుంబాలకు రూ.25 లక్షల చొప్పుల నష్టపరిహారం చెల్లించాలి. చేనేత కార్మికులకు ప్రయోజనం, పని కల్పించే పథకాలను కాంగ్రెస్‌ ప్రభుత్వం నిలిపివేసింది. దీనివల్ల నేత సమాజంలో నిరుద్యోగం, పేదరికం పెరిగి కనీసం మందులు కూడా కొనలేని దీనస్థితిలో నేత కార్మికులు బలవన్మరణాలకు పాల్పడుతున్నారు.

-కే తారక రామారావు, బీఆర్‌ఎస్‌ వర్కింగ్‌ ప్రెసిడెంట్‌

ఆర్డర్లు ఇవ్వక నోటికాడి బుక్కను ఎత్తగొట్టిన్రు

బతుకమ్మ చీరల ఆర్డర్లు ఇవ్వక నోటికాడి బుక్కను కాంగ్రెస్‌ నేతలు ఎత్తగొట్టిన్రు. జనతా వస్ర్తాలు, ఇందిరమ్మ చీరెల పేరుతో అయినా పథకాన్ని కొనసాగించాలి. రైతులకు ఉచిత కరెంట్‌ ఇచ్చినట్టు చేనేత రంగానికి కూడా ఇవ్వాలి. కరెంటు సమస్య, బతుకమ్మ చీరలు, బకాయిలు, మార్కెట్‌ వసతి కల్పన కోసం రాష్ట్రవ్యాప్తంగా పోరాటం చేయాలని నిర్ణయించాం. రాష్ట్ర బడ్జెట్‌లో భారీ బడ్జెట్‌ కేటాయిస్తామని, నేత కార్మికుల సమస్యలు పరిష్కారిస్తామని రాష్ట్ర చేనేత, జౌళిశాఖ మంత్రి తుమ్మల నాగేశ్వర్‌రావు హామీ ఇచ్చారు. దానిని నిలబెట్టుకోని పక్షంలో ఆగస్టు 7న జాతీయ చేనేత దినోత్సవం నుంచి రాష్ట్రవ్యాప్తంగా ఆందోళనలు చేపడుతాం.

-మూశం రమేశ్‌- పవర్‌లూమ్స్‌ వర్కర్స్‌ యూనియన్‌ (సీఐటీయూ) రాష్ట్ర అధ్యక్షుడు

రాష్ట్రంలో నేతన్నల వివరాలు

• యాన్సిలరీ వరర్లు సహా చేనేత కార్మికులు : 40,533
• పవర్‌లూమ్స్‌పై ఆధారపడి జీవిస్తున్న కార్మికులు : 35,762
• చేనేత సహకార సంఘాలు : 336
• చేసేత సహకార గ్రూపులు : 615
• పవర్‌లూమ్‌ సహకార సంఘాలు : 157
• గార్మెంట్‌ సొసైటీలు : 122