పదో తరగతికి స్పెషల్‌ క్లాసులు

ఈ ఏడాది ప్రభుత్వ పాఠశాలల్లో పదో తరగతిలో వందశాతం ఉత్తీర్ణత లక్ష్యంగా విద్యాశాఖ కృషి చేస్తున్నది. ఎస్సెస్సీ విద్యార్థులకు స్పెషల్‌ క్లాసులు నిర్వహించే విషయంలో డీఈవోలకే అధికారాలు ఇచ్చారు

• వంద శాతం ఉత్తీర్ణత కోసం ప్రభుత్వ ఉపాధ్యాయుల తపన
• స్లో లర్నర్స్‌పై ప్రత్యేక శ్రద్ధ

హైదరాబాద్‌, నవంబర్‌ 29 (నమస్తే తెలంగాణ):ఈ ఏడాది ప్రభుత్వ పాఠశాలల్లో పదో తరగతిలో వందశాతం ఉత్తీర్ణత లక్ష్యంగా విద్యాశాఖ కృషి చేస్తున్నది. ఎస్సెస్సీ విద్యార్థులకు స్పెషల్‌ క్లాసులు నిర్వహించే విషయంలో డీఈవోలకే అధికారాలు ఇచ్చారు. ఇప్పటికే పలు పాఠశాలల్లో ఉపాధ్యాయులు ఉదయం, సాయంత్రం వేళల్లో స్పెషల్‌ క్లాసులు, రివిజన్‌ క్లాసులు నిర్వహిస్తున్నారు. చదువుల్లో వెనుకబడిన విద్యార్థులపై ఉపాధ్యాయులు ప్రత్యేక దృష్టి సారిస్తున్నారు. వాట్సాప్‌ గ్రూపులు ఏర్పాటుచేసి పర్యవేక్షిస్తున్నారు. స్పెషల్‌ క్లాసులకు హాజరయ్యే విద్యార్థులకు దాతల సహకారంతో స్నాక్స్‌, టిఫిన్లు అందజేసేందుకు ప్రయత్నిస్తున్నారు. ఈ ఏడాది పది పరీక్షల్లో 11 పేపర్లకు బదులుగా ఆరు పేపర్లే నిర్వహిస్తుండటంతో అందుకు తగ్గట్టుగా విద్యార్థులను సన్నద్ధం చేస్తున్నారు. తామే స్వయంగా మాడల్‌ పేపర్లు రూపొందించి విద్యార్థులతో ప్రాక్టీస్‌ చేయిస్తున్నారు.

విద్యాశాఖ అధికారుల మార్గదర్శకాలు ఇలా..

• రెగ్యులర్‌ సిలబస్‌ను డిసెంబర్‌ 31 కల్లా పూర్తిచేయాలి.
• జనవరి 1 నుంచి రివిజన్‌ టెస్ట్‌లు నిర్వహించి, విద్యార్థుల్లో పరీక్షల భయాన్ని పోగొట్టాలి.
• సబ్జెక్టు టీచర్లు ప్రాక్టీస్‌ టెస్ట్‌ పేపర్లు రూపొందించి, రివిజన్‌ క్లాసుల్లో టెస్ట్‌లు నిర్వహించాలి. ఆయా టెస్టుల్లో విద్యార్థులు చేస్తున్న తప్పొప్పులను గుర్తించి సూచనలు ఇవ్వాలి.
• స్పెషల్‌ రివిజన్‌ క్లాసుల్లో నిర్వహించిన టెస్ట్‌ల ఫలితాలను నోటుబుక్‌లో నమోదుచేయాలి.
• నెమ్మదస్తులు (స్లో లర్నర్లు), వెనుకబడి వారి కోసం ప్రత్యేక కార్యాచరణ ప్రణాళికను రూపొందించాలి.
• హెచ్‌ఎంలు ప్రత్యేక శ్రద్ధ తీసుకుని, ఈ క్లాసులను నిరంతరం పర్యవేక్షించాలి.

 

విద్యార్థులు ఉత్సాహంగా వస్తున్నారు
జనగామ జిల్లాలో పదో తరగతి విద్యార్థులకు నవంబర్‌ 15 నుంచి స్పెషల్‌ క్లాసులు ప్రారంభించాం. ఇవి ఉదయం 8:30 గంటల నుంచి 9:30 గంటల వరకు కొనసాగుతున్నాయి. విద్యార్థులు ఉత్సాహంగా వస్తున్నారు. ఎంఈవోలు, ఇతర అధికారులు స్కూళ్లను సందర్శించి, సూచనలు చేస్తున్నారు. రోజుకోక టీచర్‌ విధులకు హాజరయ్యేలా చూస్తున్నాం. – రాము, జనగామ డీఈవో

రోజుకు రెండు గంటలు రివిజన్‌
మా స్కూళ్లో 65 మంది టెన్త్‌ విద్యార్థులున్నారు. వీరిలో 12 మంది తెలుగు, 53 మంది ఇంగ్లిష్‌ మీడియం చదువుతున్నారు. ఉదయం 8:45 గంటల నుంచి 9:45 వరకు, సాయంత్రం 4:05 నుంచి 5:15 గంటల వరకు ప్రత్యేక తరగతులు నిర్వహిస్తున్నాం.
– నందికొండ విద్యాసాగర్‌, గణితం టీచర్‌, జెడ్పీహెచ్‌ఎస్‌, చల్లూరు, కరీంనగర్‌ జిల్లా