జనం తిట్లు.. కోర్టు చీవాట్లు

రాజన్న సిరిసిల్ల జిల్లా కలెక్టర్‌ సందీప్‌కుమార్‌ ఝాపై రాష్ట్ర ప్రభుత్వం ఎట్టకేలకు బదిలీ వేటు వేసింది. ఈ మేరకు శనివారం ఉత్తర్వులు వెలువరించింది. సందీప్‌కుమార్‌ కలెక్టర్‌గా ఉన్న దాదాపు పద్నాలుగు నెలలలో మొదటి నుంచీ వివాదాస్పందగా వ్యహరించారని విమర్శలను ఎదుర్కొన్నారు.

• ఆది నుంచీ వివాదాస్పదంగా మారిన సిరిసిల్ల కలెక్టర్‌ ధోరణి
• అధికారపార్టీకి అనుకూలంగా సందీప్‌కుమార్‌ పనితీరు
• వింత చర్యలతో ప్రజల అవస్థలు
• పలుమార్లు కోర్టు మొట్టికాయలు
• ఎట్టకేలకు ప్రభుత్వం బదిలీ వేటు
• కలెక్టర్‌ బాధితుల సంబురాలు

కరీంనగర్‌, సెప్టెంబర్‌ 27 (నమస్తే తెలంగాణ ప్రతినిధి)/రాజన్న సిరిసిల్ల: రాజన్న సిరిసిల్ల జిల్లా కలెక్టర్‌ సందీప్‌కుమార్‌ ఝాపై రాష్ట్ర ప్రభుత్వం ఎట్టకేలకు బదిలీ వేటు వేసింది. ఈ మేరకు శనివారం ఉత్తర్వులు వెలువరించింది. సందీప్‌కుమార్‌ కలెక్టర్‌గా ఉన్న దాదాపు పద్నాలుగు నెలలలో మొదటి నుంచీ వివాదాస్పందగా వ్యహరించారని విమర్శలను ఎదుర్కొన్నారు. ముందుగా కలెక్టర్‌ తమను లక్ష్యంగా చేసుకొని కక్షసాధింపు ధోరణితో వ్యవహరిస్తున్నారని బీఆర్‌ఎస్‌ నేతలు మండిపడ్డారు. ఆ తర్వాత అధికార పార్టీ నేతలకు కూడా సెగ తగలింది.

ఈ పరిస్థితుల్లో కలెక్టర్‌ వ్యవహారశైలిపై సొంత పార్టీ నేతలు.. ముఖ్యంగా ప్రభుత్వ విప్‌ ఆది శ్రీనివాస్‌ చీఫ్‌ సెక్రటరీకి ఫిర్యాదు చేయడం.. సీఎం దృష్టికి తీసుకెళ్లడం వంటి పరిణామాల క్రమంలో కలెక్టర్‌ బదిలీ జరిగింది. కలెక్టర్‌ వ్యవహారశైలి బాగా లేదని, నిత్యం వివాదాలు సృష్టిస్తున్నారని, నిబంధనలకు విరుద్ధంగా వ్యవహరిస్తున్నారంటూ.. పత్రికల్లో పలు కథనాలు వెలువడ్డాయి. బీఆర్‌ఎస్‌ నేతలు ఉన్నతాధికారులకు పలుసార్లు ఫిర్యాదు చేసినా సర్కారు పెద్దగా పట్టించుకోలేదు. తాజాగా అధికార పార్టీ నేతలు కూడా ఫిర్యాదు చేయడంతో ఎట్టకేలకు బదిలీ జరిగిందని చర్చ నడుస్తున్నది.

మొదటి నుంచీ అదే ధోరణి

రాజన్న సిరిసిల్ల కలెక్టర్‌గా సందీప్‌కుమార్‌ ఝా 2024 జూన్‌ 16న బాధ్యతలు చేపట్టారు. అప్పటి నుంచి.. ఆయన తీసుకున్న నిర్ణయాలు, అమలు చేసిన విధానాలు చాలా వివాదాస్పదమయ్యాయి. తెలంగాణ ప్రజాపాలన దినోత్సవం రోజు ప్రొటోకాల్‌ పాటించలేదని.. విప్‌ ఆది శ్రీనివాస్‌కు స్వాగతం పలకాల్సిన కలెక్టర్‌ నిర్లక్ష్యం ప్రదర్శించారన్న విమర్శలను ఎదుర్కొన్నారు. వేములవాడ మండలం అగ్రహారంలోని కరీంనగర్‌ డెయిరీకి లైసెన్స్‌ లేదంటూ సీజ్‌ చేయించారు. దీంతో పాడి రైతులు రోడ్లపైకి వచ్చి ఆందోళన చేశారు. పాలు రోడ్డుపై పారబోసి జిల్లా వ్యాప్తంగా నిరసనలు నిర్వహించారు.

ఈ వివాదం చినికి చినికి పెద్దది కావడం.. ప్రభుత్వ పెద్దలు ఇరకాటంలో పడటంతో లాక్‌ తీశారు. నిర్వాసితురాలు పరిహారం కోసం హైకోర్టును ఆశ్రయించినందుకు, తప్పుడు ఆధారాలతో కోర్టును తప్పుదోవ పట్టించావంటూ ఆమెపై పోలీసు కేసు పెట్టించారు. ఆమె తిరిగి హైకోర్టును ఆశ్రయించగా, కోర్టు కలెక్టర్‌పై ఆగ్రహం వ్యక్తం చేస్తూ రెండు గంటలు నిల్చుండబెట్టి పనిష్మెంట్‌ ఇచ్చినట్టుగా కథనాలు వెలువడ్డాయి. వేములవాడ ప్రధాన రహదారి విస్తరణలో నిర్వాసితులకు సరైన పరిహారం నిర్ణయించకుండానే నివాసాలు, దుకాణాలు కూల్చివేయడంపై బాధిత కుటుంబాలు మనోవేదనకు గురయ్యాయి. కలెక్టర్‌ తీరుపై బాధితులు కోర్టును ఆశ్రయించారు.

రోడ్లపైకి వచ్చి ధర్నాలు, ఆందోళనలు చేశారు. ప్రతిపక్ష పార్టీ అయిన.. బీఆర్‌ఎస్‌ నాయకులను, పార్టీ శ్రేణులను టార్గెట్‌చేసి కేసులు పెట్టించారని విమర్శలు ఎదుర్కొన్నారు. న్యాయబద్ధంగా భూమి కొనుగోలు చేసిన అనేక మంది బీఆర్‌ఎస్‌ నాయకులపై కేసులు పెట్టి జైలు పాలు చేశారని, అధికారపార్టీ నేతల ఆదేశాలతోనే ఇలా చేశారని విమర్శలు వచ్చాయి.

ఛాయ్‌ దుకాణంపై ప్రతాపం

సిరిసిల్ల బతుకమ్మ ఘాట్‌ వద్ద కేటీఆర్‌ ఫొటో పెట్టుకున్న ఓ చిరువ్యాపారి టీస్టాల్‌ను కలెక్టర్‌ తొలగించడం పెనుదుమారం సృష్టించింది. స్థానికులు పెద్దఎత్తున ఆందోళన చేశా రు. ముందస్తు నోటీసులు ఇవ్వకుండానే తొలగించడంతో బాధితుడు కుటుంబంతో కలిసి భోరున విలపించడం తీవ్ర చర్చనీయాంశమైం ది. కలెక్టర్‌ తీరుపై ప్రజాగ్రహం వ్యక్తమైంది. కేటీఆర్‌ స్పందించి, కొత్తగా టీస్టాల్‌ పెట్టించి, దగ్గరుండి ఓపెన్‌ చేశారు.

కలెక్టర్‌ బదిలీపై సంబురాలు

కలెక్టర్‌ సందీప్‌కుమార్‌ఝాను ప్రభుత్వం బదిలీ చేయడంతో ఆయన బాధితులు శ నివారం సంబురాలు జరుపుకున్నారు. బదిలీ వార్త వినగానే పటాకులు కాల్చి, ఆ లయాల్లో కొబ్బరికాయలు కొట్టారు. స్వీ ట్లు పంచిపెట్టి సంతోషాన్ని వ్యక్తంచేశారు. రగుడు చౌరస్తాలోని కలెక్టరేట్‌ వద్ద పటాకులు కాలుస్తున్న బాధితులు శ్రీనివాస్‌, అగ్గి రాములు, అబ్బాడి అనిల్‌ మరికొంత మందిని పోలీసులు అడ్డుకున్నారు. దీం తో బాధితులు పోలీసులతో వాగ్వాదానికి దిగారు. కలెక్టర్‌ బదిలీతో ప్రజలు సంబురాలు జరుపుకోవడం రాష్ట్రంలో చర్చనీయాంశమైంది.

సందీప్‌కుమార్‌ వివాదాల జాబితా

• మున్సిపల్‌ చైర్‌పర్సన్‌ జిందం కళ కుమారుడు మహేందర్‌ నిర్వహిస్తున్న బార్‌ను సీజ్‌ చేయించారు. బార్‌ను తెరవాలం టూ హైకోర్టు ఇచ్చిన ఉత్తర్వులను సైతం బేఖాతరు చేశారు. బార్‌కు పర్మిషన్‌ ఇ చ్చిన ఎక్సైజ్‌ సూపరింటెండెంట్‌తోపా టు ఇతర అధికారిని సస్పెండ్‌ చేశారు.
• జంగ్‌ సిపాయికి చెందిన భూమిని చట్ట ప్రకారం కొనుగోలు చేసినప్పటికీ కబ్జా చేశాడంటూ బీఆర్‌ఎస్‌ నాయకుడు బొల్లి రామ్మోహన్‌పై పోలీసు కేసుపెట్టించి, 14 రోజులపాటు జైలుకు పంపించిన వ్యవహారంలోనూ కలెక్టర్‌పై విమర్శలు వ్యక్తమయ్యాయి.
• సారంపల్లిలో ఓ రైతు వద్ద వ్యవసాయ భూమిని కొనుగోలు చేసిన జిందం దేవదాస్‌, అగ్గిరాములుపై కేసులు పెట్టి జైలు కు పంపించారు. బీఆర్‌ఎస్‌కు చెందిన వారు కావడంతోనే కక్షసాధింపు అని ఆరోపణలు వ్యక్తమయ్యాయి.
• తంగళ్లపల్లి మండలం తాడూరుకు చెందిన సురభి నవీన్‌రావు, జిల్లెల్లకు చెందిన అబ్బాడి రాజిరెడ్డిపై కేసులు పెట్టంచి జైలుకు పంపించారు. అలాగే. మాజీ జడ్పీటీసీ కోడి అంతయ్య, ప్యాక్స్‌ చైర్మన్‌ బండి దేవదాస్‌గౌడ్‌, కోడూరి భాస్కర్‌గౌడ్‌ను ప్రభుత్వ భూములు కబ్జా చేశారంటూ కేసులు పెట్టించారు.
• బీఆర్‌ఎస్‌ హయాంలో మహిళలకు కే టాయించిన రేషన్‌ దుకాణాలను రద్దు చేసి, కాంగ్రెస్‌ కార్యకర్తలకు ఇచ్చారు.
• సిరిసిల్ల సుభాష్‌నగర్‌లో నిర్మించిన స్వ శక్తి మహిళా భవనాన్ని మాజీ మంత్రి కేటీఆర్‌ ప్రారంభించకుండా మున్సిపల్‌ అధికారులతో తాళం వేయించారు. అ క్కడ 144 సెక్షన్‌ విధించి పోలీసు బందోబస్తు పెట్టించారు.
  బీఆర్‌ఎస్‌ కార్యకర్తలు కాళేశ్వరం గొప్పదనం చాటుతూ ప్లెక్సీలు ఏర్పాటు చేస్తే, వాటిని తొలగించడం పట్ల కూడా విమర్శలు వ్యక్తమయ్యాయి.
• పంచాయతీరాజ్‌ ఈఈ భూమేశ్వర్‌ తన పైఅధికారులకు చెప్పి సెలవుపై దుబా యి వెళ్లారు. తనకు సమాచారం ఇవ్వలేదన్న కారణంతో ఆయన చాంబర్‌కు తాళం వేయించారని సమాచారం.
• జిల్లా విద్యాధికారిపై కలెక్టర్‌ కక్షసాధింపు చర్యలకు పాల్పడ్డారని వార్తలు వచ్చా యి. దీంతో వేధింపులు తట్టుకోలేక డీఈవో సెలవుపై వెళ్లినట్టు సమాచారం.
• కలెక్టరేట్‌లోని ఇంటిగ్రేటెడ్‌ చైల్డ్‌ ప్రొటెక్షన్‌ స్కీమ్‌లో పన్నెండు మందికి సమాచారం ఇవ్వకుండానే ఉద్యోగంలో నుం చి తొలగించారు. ఈఎంఆర్‌ఎస్‌ స్కూళ్ల లో పనిచేస్తున్న సిబ్బందిని కూడా తీసేశారు. ఎవరినీ తొలగించవద్దంటూ సం బంధితశాఖ ప్రిన్సిపల్‌ సెక్రటరీ సీతామాలక్ష్మి ఆదేశాలు ఇచ్చినప్పటికీ, బేఖాతరు చేసినట్టు ఆరోపణలు ఉన్నాయి.
• ముఖ్యమంత్రి వేములవాడ టూర్‌ సం దర్భంగా రూ.32 వేలకు ప్లేట్‌ భోజనం పెట్టడం వివాదాస్పదంగా మారింది.