అద్దెబస్సు టెండర్లకు ఓనర్లు దూరం

మహాలక్ష్మి పథకంతో ఆర్టీసీ బస్సుల్లో మహిళా ప్రయాణికుల సంఖ్య పెరగడం, రద్దీకి సరిపడా బస్సులు లేకపోవడంతో ప్రభుత్వం 340 అద్దెబస్సుల కోసం టెండర్లు పిలిచింది. గడువు ముగుస్తున్నప్పటికీ టెండర్‌ వేసేందుకు ఎవరూ ముందుకు రావడం లేదు.

• 340 అద్దెబస్సులకు ఆర్టీసీ టెండర్లు
• గడువు సమీపిస్తున్నా స్పందన నిల్‌
• సమస్యలు పరిష్కరిస్తే ఆలోచిస్తాం
• తేల్చి చెప్తున్న అద్దెబస్సు సంఘం

హైదరాబాద్‌ సిటీబ్యూరో, డిసెంబర్‌ 28 (నమస్తే తెలంగాణ): మహాలక్ష్మి పథకంతో ఆర్టీసీ బస్సుల్లో మహిళా ప్రయాణికుల సంఖ్య పెరగడం, రద్దీకి సరిపడా బస్సులు లేకపోవడంతో ప్రభుత్వం 340 అద్దెబస్సుల కోసం టెండర్లు పిలిచింది. గడువు ముగుస్తున్నప్పటికీ టెండర్‌ వేసేందుకు ఎవరూ ముందుకు రావడం లేదు. తాము లేవనెత్తిన సమస్యలను పరిష్కరిస్తేనే టెండర్లు వేస్తామని, లేదంటే ఇక అంతేనని అద్దెబస్సుల సంఘం రాష్ట్ర ప్రధాన కార్యదర్శి మహిపాల్‌రెడ్డి, ఇతర ప్రతినిధులు తేల్చి చెప్పారు. టెండర్ల దాఖలుకు జనవరి 3 గడువు కాగా, అదే రోజు మధ్యాహ్నం తర్వాత టెండర్లు తెరుస్తారు. మరోవైపు, గురువారం ఆర్టీసీ అధికారులు నిర్వహించిన ప్రీబిడ్డింగ్‌ సమావేశంలో ప్రధానంగా అద్దెబస్సుల కేఎంపీఎల్‌ అంశంపై చర్చించారు. ప్రస్తుతం కేఎంపీఎల్‌ 4.5-4.6గా ఉండగా నగరంలో దానిని 4కు తగ్గించాలన్న డిమాండ్‌ ఉంది. అయితే, ఇది సాధ్యంకాదని చెప్తున్న ఆర్టీసీ గ్రేటర్‌ జోన్‌ అధికారులు అద్దెబస్సుల సంఘం ప్రతినిధులు లేవనెత్తిన సమస్యలను ఉన్నతాధికారుల దృష్టికి తీసుకెళ్తామని తెలిపారు.

320 కొత్త బస్సులు

మహాలక్ష్మి పథకం కారణంగా మహిళా ప్రయాణికుల సంఖ్య పెరుగుతుండడంతో మరో 320 వరకు కొత్త బస్సులు తీసుకురావాలని ఆర్టీసీ భావిస్తున్నది. నిరుడు 560 వరకు విద్యుత్తు బస్సులకు టెండర్లు పిలిచినా వాటి సంగతి ఏంటన్న విషయంలో స్పష్టత లేదు. తాజాగా 340 అద్దెబస్సులకు టెండర్లు పిలిచినా తమ సమస్యలు పరిష్కరించకుంటే టెండర్లు వేయబోమని అద్దెబస్సుల యజమాన్యాలు తెగేసి చెప్తున్నాయి. ఈ నేపథ్యంలో కొత్తగా సమకూర్చుకోవాలనుకుంటున్న 320 బస్సులను ఆర్టీసీ సొంతంగా కొనుగోలు చేస్తుందా? లేదా? అన్న విషయంలో స్పష్టత లేదు. మరోవైపు, నగర అవసరాల కోసం సంక్రాంతి నాటికి 200 డీజిల్‌ బస్సులు ఏర్పాటు చేస్తామని ఆర్టీసీ అధికారులు ఇప్పటికే వెల్లడించారు.

డిమాండ్లు ఇవీ

• ప్రతి బస్సులో గరిష్ఠంగా 40 మంది మాత్రమే ప్రయాణించే అవకాశం ఉండగా మహాలక్ష్మి పథకం తర్వాత 100 నుంచి 120 మంది వరకు ప్రయాణిస్తున్నారు. ఇది బస్సు కండిషన్‌పై ప్రభావం చూపుతున్నది. కాబట్టి డ్రైవర్‌, కండిషన్‌, డీజిల్‌ నిర్వహణ వంటి వాటి గురించి ప్రభుత్వం పట్టించుకోవాలి.
• ఎక్స్‌ప్రెస్‌, పల్లెవెలుగు బస్సులకు కేఎంపీఎల్‌ 4.5గా, సిటీ బస్సులకు 4గా ఉండాలి.
• అద్దెబస్సు డ్రైవర్లు, ఇతర సిబ్బందికి ప్రతినెల 10న బిల్లులు చెల్లించాలి.
• సీటింగ్‌ సామర్థ్యాన్ని బట్టి కాకుండా ప్రయాణికుల ఆధారంగా ఇన్సూరెన్స్‌ ఇవ్వాలి.