Employee Transfers | మేలో ఉద్యోగుల సాధారణ బదిలీలు.. పచ్చ జెండా ఊపిన ప్రభుత్వం

Employee Transfers | రాష్ట్రంలోని ఉద్యోగుల బదిలీలపై సర్కారు నిషేధాన్ని ఎత్తేసి, సాధారణ బదిలీలకు గ్రీన్‌ సిగ్నల్‌ నిచ్చింది. ఈ మేరకు ఆర్థికశాఖ మంగళవారం జీవో 38ని జారీ చేసింది. ఒకే చోట నాలుగేండ్ల సర్వీసు పూర్తి చేసిన వారిని తప్పనిసరిగా బదిలీ చేస్తారు.

Employee Transfers | హైదరాబాద్‌, ఏప్రిల్‌ 21 (నమస్తే తెలంగాణ) : రాష్ట్రంలోని ఉద్యోగుల బదిలీలపై సర్కారు నిషేధాన్ని ఎత్తేసి, సాధారణ బదిలీలకు గ్రీన్‌ సిగ్నల్‌ నిచ్చింది. ఈ మేరకు ఆర్థికశాఖ మంగళవారం జీవో 38ని జారీ చేసింది. ఒకే చోట నాలుగేండ్ల సర్వీసు పూరి ్తచేసిన వారిని తప్పనిసరిగా బదిలీ చేస్తారు. ఏ క్యాడర్‌లోనైనా 40 శాతంలోపు ఉద్యోగులను మాత్రమే బదిలీ చేస్తారు. అంతకంటే ఎక్కువ మందిని బదిలీ చేయరు. మూడేండ్ల సర్వీసు పూర్తి చేసుకున్నవారు సైతం బదిలీలకు దరఖాస్తు చేసుకోవచ్చు. 2027 మే 31లోపు ఉద్యోగ విరమణ పొందేవారిని బదిలీ నుంచి మినహాయింపునిచ్చారు. వీరు బదిలీ కోసం దరఖాస్తు చేసుకుంటే అవకాశం కల్పిస్తారు.

ఏడాది తర్వాత..

ఉద్యోగుల సాధారణ బదిలీలు ఏటా చేపట్టాలని ఉద్యోగ సంఘాలు కోరుతున్నాయి. 2024లో బదిలీలు చేపట్టగా, గ్రామ పంచాయతీ ఎలక్షన్స్‌ నేపథ్యంలో 2025లో బదిలీలు చేపట్టలేదు. ఏడాది తర్వాత మళ్లీ అవకాశం కల్పించారు. జనాభా గణన కోసం నియమించిన ఉద్యోగులకు బదిలీల నుంచి మినహాయింపు ఇచ్చారు. స్టేట్‌ క్యాడర్‌, మల్టీ జోన్‌, జోన్‌, జిల్లా క్యాడర్‌ ఉద్యోగుల బదిలీలు చేపట్టేందుకు ముగ్గురితో కమిటీ ఏర్పాటవుతుంది. మొత్తం ప్రక్రియ మే 31లోపు పూర్తి కానుండగా, జూన్‌ 1 నుంచి బదిలీలపై నిషేధం అమల్లో ఉంటుందని ప్రభుత్వం వెల్లడించింది. విద్యాశాఖ పరిధిలోని టీచర్లు, లెక్చరర్ల బదిలీలకు ప్రత్యేక మార్గదర్శకాలను రూపొందిస్తాయి. పోలీస్‌ శాఖకు సైతం ప్రత్యేక మార్గదర్శకాలను రూపొందించాలని సర్కార్‌ స్పష్టం చేసింది.

షెడ్యూల్‌ ఇలా..

• మే 1 నుంచి 7 వరకు సంబంధిత శాఖలు యూనియన్లు, సంఘాలతో సంప్రదించి కార్యాచరణను ఖరారు చేసి ఖాళీలను తేల్చాలి. తప్పనిసరిగా బదిలీలు కావాల్సిన ఉద్యోగుల జాబితాను రూపొందించాలి.
• మే 8 నుంచి 15 వరకు బదిలీల కోసం ఉద్యోగుల నుంచి దరఖాస్తు తీసుకోవాలి. బదిలీ కోసం ఆప్షన్లు సమర్పించాలి.
• మే 16 నుంచి 24 వరకు దరఖాస్తుల పరిశీలన, కౌన్సెలింగ్‌, అర్హులైన వారి జాబితా సిద్ధం చేయాలి.
• మే 25 నుంచి 31 వరకు బదిలీ ఉత్తర్వులు జారీ చేయాలి. ఉత్తర్వులు అందిన మూడు రోజుల్లో రిలీవ్‌ కావాలి. లేదంటే రిలీవ్‌ అయినట్లుగానే పరిగణిస్తారు.