తీరని రుణం.. రైతుల రణం

ఆదిలాబాద్‌ నుంచి జోగులాంబ జిల్లా దాకా సంగారెడ్డి నుంచి కొత్తగూడెం జిల్లా దాకా రైతన్నల నిరసనలతో తెలంగాణ దద్దరిల్లింది. రేవంత్‌ రుణ మోసంపై రణభేరి మోగించింది.

• పంద్రాగస్టులోపు పూర్తికాని రుణమాఫీ..
• అప్పులున్న రైతుల సంఖ్య 70 లక్షలు 
• రుణమాఫీ అయింది 22 లక్షల మందికే..
• 2 లక్షలకుపైగా ఉంటే మొండిచెయ్యే
• అర్హులని సర్కారే తేల్చిన 32.5 లక్షల మందిలోనూ 10 లక్షల మంది రైతులకు కోత
• మోదీ సర్కారు తెచ్చిన పీఎం కిసాన్‌ నిబంధనలను వాడుకున్న రేవంత్‌ ప్రభుత్వం
• ఒట్టుతీసి గట్టుమీద పెట్టి.. రుణమాఫీని ఎగ్గొట్టి..

హైదరాబాద్‌, ఆగస్టు 17 (నమస్తే తెలంగా ణ):  ఆదిలాబాద్‌ నుంచి జోగులాంబ జిల్లా దాకా సంగారెడ్డి నుంచి కొత్తగూడెం జిల్లా దాకా రైతన్నల నిరసనలతో తెలంగాణ దద్దరిల్లింది. రేవంత్‌ రుణ మోసంపై రణభేరి మోగించింది. పోయిన ప్రతి జిల్లాలో అక్కడి గుడిలోని దేవుడిపై ఒట్టేసి మరీ చెప్పిన మాఫీని గట్టున పెట్టిన ముఖ్యమంత్రి తీరుపై రైతులోకం భగ్గుమన్నది. ఒకే దఫాలో చేస్తానన్న రుణమాఫీని మూడు దశల కిందికి మార్చినా, ఇవాళ కాకపోతే రేపైనా అవుతుందని పంద్రాగస్టు దాకా ఓపికగా వేచిచూసిన అన్నదాతలు.. ఇది మాఫీ కాదు, మోసమని గుర్తించి ఒక్కసారిగా రోడ్డెక్కారు. ఎక్కడికక్కడ, ఎవరికి వారుగా ముందుకు కదిలా రు. శవయాత్రలు, దిష్టిబొమ్మల దహనాలు, ధర్నాలు, అధికారుల నిలదీతలు, ఆత్మహత్యాయత్నాలు, రాస్తారోకోలు ఇలా ఎవరికి తోచిన రూపంలో వారు ఆగ్రహం వ్యక్తం చేశారు.

రేవంత్‌ సర్కారు చేసిన పాపం చివరికి బ్యాంకుల మెడకు చుట్టుకున్నది. అనేక చోట్ల రైతులు బ్యాంకుల్లోకి చొరబడి మాకెందుకు రుణమాఫీ కాలేదంటూ బ్యాంకర్లను నిలదీశారు. అసలేం జరిగిందో, ఏ ప్రాతిపదికన మాఫీ చేశారో తెలియని బ్యాంకర్లు జవాబు చెప్పలేక, రైతుల్ని ఏమీ అనలేక ఆపసోపాలు పడ్డారు. అనేక చోట్ల రైతులు గతంలో కేసీఆర్‌ ప్రభుత్వం చేసిన రుణమాఫీతో ప్రస్తుత పరిస్థితిని పోల్చి మాట్లాడుకున్నారు. ఎవరు, ఏ రైతు, ఎప్పుడు, ఎంత పంట రుణం తీసుకున్నాడన్న వివరాలన్నీ బ్యాంకుల వద్ద సిద్ధంగా ఉండగా రేవంత్‌ ప్రభుత్వం ఇప్పటికీ సమాచారం సేకరిస్తున్నాం అంటూ సాకులు చెప్తున్నదని వారు ధ్వజమెత్తారు. ఒట్టుదీసి గట్టుమీద పెట్టి మాఫీని ఎగ్గొట్టడమే సీఎం రేవంత్‌ పని అంటూ తిట్టుకోవడం వినిపించింది.

రుణమాఫీ సిత్రాలు

• కరీంనగర్‌ జిల్లా సహకార కేంద్ర బ్యాంకు పరిధిలోని 130 సంఘాలకు చెందిన 96,338 మంది రైతులకు రుణమాఫీ కాగా ఇంకా 36,543 మందికి రూ.421.70 కోట్ల మాఫీ కావాల్సి ఉన్నది.
• కరీంనగర్‌ జిల్లా శంకరపట్నం మండలం మొలంగూర్‌ ఇండియన్‌ బ్యాంకులో 1,400 మంది రైతులకు 311 మందికే రుణమాఫీ అయింది.
• జగిత్యాల జిల్లా మెట్‌పల్లి మండలం వేంపేట కెనరా బ్యాంకులో 2వేల మంది రైతులకు 1,021 మందికే మాఫీ అయింది.
• కరీంనగర్‌ జిల్లా కొత్తపల్లి మండలం బావుపేట ఇండియన్‌ బ్యాంకులో 1,280 మంది రైతులకు 432 మందికే రుణమాఫీ అయింది.
• జగిత్యాల జిల్లా కోరుట్ల మండలం పైడి మడుగు ఇండియన్‌ బ్యాంకులో 1,308 మంది రైతులకు 173 మందికే రుణమాఫీ జరిగింది.
• దుండిగల్‌ బ్యాంక్‌లో 632 మందికి కేవలం 14 మంది రైతులకు చెందిన రూ.4.30 లక్షలనే ప్రభుత్వం మాఫీ చేసింది.

లెక్క తప్పిందిలా..

• రూ.49,500 కోట్లు ఎస్‌ఎల్‌బీసీ లెక్క ప్రకారం మాఫీకి అర్హులైన రైతుల రుణాల మొత్తం
• రూ.40,000 కోట్లు కాంగ్రెస్‌ ముఖ్యమంత్రి రేవంత్‌రెడ్డి తొలుత అవసరం అన్న నిధులు
• రూ.31,000 కోట్లు ఆ తర్వాత మాఫీ కోసం క్యాబినెట్‌లో ఫైనల్‌ చేసిన నిధులు
• రూ.26,000 కోట్లు రుణమాఫీకి బడ్జెట్‌లో పెట్టిన నిధులు
• రూ.17,933 కోట్లు చివరికి రుణమాఫీకి వాడిన నిధులు

2014 కంటే 2024 నాటికి

• తెలంగాణలో రైతుల సంఖ్య భారీగా (45లక్షల నుంచి 70 లక్షలకు) పెరిగింది. సాగు విస్తీర్ణం (1.31 కోట్ల ఎకరాల నుంచి 2.38 కోట్ల ఎకరాలకు పెరిగింది.
• రైతులు తీసుకున్న పంట రుణాల మొత్తం 33 వేల కోట్ల నుంచి 65 వేల కోట్ల రూపాయలకు పెరిగింది.
• అప్పుడు లక్ష రుణమాఫీకే 36.68 లక్షల మంది అర్హులయ్యారు. రూ.19,198 కోట్లు ఖర్చు అయ్యాయి.
• మరిప్పుడు 2 లక్షల రుణమాఫీకి అంతకంటే తక్కువ మందే ఎలా అర్హులవుతారు? అంతకంటే తక్కువ మొత్తం ఎలా సరిపోతుంది?