Visit:
హైదరాబాద్, డిసెంబర్ 13 (నమస్తే తెలంగాణ)/సిరిసిల్ల టౌన్: సిరిసిల్లకు చెందిన చేనేత కళాకారుడు నల్ల విజయ్కుమార్ క్యూఆర్ కోడ్తో వినూత్నమైన శాలువా రూపొందించారు. కోడ్పై క్లిక్ చేస్తే.. తెలంగాణలోని ప్రముఖ దేవాలయాలు, చారిత్రక కట్టడాలు, సంప్రదాయాలు, కేసీఆర్ హయాంలో అమలు చేసిన పథకాలు, మిషన్ భగీరథ, కాళేశ్వరం గొప్పతనం వీక్షించేలా తయారు చేశారు. ఈ శాలువాను బీఆర్ఎస్ వర్కింగ్ ప్రెసిడెంట్ కేటీఆర్ బంజారాహిల్స్ నందినగర్లోని తన నివాసంలో శనివారం ఆవిష్కరించారు. ‘పోగు బంధంతో ఫోన్ బంధం’ అనే కాన్సెప్ట్తో 15 రోజుల వ్యవధిలోనే అద్భుతమైన శాలువాను తయారు చేసిన విజయ్కుమార్ను అభినందించారు. కార్యక్రమంలో ఎంపీ వద్దిరాజు రవిచంద్ర, బీఆర్ఎస్ నేతలు రావుల చంద్రశేఖర్రెడ్డి, జాన్సన్ నాయక్ తదితరులు పాల్గొన్నారు.
కేసీఆర్ చేసిన అభివృద్ధిని చాటిచెప్పేందుకే
క్యూఆర్ కోడ్ శాలువా ఆవిష్కరణ సందర్భంగా నల్ల విజయ్కుమార్ మాట్లాడుతూ ‘మా నాన్న గతంలో అగ్గిపెట్టెలో ఇమిడే చీరను తయారు చేశారు. ఆయనే నాకు స్ఫూర్తి. నేను గతంలో రంగులు మారే చీరను, అగ్గిపెట్టెలో పట్టే చీరను తయారు చేసినప్పుడు, అప్పటి ముఖ్యమంత్రి కేసీఆర్ చేతుల మీదుగా ఉగాది పురస్కారం అందుకున్నాను. అది నా అదృష్టంగా భావిస్తున్నాను. తెలంగాణకు కేసీఆర్ చేసిన అభివృద్ధిని, మన వారసత్వ సంపదను పది మందికి తెలియజేయాలనే ఆలోచనతోనే క్యూఆర్ కోడ్ శాలువాను రూపొందించాను. సిరిసిల్ల ఎప్పుడూ కొత్త ఆవిష్కరణలకు అడ్డా అని నిరూపించడమే నా లక్ష్యం. నేతన్నకు కేటీఆర్ ఎల్లప్పుడూ అండగా ఉంటూ ప్రోత్సహిస్తున్నారు. భవిష్యత్తులో మరిన్ని అద్భుతాలు సృష్టిస్తాను’ అని తెలిపారు.
