మరోసారి ఐపీఎస్‌ల బదిలీలు

తెలంగాణ ఐపీఎస్‌ బదిలీల్లో రాజకీయ జోక్యం పెరుగుతున్నదా? వరంగల్‌ కమిషనర్‌గా ఎవరు వచ్చినా.. ఏడాదిన్నర లోపే మరో స్థానానికి బదిలీ కావాల్సిందేనా? అంటే అవుననే అంటున్నాయి పోలీసు వర్గాలు.

• ముక్కుసూటిగా వ్యవహరించిన వారిపై బదిలీవేటు
• బదిలీల్లో రాజకీయ జోక్యం?

హైదరాబాద్‌, జూన్‌ 29 (నమస్తే తెలంగాణ): తెలంగాణ ఐపీఎస్‌ బదిలీల్లో రాజకీయ జోక్యం పెరుగుతున్నదా? వరంగల్‌ కమిషనర్‌గా ఎవరు వచ్చినా.. ఏడాదిన్నర లోపే మరో స్థానానికి బదిలీ కావాల్సిందేనా? అంటే అవుననే అంటున్నాయి పోలీసు వర్గాలు. రాష్ట్రంలో సోమవారం 12 మంది ఐపీఎస్‌ అధికారులను బదిలీ చేసిన ప్రభుత్వం కొందరికి అదనపు బాధ్యతలు అప్పగించింది. కాగా ఈ బదిలీల్లో సైతం రాజకీయ కోణమే ఎక్కువగా ఉందని అంటున్నారు. సూర్యాపేట ఎస్పీగా ఉన్న సన్‌ప్రీత్‌సింగ్‌ను 2025 మార్చిలో వరంగల్‌ సీపీగా పంపారు. అప్పటికే అక్కడ సీపీగా ఉన్న అంబర్‌కిషోర్‌ ఝా రామగుండం బదిలీ అయ్యారు.

ముక్కుసూటిగా వ్యవహరిస్తూ.. తన మార్క్‌ పోలీసు పాలన అందిస్తూ.. వరంగల్‌ సీపీగా ఉన్న సన్‌ప్రీత్‌సింగ్‌ను ప్రస్తుతం సైబరాబాద్‌ ట్రాఫిక్‌ జాయింట్‌ సీపీగా నియమించారు. అలాగే 2025 ఐపీఎస్‌ బదిలీల్లో సంగారెడ్డి ఎస్పీగా ఉన్న చెన్నూరి రూపేశ్‌ను నార్కోటిక్‌ బ్యూరో ఎస్పీగా నియమించారు. ఆ తర్వాత 2026లో హైదరాబాద్‌ డిప్యూటీ కమిషనర్‌ (ఎస్‌ఎం అండ్‌ ఐటీ)గా నియమించారు. ఆ తర్వాత ఇప్పుడు సీఐడీ ఎస్పీగా బదిలీచేశారు. ఒక్కొక్కరికి ఒక్కో శాఖపై పూర్తిస్థాయిలో అవగాహన రాకుండానే ఐపీఎస్‌ల బదిలీలు జరుగుతుండటం పోలీసుశాఖలో ప్రస్తుతం చర్చనీయాంశంగా మారింది.

వీరికి అదనపు బాధ్యతలు

• రామగుండం పోలీసు కమిషనర్‌ అంబర్‌కిషోర్‌ ఝాకు ప్రస్తుతమున్న బాధ్యతలతోపాటు డీఐజీ, జోన్‌-1 (కాళేశ్వరం) అదనపు బాధ్యతలు అప్పగించారు.
• హైదరాబాద్‌ ట్రాఫిక్‌ జాయింట్‌ కమిషనర్‌ డాక్టర్‌ జోయెల్‌ డేవిస్‌కు డీఐజీ, జోన్‌-5 (యాదాద్రి) అదనపు బాధ్యతలు కేటాయించారు.

బదిలీలు పొందిన ఐపీఎస్‌లు వీళ్లే..

• వరంగల్‌ పోలీసు కమిషనర్‌ సన్‌ప్రీత్‌సింగ్‌ను సైబరాబాద్‌ ట్రాఫిక్‌ జాయింట్‌ కమిషనర్‌గా బదిలీ చేయడంతోపాటు డీఐజీ, జోన్‌-3 (రాజన్న సిరిసిల్ల) అదనపు బాధ్యతలు అప్పగించారు.
• హైదరాబాద్‌ ఉత్తర మండలం (లా అండ్‌ ఆర్డర్‌) జాయింట్‌ కమిషనర్‌ ఎం శ్వేతను వరంగల్‌ పోలీసు కమిషనర్‌గా నియమించి, అదనంగా డీఐజీ, జోన్‌-4 (భద్రాద్రి) బాధ్యతలు అప్పగించారు.
• ఇంటెలిజెన్స్‌ విభాగం డీఐజీ (సీఐ) ఆర్‌ భాసరన్‌ డీఐజీకి జోన్‌-2 (బాసర) అదనపు బాధ్యతలు కేటాయించారు.
• హైదరాబాద్‌ స్పెషల్‌ బ్రాంచ్‌ జాయింట్‌ కమిషనర్‌ ఎస్‌ఎం విజయ్‌కుమార్‌కు హైదరాబాద్‌ ఉత్తర మండలం లా అండ్‌ ఆర్డర్‌ జాయింట్‌ కమిషనర్‌గా అదనపు బాధ్యతలు అప్పగించారు.
• ఏసీబీ జాయింట్‌ డైరెక్టర్‌ సింధుశర్మను సీఐ సెల్‌, ఇంటెలిజెన్స్‌ ఎస్పీగా బదిలీ చేసి, అదనంగా ఎస్‌ఐబీ ఎస్పీగా బాధ్యతలు అప్పగించారు.
• వై సాయిశేఖర్‌ను సికింద్రాబాద్‌ రైల్వే ఎస్పీగా నియమించారు.
• హైదరాబాద్‌ ఎస్‌ఎం అండ్‌ ఐటీ డీసీపీ చెన్నూరి రూపేశ్‌ను సీఐడీ ఎస్పీగా బదిలీ చేశారు.
• ఏసీబీ జాయింట్‌ డైరెక్టర్‌ సీ ప్రవీణ్‌కుమార్‌ను సీఐడీ ఎస్పీగా నియమించారు.
• పోస్టింగ్‌ కోసం ఎదురుచూస్తున్న ఆర్‌ వెంకటేశ్వర్లును సీఏఆర్‌ హెడ్‌క్వార్టర్స్‌, హైదరాబాద్‌ డీసీపీగా నియమించారు.
• రాజేశ్‌ మీనాను వనపర్తి నుంచి బదిలీ చేసి వికారాబాద్‌ అదనపు ఎస్పీ (అడ్మిన్‌)గా నియమించారు.