Vijay | తెలుగు కంటే హిందీలోనే జోరు.. ‘జన నాయగన్’కు ఊహించని మార్కెట్

Vijay | తమిళ్ స్టార్ హీరో, తమిళనాడు ముఖ్యమంత్రి దళపతి విజయ్ నటించిన చివరి చిత్రం 'జన నాయగన్' బాక్సాఫీస్ వద్ద ఆసక్తికరమైన ట్రెండ్‌ను నమోదు చేస్తోంది. హెచ్. వినోద్ దర్శకత్వంలో తెరకెక్కిన ఈ పొలిటికల్ యాక్షన్ ఎంటర్‌టైనర్‌పై విడుదలకు ముందు భారీ అంచనాలు నెలకొన్నాయి. అయితే విడుదల తర్వాత సినిమాకు మిశ్రమ స్పందన రావడంతో వసూళ్లపై ప్రభావం కనిపించినా, కొన్ని ప్రాంతాల్లో మాత్రం ఊహించని విధంగా మంచి ఆదరణ లభిస్తోంది

Vijay | తమిళ్ స్టార్ హీరో, తమిళనాడు ముఖ్యమంత్రి దళపతి విజయ్ నటించిన చివరి చిత్రం ‘జన నాయగన్’ బాక్సాఫీస్ వద్ద ఆసక్తికరమైన ట్రెండ్‌ను నమోదు చేస్తోంది. హెచ్. వినోద్ దర్శకత్వంలో తెరకెక్కిన ఈ పొలిటికల్ యాక్షన్ ఎంటర్‌టైనర్‌పై విడుదలకు ముందు భారీ అంచనాలు నెలకొన్నాయి. అయితే విడుదల తర్వాత సినిమాకు మిశ్రమ స్పందన రావడంతో వసూళ్లపై ప్రభావం కనిపించినా, కొన్ని ప్రాంతాల్లో మాత్రం ఊహించని విధంగా మంచి ఆదరణ లభిస్తోంది. తెలుగు రాష్ట్రాల్లో విజయ్‌కు మంచి అభిమాన వర్గం ఉన్నప్పటికీ, ‘జన నాయగన్’కు ఆశించిన స్థాయిలో ఓపెనింగ్స్ రాలేదు. ముఖ్యంగా ప్రమోషన్లు పరిమితంగా ఉండటం, విడుదల సమయంలో ఇతర చిత్రాల పోటీ ఉండటం కూడా ప్రభావం చూపినట్లు ట్రేడ్ వర్గాలు భావిస్తున్నాయి. దీంతో తెలుగు వెర్షన్‌కు ప్రేక్షకుల స్పందన కొంత తగ్గినట్లు కనిపిస్తోంది.

అయితే ఈ సినిమా విషయంలో అందరినీ ఆశ్చర్యపరుస్తున్న అంశం హిందీ మార్కెట్. గత 24 గంటల్లో ప్రముఖ టికెటింగ్ ప్లాట్‌ఫామ్ బుక్‌మైషోలో నమోదైన బుకింగ్స్ ప్రకారం, తెలుగు వెర్షన్‌కు సుమారు 28 వేల టికెట్లు అమ్ముడవగా, హిందీ వెర్షన్‌కు 33 వేల టికెట్లు విక్రయమైనట్లు తెలుస్తోంది. తెలుగు కంటే హిందీలో ఎక్కువ బుకింగ్స్ నమోదవడం ఇప్పుడు సినీ వర్గాల్లో చర్చనీయాంశంగా మారింది. ఇటీవలి కాలంలో దక్షిణాది హీరోలకు ఉత్తరాదిలో ఆదరణ పెరుగుతోంది. అదే తరహాలో విజయ్‌కు కూడా హిందీ ప్రేక్షకుల్లో మంచి గుర్తింపు లభిస్తున్నట్లు ఈ బుకింగ్ ట్రెండ్ సూచిస్తోంది. ముఖ్యంగా డబ్బింగ్ వెర్షన్ల ద్వారా విజయ్ సినిమాలకు ఉత్తర భారతదేశంలో ప్రేక్షకాదరణ పెరుగుతుండటం భవిష్యత్తులో ఆయన మార్కెట్‌ను మరింత విస్తరించే అవకాశాలు ఉన్నాయని ట్రేడ్ విశ్లేషకులు అభిప్రాయపడుతున్నారు.

‘జన నాయగన్’ చిత్రానికి స్టార్ సంగీత దర్శకుడు అనిరుధ్ రవిచందర్ సంగీతం అందించారు. ఆయన బ్యాక్‌గ్రౌండ్ స్కోర్, పాటలు సినిమాకు ప్రధాన ఆకర్షణగా నిలిచాయి. భారీ నిర్మాణ విలువలతో కేవీఎన్ ప్రొడక్షన్స్ ఈ చిత్రాన్ని నిర్మించింది. విజయ్‌తో పాటు పూజా హెగ్డే, బాబీ డియోల్, ప్రకాష్ రాజ్, ప్రియమణి తదితరులు కీలక పాత్రలు పోషించారు. అయితే మొదటి వారాంతం తర్వాత ‘జన నాయగన్’ బాక్సాఫీస్ ప్రయాణం ఎలా కొనసాగుతుందనేది ఆసక్తికరంగా మారింది. మిశ్రమ స్పందన ఉన్నప్పటికీ హిందీ మార్కెట్‌లో పెరుగుతున్న ఆదరణ సినిమాకు అదనపు బలం చేకూర్చే అవకాశం ఉందని ట్రేడ్ వర్గాలు భావిస్తున్నాయి. విజయ్ సినీ కెరీర్‌కు ముగింపు పలికిన ఈ చిత్రం, థియేట్రికల్ రన్ పూర్తయ్యే నాటికి ఏ స్థాయి వసూళ్లు నమోదు చేస్తుందో చూడాల్సి ఉంది.