Congress Govt | తెరమీదికి రోజుకో కొత్త అంశం.. ప్రభుత్వం డైవర్షన్‌ డ్రామా

రాష్ట్రంలో రోజుకో కొత్త అంశాన్ని తెరమీదికి తెచ్చి ప్రజల దృష్టిని మళ్లించేందుకు రాష్ట్ర ప్రభుత్వం ప్రయత్నిస్తున్నదని రాజకీయ విశ్లేషకులు అభిప్రాయపడుతున్నారు. ఇందుకు పలు ఉదాహరణలు కూడా ప్రత్యేకంగా చూపిస్తున్నారు.

• ప్రజల దృష్టి మళ్లించేందుకేనంటూ విశ్లేషకుల విమర్శలు

Congress Govt | హైదరాబాద్‌, డిసెంబర్‌ 21 (నమస్తే తెలంగాణ): రాష్ట్రంలో రోజుకో కొత్త అంశాన్ని తెరమీదికి తెచ్చి ప్రజల దృష్టిని మళ్లించేందుకు రాష్ట్ర ప్రభుత్వం ప్రయత్నిస్తున్నదని రాజకీయ విశ్లేషకులు అభిప్రాయపడుతున్నారు. ఇందుకు పలు ఉదాహరణలు కూడా ప్రత్యేకంగా చూపిస్తున్నారు.

• ఎన్నికలకు ముందు, అధికారంలోకి వచ్చిన తర్వాత సీఎం రేవంత్‌ రెడ్డి, కాంగ్రెస్‌ నేతలు బీఆర్‌ఎస్‌ హయాం లో చేసిన అప్పులపై దుష్ప్రచారం చేశారు. కానీ ఏడాది కాలంగా తాము చేసిన అప్పులపై మాత్రం ఎక్కడా నోరు మెదపలేదు. తాజాగా తాము చేసిన అప్పు రూ. 1.27 లక్షల కోట్లుగా గురువారం ఒప్పుకున్నారు. దీని నుంచి ప్రజల దృష్టిని మరల్చేందుకు ఫార్ములా-ఈ కేసును తెరపైకి తెచ్చినట్టుగా విమర్శిస్తున్నారు. ఆ తర్వాత ఓఆర్‌ఆర్‌ టెండర్లలో అక్రమాలంటూ విచారణ పేరిట హడావుడి మొదలుపెట్టారు.
• భూ భారతి బిల్లులో లోపాలను బీఆర్‌ఎస్‌ ఎత్తి చూపింది. దీనిపై ప్రజల్లో చర్చ మొదలయ్యేసరికి అంశాన్ని పక్కదారి పట్టించేందుకు ‘ఫోరెన్సిక్‌ ఆడిట్‌’ను తెరమీదికి తెచ్చిందని, ప్రభుత్వ భూములు కబ్జా చేశారంటూ హడావుడి మొదలుపెట్టిందని రాజకీయ విశ్లేషకులు చెబుతున్నారు.
• శనివారం రైతుభరోసా ఇష్యూ తెరపైకి వచ్చేసరికి మరోసారి డైవర్షన్‌ డ్రామా మొదలు పెట్టిందని చెబుతున్నారు. ఈ అంశాన్ని పక్కదారి పట్టించేందుకు సందర్భం లేకపోయినా మరోసారి సినీ హీరో అల్లు అర్జున్‌ అంశాన్ని తెరపైకి తెచ్చిందని విమర్శిస్తున్నారు. ఇలా ప్రభుత్వంపై విమర్శలు వచ్చినప్పుడల్లా డైవర్షన్‌ ఇష్యూలను తెరపైకి తెస్తున్నదని మండిపడుతున్నారు.