నేడు ఎస్సై ప్రిలిమ్స్‌ పరీక్ష

రాష్ట్రవ్యాప్తంగా 554 ఎస్సై పోస్టుల భర్తీకి ఆదివారం ప్రాథమిక రాత పరీక్ష నిర్వహించనున్నారు. ఇందుకు తెలంగాణ రాష్ట్రస్థాయి పోలీస్‌ నియామక మండలి (టీఎస్‌ఎల్పీఆర్బీ), పోలీస్‌శాఖ సాంకేతికంగా పకడ్బందీ ఏర్పాట్లు చేశాయి. ఉదయం 10 నుంచి ఒంటి గంట వరకు హైదరాబాద్‌, చుట్టపక్కల ప్రాంతాల్లో కలిపి 503 పరీక్ష కేంద్రాలు, వీటికి అదనంగా 35 పట్టణాల్లోనూ పరీక్ష జరుగనున్నది

• సాంకేతికంగా పకడ్బందీ ఏర్పాట్లు
• నిమిషం ఆలస్యమైనా అనుమతించరు
• హాల్‌టికెట్‌పై అభ్యర్థి ఫొటో తప్పనిసరి
• టీఎస్‌ఎల్పీఆర్బీ, పోలీస్‌శాఖ వెల్లడి

హైదరాబాద్‌, ఆగస్టు 6 (నమస్తే తెలంగాణ): రాష్ట్రవ్యాప్తంగా 554 ఎస్సై పోస్టుల భర్తీకి ఆదివారం ప్రాథమిక రాత పరీక్ష నిర్వహించనున్నారు. ఇందుకు తెలంగాణ రాష్ట్రస్థాయి పోలీస్‌ నియామక మండలి (టీఎస్‌ఎల్పీఆర్బీ), పోలీస్‌శాఖ సాంకేతికంగా పకడ్బందీ ఏర్పాట్లు చేశాయి. ఉదయం 10 నుంచి ఒంటి గంట వరకు హైదరాబాద్‌, చుట్టపక్కల ప్రాంతాల్లో కలిపి 503 పరీక్ష కేంద్రాలు, వీటికి అదనంగా 35 పట్టణాల్లోనూ పరీక్ష జరుగనున్నది.

పరీక్షకు దరఖాస్తు చేసుకొన్న అభ్యర్థి మాత్రమే కేంద్రంలో అడుగుపెట్టేలా బయోమెట్రిక్‌ విధానంలో హాజరు తీసుకోనున్నారు. ప్రవేశ ద్వారం సహా మొత్తం పరిసరాలు సీసీటీవీ కెమెరాలతో చిత్రీకరించేలా ఏర్పాట్లు చేశారు. ఆయా జిల్లాల పరిధిలో ఎస్పీలు, పోలీస్‌ కమిషనర్లు స్వయంగా పరీక్ష ఏర్పాట్లను పర్యవేక్షిస్తున్నారు. అవసరం మేరకు సీనియర్‌ అధికారులకు విధులను కేటాయించారు.

హాల్‌టికెట్‌పై ఫొటో లేదంటే అనుమతి ఉండదు

• పరీక్షకు హాజరయ్యే అభ్యర్థులు తాము డౌన్‌లోడ్‌ చేసుకున్న హాల్‌టికెట్‌పై తప్పకుండా పాస్‌పోర్ట్‌ సైజు ఫొటో అంటించుకొని రావాలి. లేదంటే పరీక్ష కేంద్రంలోకి అనుమతించరు. ఆ ఫొటో ఆన్‌లైన్‌లో దరఖాస్తు చేసిన సమయంలో అప్‌లోడ్‌ చేసినదై మాత్రమే ఉండాలి.
• పరీక్ష 200 ఆబ్జెక్టివ్‌ ప్రశ్నలకు 200 మార్కులు ఉంటాయి. ప్రతి తప్పు సమాధానానికి 0.20 మార్క్‌ కట్‌ అవుతుంది.
• కొవిడ్‌ నిబంధనలు పాటించాలి.
• పరీక్ష కేంద్రంలోకి హాల్‌టికెట్‌తోపాటు బ్లాక్‌ లేదా బ్లూ బాల్‌ పాయింట్‌ పెన్నులను అనుమతిస్తారు.
• పరీక్ష కేంద్రంలో బయోమెట్రిక్‌ విధానంలో హాజరు తీసుకుంటారు. అభ్యర్థులు చేతులకు మెహందీ, టెంపరరీ టాటూలు పెట్టుకోకూడదు.
• మొబైల్‌ ఫోన్లు, ట్యాబ్లెట్లు, పెన్‌డ్రైవ్‌లు, బ్లూటూత్‌ డివైజ్‌లు, రిస్ట్‌వాచ్‌లు, వాచ్‌ కాల్యుకులేటర్లు, వ్యాలెట్‌, విడి కాగితాలు పరీక్ష కేంద్రంలోకి అనుమతించరు.