ఆరబెడితేనే ‘ధర’హాసం!.. తడిధాన్యంతో చిక్కులే

Telangana | ‘నేను వడ్లను కొనుగోలు కేంద్రానికి తీసుకొచ్చి వారమైంది. ఇంతవరకు కాంట పెట్టలేదు’ ఇదీ రైతుల ఆరోపణ. ‘రైతులు నూర్పిళ్లు కాగానే వడ్లను నేరుగా కొనుగోలు కేంద్రానికి తీసుకొస్తున్నారు.

• ఎఫ్‌సీఐ నిబంధనల ప్రకారమే కొనుగోళ్లు

హైదరాబాద్‌, నవంబర్‌ 22(నమస్తే తెలంగాణ): ‘నేను వడ్లను కొనుగోలు కేంద్రానికి తీసుకొచ్చి వారమైంది. ఇంతవరకు కాంట పెట్టలేదు’ ఇదీ రైతుల ఆరోపణ. ‘రైతులు నూర్పిళ్లు కాగానే వడ్లను నేరుగా కొనుగోలు కేంద్రానికి తీసుకొస్తున్నారు. తేమ, తాలు ఎక్కువగా ఉంటున్నది. ఎఫ్‌సీఐ నిబంధనల ప్రకారం ఉంటేనే మేం కొనుగోలు చేయగలం లేదంటే తర్వాత మాకు సమస్య వస్తుంది’ ఇదీ కొనుగోలు కేంద్రాల నిర్వాహకుల సమాధానం. ప్రతి సీజన్‌లోనూ ధాన్యం కొనుగోళ్లలో ఈ సమస్య ఉత్పన్నమవుతుంటుంది. ధాన్యం కొనుగోళ్లపై అధికారులు రైతులకు అవగాహన కల్పిస్తున్నప్పటికీ సమస్య పరిష్కారం కావడం లేదు. ధాన్యం కొనుగోలు కేంద్రాల నిర్వాహకులు ఎఫ్‌సీఐ నిబంధనలు అమలుచేయాల్సి ఉంటుంది. లేదంటే ఆ నష్టాన్ని కొనుగోలు కేంద్రాల నిర్వహకులు లేదా మిల్లర్లు లేదా పౌరసరఫరాలశాఖ భరించాల్సి వస్తుంది.

ఆరబెట్టి, తూర్పారబట్టి తేవాలి

చాలామంది హార్వెస్టర్‌తో వరిని కోసి, వడ్లను ట్రాక్టర్లకు ఎత్తి నేరుగా కొనుగోలు కేంద్రాలకు తెస్తున్నారు. ఆరబెట్టని ఈ వడ్లలో తేమ శాతం అధికంగా ఉంటున్నది. తాలు, ఇతర వ్యర్థాలు ఉంటాయి. దీంతో ధాన్యం ఆరబోసి, తూర్పారబట్టాలని నిర్వాహకులు సూచిస్తున్నారు. అప్పటికే కొనుగోలు కేంద్రాలు ఇలాంటి ధాన్యంతో నిండిపోవడంతో వాటిని అక్కడ ఆరబోయడం సాధ్యం కాదు. కాబట్టి రైతులు పొలాల వద్దే ఆరబెట్టి, తూర్పారబట్టి తీసుకొస్తే వెంటనే కొనుగోలు చేస్తారు. ఆరబెట్టి, తూర్పారబోసిన, నాణ్యమైన ధాన్యాన్ని తీసుకొస్తేనే మద్దతు ధర లభించే అవకాశమున్నది. నిర్వాహకులు తక్కువ ధర ఇచ్చినా, ఎక్కువ తరుగు తీసినా నిలదీసే హక్కు రైతులకు ఉంటుంది.

ప్రభుత్వంపై నిందలేస్తే ఏం లాభం?

ధాన్యం కొనుగోళ్లకు నిబంధనలు పెట్టింది కేంద్ర ప్రభుత్వ ఆధీనంలోని ఎఫ్‌సీఐ. నిబంధనలకు విరుద్ధంగా ఉంటే తీసుకొనేందుకు నిరాకరించేది ఎఫ్‌సీఐ. ఈ విషయం తెలియని రైతులు రాష్ట్ర ప్రభుత్వాన్ని అపార్థం చేసుకుంటున్నారు. నాణ్యమైన ధాన్యం తీసుకొస్తే ఎలాంటి ఆలస్యం చేయకుండా కొనుగోలు చేస్తారు. నిబంధనలు పాటించకుండా ధాన్యం కొనడం లేదని ప్రభుత్వాన్ని విమర్శించడం వల్ల లాభం లేదు.

రైతులు పాటించాల్సిన జాగ్రత్తలు, సూచనలు

• రైతులు తమ ఫోన్‌ నంబర్‌ను ఆధార్‌తో అనుసంధానం చేసుకున్న తర్వాతే ధాన్యాన్ని కొనుగోలు కేంద్రానికి తీసుకురావాలి.
• కొనుగోలు కేంద్రంలో ధాన్యం విక్రయించే సమయంలో ఓటీపీ కోసం ఫోన్‌ను రైతు వద్దే ఉంచుకోవాలి. ఓటీపీ వచ్చిన తర్వాతే ధాన్యం కొనుగోలు ప్రక్రియ ప్రారంభమవుతుంది.
• ఆధార్‌కార్డు, పట్టాదారు పాస్‌ పుస్తకం, బ్యాంక్‌ పాస్‌ పుస్తకం కచ్చితంగా ఉండాలి.
• ఎవరి పేరుపై పట్టాదార్‌ పాస్‌ పుస్తకం ఉంటుందో ఆ రైతే కొనుగోలు కేంద్రానికి రావాలి. ఆ రైతుకు సంబంధించిన బ్యాంక్‌ పాస్‌ పుస్తకం ఇవ్వాలి.
• ఒక రైతు ధాన్యాన్ని మరో రైతు పేరుపై నమోదు చేయరు.
• మద్దతు ధర గ్రేడ్‌ ఏ రకానికి రూ.1,960, సాధారణ రకానికి రూ.1,940గా నిర్ణయించారు.
• రైతులు ఏమైనా సమస్యలుంటే 1967, 1800-42500333 నంబర్లకు ఫోన్‌ చేసి, ఫిర్యాదుచేయొచ్చు.