నిండా ముంచిన సర్కార్‌!

ధాన్యం కొనుగోలులో సర్కార్‌ నిర్లక్ష్యం అన్నదాతలను నిండా ముంచింది. మంగళవారం అర్ధరాత్రి నుంచి బుధవారం తెల్లవారుజాము వరకు రాష్ట్రంలోని పలు జిల్లాల్లో ఈదురుగాలులు, ఉరుములు, మెరుపులతో కురిసిన భారీ వర్షంతో ధాన్యం తడిసి ముద్దయింది.

• పంట కొనని ప్రభుత్వ పాపం.. రైతన్నకు శాపం
• బాధ్యతలేని పాలనలో బిక్కచచ్చిన అన్నదాతలపై ‘అకాల’ పిడుగు
• గాలివాన బీభత్సానికి కొనుగోలు కేంద్రాల్లో కొట్టుకుపోయిన ధాన్యం
• ఉమ్మడి ఆదిలాబాద్‌, కరీంనగర్‌, మహబూబ్‌నగర్‌, నల్లగొండలో నష్టం
• తడిసిముద్దయిన వడ్లు, మక్కల బస్తాలు.. పచ్చబడి మొలకెత్తిన దైన్యం

ధాన్యం కొనని సర్కార్‌ పాపం.. రైతన్న పాలిట శాపమైంది. నెలరోజులు, నెల పదిహేను రోజులు, నలభైరోజులుగా ‘ధాన్యం కొనుండ్రి మొర్రో..కాల్మొక్తం’ అని అన్నదాతలు కాళ్లావేళ్లాపడ్డా ప్రభుత్వం కనికరించలేదు, కాలు కదుపలేదు. ‘నమస్తే తెలంగాణ’ ముందే హెచ్చరించినట్టుగా వానలు ముందే వచ్చాయి. కల్లాలు, కొనుగోలు కేంద్రాలు, మార్కెట్‌ యార్డులు, రోడ్ల మీద ఆరబోసిన ధాన్యంతో పాటు రైతులను నిండా ముంచాయి. పంట కొనుగోలుపై ప్రకటనలు ఇవ్వడం తప్ప వ్యవసాయ మంత్రి గానీ, సివిల్‌ సప్లయ్‌ మంత్రి గానీ కనీసం కొనుగోలు కేంద్రాలను పరిశీలించిన పాపాన పోలేదు. క్షేత్రస్థాయిలో రైతుల పరిస్థితి ఎంత దయనీయంగా ఉన్నదో తెలుసుకొనే ప్రయత్నం చేయలేదు. ఆపత్కాలం దాపురించేదాకా పంటకొనే ప్రయత్నాలు చేయలేదు.

సెంటర్లలో కాంటా వేయక.. వేసినా మిల్లులకు తరలించేందుకు వాహనాలు లేక.. ధాన్యం ఎత్తేందుకు, దించేందుకు హమాలీలు లేక.. వర్షం వస్తే పంటను కాపాడుకొనేందుకు టార్పాలిన్లు లేక, కనీసం తాగేందుకు గుక్కెడు నీళ్లు, నిలబడేందుకు నీడా దొరక్క అరిగోస పడ్డ రైతులు, చివరికి కండ్లముందే చెడగొట్టు వానలతో పంట కొట్టుకుపోయి గుండెలు బాదుకున్నారు. ముందుచూపు లేని, అసమర్థ ప్రభుత్వం ఇవ్వాళ రైతుల బతుకులను నీళ్లపాలు చేసింది. వారి భవిష్యత్తును కన్నీటిపాలు చేసింది.

80 శాతం ధాన్యం కొన్నామని గొప్పలు చెప్పుకొన్న ముఖ్యమంత్రి గారూ.. 80 శాతం ధాన్యం కొంటే.. మరి కల్లాలు, కొనుగోలు కేంద్రాలు, మార్కెట్‌ యార్డులు, చివరికి రోడ్లపై ఇప్పటికీ మిగిలి ఉన్నదేమిటో? గాలివానకు కొట్టుకుపోయిన ధాన్యమెక్కడిదో చెప్పగలరా?

నమస్తే తెలంగాణ నెట్‌వర్క్‌, మే 27: ధాన్యం కొనుగోలులో సర్కార్‌ నిర్లక్ష్యం అన్నదాతలను నిండా ముంచింది. మంగళవారం అర్ధరాత్రి నుంచి బుధవారం తెల్లవారుజాము వరకు రాష్ట్రంలోని పలు జిల్లాల్లో ఈదురుగాలులు, ఉరుములు, మెరుపులతో కురిసిన భారీ వర్షంతో ధాన్యం తడిసి ముద్దయింది. ఆరుగాలం కష్టపడి పండించిన వరి, మక్కజొన్నను అమ్ముకునేందుకు మార్కెట్లు, కొనుగోలు కేంద్రాలకు తెచ్చిన ధాన్యం వర్షార్పణమైంది. నాగర్‌కర్నూల్‌, వనపర్తి, మహబూబ్‌నగర్‌ జిల్లాల్లో భారీ వర్షానికి మార్కెట్లు, కొనుగోలు కేంద్రాల్లోని ధాన్యం తడిసిముద్దయ్యింది.

సీఎం ఇలాకా.. కోస్గి మండలంలో వాన దంచికొట్టింది. మండలంలోని చెన్నారంలో ధాన్యం కొనుగోలు కేంద్రం జలమయమైంది. కరీంనగర్‌ ఉమ్మడి జిల్లాలో గాలివాన బీభత్సం సృష్టించింది. కేంద్రాల్లో పోసిన ధాన్యాన్ని కాపాడుకునేందుకు నానా తంటాలు పడ్డారు. కేంద్రాల్లోనే కుప్పలు తడవడంతో కంటతడి పెట్టారు. ధాన్యం కొట్టుకుపోవడం చూసి రోదించారు.

ప్రభుత్వ విప్‌, వేములవాడ ఎమ్మెల్యే ఆది శ్రీనివాస్‌ స్వగ్రామమైన రాజన్న సిరిసిల్ల జిల్లా రుద్రంగిలో ధాన్యాన్ని అమ్ముకునేందుకు రైతులు నానా అవస్థలు పడుతున్నారు. నెల రోజులు గడుస్తున్నా తూకం వేయకపోవడం, కాంటా పెట్టిన బస్తాలు తరలించకపోవడంతో వర్షానికి పూర్తిగా తడిశాయి. యాదాద్రి భువనగిరి జిల్లా చౌటుప్పల్‌ మార్కెట్‌ యార్డ్‌ కొనుగోలు కేంద్రంలో ధాన్యం కుప్పలు తడిసి ముద్దయ్యాయి. ఆదిలాబాద్‌, నిర్మల్‌ జిల్లాల్లోని పలు మండలాల్లో ధాన్యం తడవడంతో రైతులకు తీవ్ర నష్టం కలిగింది.