K Keshava Rao | తెలంగాణ ప్రజలంతా ఉద్యమకారులే 3.5 కోట్ల మందికి పింఛన్‌ ఇస్తమా? : కే కేశవరావు

నాడు మూడున్నర కోట్ల మంది ప్రజలు ఏదో రకంగా ఉద్యమంలో పాల్గొన్నవారే అని, అందరికీ జాగలు, పింఛన్లు ప్రభుత్వం ఇవ్వలేదని తెలంగాణ ఉద్యమకారుల గుర్తింపు కమిటీ చైర్మన్‌ కే కేశవరావు స్పష్టం చేశారు. హైదరాబాద్‌లోని తెలంగాణ అమరజ్యోతి కార్యాలయంలో బుధవారం తెలంగాణ ఉద్యమకారుల గుర్తింపు కమిటీ సమావేశం నిర్వహించారు.

• జాగలు కూడా ఇయ్యలేం.. పరేషాన్‌ చెయ్యవద్దు
• ఉద్యమకారుల గుర్తింపు కమిటీ చైర్మన్‌ కేకే వ్యాఖ్య
• కాంగ్రెస్‌ మ్యానిఫెస్టోలో 25వేల పింఛన్‌ హామీ!

హైదరాబాద్‌,జూలై 8 (నమస్తే తెలంగాణ) : నాడు మూడున్నర కోట్ల మంది ప్రజలు ఏదో రకంగా ఉద్యమంలో పాల్గొన్నవారే అని, అందరికీ జాగలు, పింఛన్లు ప్రభుత్వం ఇవ్వలేదని తెలంగాణ ఉద్యమకారుల గుర్తింపు కమిటీ చైర్మన్‌ కే కేశవరావు స్పష్టం చేశారు. హైదరాబాద్‌లోని తెలంగాణ అమరజ్యోతి కార్యాలయంలో బుధవారం తెలంగాణ ఉద్యమకారుల గుర్తింపు కమిటీ సమావేశం నిర్వహించారు. ఈ కార్యక్రమంలో జేఎన్టీయూ, తెలంగాణ, మహాత్మా గాంధీ, పాలమూరు, శాతవాహన, కొండా లక్ష్మణ్‌ ఉద్యానవన, తెలుగు వర్సిటీ, డా బీఆర్‌ అంబేద్కర్‌ ఓపెన్‌యూనివర్సిటీ, జయశంకర్‌ వ్యవసాయ వర్సిటీలకు చెందిన విద్యార్థి జేఏసీ నాయకులు పాల్గొన్నారు. ఈ సందర్భంగా కేకే మాట్లాడుతూ ఉద్యమకారుల సంక్షేమం కోసం ఈ కమిటీని ప్రభుత్వం ఏర్పాటు చేసిందని, అందరూ తమ సలహాలు, సూచనలు ఇవ్వాలని కోరారు. నామినేట్‌ పోస్టులు, 250 గజాల స్థలం, ఉచిత బస్‌ పాస్‌లు, ఉపాధి అవకాశాలు వంటి సౌకర్యాలు కల్పించాలని పలువురు సమావేశంలో పేర్కొన్నారు. వక్తలు గంటల తరబడి మాట్లాడుతుండటంతో కేకేతో పాటు ఎమ్మెల్సీలు అద్దంకి, ప్రొఫెసర్‌ కోదండరాం, నాయకులు రాములు నాయక్‌, మోతె శోభన్‌రెడ్డి అసహనం వ్యక్తంచేశారు. ఈ సందర్భంగా కేకే మాట్లాడుతూ ఉద్యమకారుల ఎంపిక బాధ్యతను ప్రొఫెసర్‌ కోదండరాంకు అప్పగించామని తెలిపారు. అర్హులకు న్యాయం చేయాలనేది తమ ప్రధాన ఉద్దేశమని చెప్పారు. ఒకరిపై ఒకరు ఫిర్యాదులు మానుకోవాలని సూచించారు. సీఎం రేవంత్‌రెడ్డితో చర్చించి కీలక నిర్ణయాలు తీసుకుంటామని తెలిపారు. ఈ సందర్భంగా పలువురు మాట్లాడుతూ ఉద్యమ సమయంలో విద్యార్థులు, యువతపై నమోదైన కేసులను తక్షణమే ఎత్తివేయాలని డిమాండ్‌ చేశారు.

కాంగ్రెస్‌ మ్యానిఫెస్టోలో చెప్పిందేంటంటే..

గత అసెంబ్లీ ఎన్నికల నేపథ్యంలో కాంగ్రెస్‌ పార్టీ ‘అభయ హస్తం’ మ్యానిఫెస్టోలో ఉద్యమకారులకు ప్రత్యేకంగా పలు హామీలు ప్రకటించారు. ఉద్యమకారుల గుర్తింపు కమిటీ నిర్వహిస్తున్న సమావేశాల్లో గందరగోళం నెలకొన్న నేపథ్యంలో ఆ హామీలను మరోసారి ఉద్యమకారులు గుర్తు చేసుకుంటున్నారు. ఎన్నికల ముందు ఇచ్చిన హామీలను అమలు చేస్తే సరిపోతుందని పలువురు డిమాండ్‌ చేస్తున్నారు.

• అమరవీరుల, ఉద్యమకారుల త్యాగాలకు గుర్తింపు, 25 వేల గౌరవ పింఛన్‌, ఉద్యమంలో పాల్గొన్న యువతపై నమోదైన కేసుల ఎత్తివేత, ‘తెలంగాణ ఉద్యమకారులు‘గా ప్రభుత్వ గుర్తింపు కార్డులు జారీ ..
• అధికారంలోకి వచ్చిన మొదటి ఏడాదిలోనే 2 లక్షల ప్రభుత్వ ఉద్యోగాలు, ఎస్సీ, ఎస్టీ, బీసీ, మైనారిటీ బ్యాక్‌లాగ్‌ పోస్టుల భర్తీకి ఏర్పాట్లు, నిరుద్యోగ యువతకు ఉద్యోగ, ఉపాధి, ప్రతి నెలా రూ. 4,000 నిరుద్యోగ భృతి, ప్రత్యేక చట్టం ద్వారా టీజీపీఎస్సీ ప్రక్షాళన, యూపీఎస్సీ తరహాలో పునర్వ్యవస్థీకరణ.
• నిరుద్యోగ రహిత రాష్ట్రంగా తెలంగాణ, సెంట్రలైజ్డ్‌ ఆన్‌లైన్‌ రిజిస్ట్రేషన్‌ పోర్టల్స్‌ ఏర్పాటు, 7 జోన్లలో ఎంప్లాయీమెంట్‌ ఎక్స్ఛేంజ్‌లు, ప్రతి జిల్లాలో సిల్‌ డెవలప్‌మెంట్‌ సెంటర్లు,ప్రైవేట్‌ కంపెనీల్లో తెలంగాణ యువతకు 75% రిజర్వేషన్లు, విద్య, ఉపాధి అవకాశాలను మెరుగుపరిచేందుకు యూత్‌ కమిషన్‌ ఏర్పాటు, యువతకు రూ. 10 లక్షల వరకు వడ్డీ లేని రుణ సదుపాయం..
•  250 గజాల స్థలం, గౌరవ భృతి హామీ, క్రమం తప్పకుండా గౌరవ భృతి..