త్వరలో ‘బీఆర్‌ఎస్‌’కు రాజముద్ర!

తెలంగాణ రాష్ట్ర సమితి బుధవారం నుంచే ‘భారత్‌ రాష్ట్ర సమితి’గా మారినప్పటికీ.. ఎన్నికల సంఘం వద్ద ఆమోదముద్ర పడటానికి కాస్త సమయం పట్టే అవకాశం ఉన్నది. పార్టీ పేరును సవరించుకొనేందుకు ‘ప్రజా ప్రాతినిధ్య చట్టం 1951’లోని సెక్షన్‌ 29-ఏ అవకాశం కల్పిస్తున్నది.

• మునుగోడులో టీఆర్‌ఎస్‌ పేరుతోనే పోటీ

హైదరాబాద్‌, అక్టోబర్‌ 5 (నమస్తే తెలంగాణ): తెలంగాణ రాష్ట్ర సమితి బుధవారం నుంచే ‘భారత్‌ రాష్ట్ర సమితి’గా మారినప్పటికీ.. ఎన్నికల సంఘం వద్ద ఆమోదముద్ర పడటానికి కాస్త సమయం పట్టే అవకాశం ఉన్నది. పార్టీ పేరును సవరించుకొనేందుకు ‘ప్రజా ప్రాతినిధ్య చట్టం 1951’లోని సెక్షన్‌ 29-ఏ అవకాశం కల్పిస్తున్నది. ఇందుకోసం కొన్ని నిబంధనలు అనుసరించాల్సి ఉంటుంది.

• పార్టీ పేరును సవరిస్తూ సర్వసభ్య సమావేశంలో తీర్మానం చేయాలి. అనంతరం కనీసం 30 రోజుల్లోగా ఎన్నికల సంఘానికి సమాచారం ఇవ్వాలి. సంబంధిత పత్రాలను నిర్దేశిత ఫార్మాట్‌లో సమర్పించాలి. బీఆర్‌ఎస్‌గా మారుస్తూ చేసిన ఏకగ్రీవ తీర్మానాన్ని తీసుకొని నేతలు ఢిల్లీకి వెళ్లారు. కేంద్ర ఎన్నికల సంఘం వారికి గురువారం ఉదయం 11 గంటలకు సమయం ఇచ్చింది.
• ఎన్నికల సంఘం మార్గదర్శకాల ప్రకారం.. కొత్తగా పెట్టే పేరు అప్పటికే మనుగడలో ఉన్న వేరే పార్టీ పేరును పోలి ఉండకూడదు. ఆ పేరును ఇంగ్లిష్‌, హిందీతోపాటు ఏ ప్రాంతీయ భాషలోకి అనువదించినా వేరే పార్టీ పేరు స్ఫురించకూడదు. లేదా ఇప్పటికే ఉన్న పార్టీ పాపులారిటీకి సమస్య అవుతుందనే ఫిర్యాదులు ఉండకూడదు. ఈ అభ్యంతరాలేవీ బీఆర్‌ఎస్‌కు లేవు.
• నేతలు సమర్పించిన పత్రాలను ఎన్నికల అధికారులు పరిశీలిస్తారు. దేశవ్యాప్తంగా ఉన్న పార్టీల పేర్లతో పోల్చి చూస్తారు. ఎలాంటి అభ్యంతరాలు లేకపోతే వెంటనే పేరు మార్పును ఆమోదిస్తూ నోటిఫికేషన్‌ విడుదల చేస్తారు. అప్పటి నుంచి అధికారికంగా కొత్త పేరు మనుగడలోకి వస్తుంది.

మునుగోడులో టీఆర్‌ఎస్సే..

మునుగోడు ఉప ఎన్నికల్లో మాత్రం టీఆర్‌ఎస్‌ పేరుతోనే పోటీ చేయనున్నారు. మునుగోడు ఎన్నికల షెడ్యూల్‌ ఇప్పటికే విడుదలైన సంగతి తెలిసిందే. ఈ నెల 14వ తేదీ వరకు మాత్రమే నామిషనేషన్లను స్వీకరించనున్నారు. వచ్చే నెల 3వ తేదీన పోలింగ్‌ జరుగనున్నది. ఈ నేపథ్యంలో ఉప ఎన్నికల్లో టీఆర్‌ఎస్‌గానే పోటీ చేస్తుందని పార్టీ వర్గాలు తెలిపాయి.
గుర్తు మారదు