Visit:
ఎవరేమన్నా కాళేశ్వరమే తెలంగాణకు జీవధార. తెలంగాణను ఎడారిగా మార్చే కుట్రలు మరో మూడేండ్లు ఉంటయి. ఆ తర్వాత వచ్చేది కేసీఆర్‌ ప్రభుత్వమే. ప్రాజెక్టును కేసీఆరే బతికిస్తడు. కాళేశ్వరం నీళ్లను చివరి ఇంచు వరకు ఇస్తం. ఇందులో ఎలాంటి సందేహం లేదు. ప్రాజెక్టును కేసీఆర్‌కు అప్పగిస్తే మూడంటే మూడు రోజుల్లో నీళ్లిస్తం. కాంగ్రెస్‌ ప్రభుత్వానికి కుట్రలు తప్ప రైతులకు నీళ్లివ్వాలనే సోయి లేదు.
-జగదీశ్‌రెడ్డి
కాళేశ్వరంపై ఘోష్‌ కమిషన్‌ ఇచ్చిన రిపోర్టు కాదది.. చంద్రబాబు ప్రోద్బలంతో బీజేపీ, కాంగ్రెస్‌ వండివార్చిన కుట్రల చిట్టా. నివేదికలో కించిత్‌ వాస్తవం కూడా లేదు. ప్రధాని మోదీ, ఏపీ సీఎం చంద్రబాబు డైరెక్షన్‌లో కేసీఆర్‌ను బద్నాం చేయాలని కుట్ర పన్నుతున్నరు. కాళేశ్వరం నివేదిక పేరుతో కాంగ్రెస్‌ మోసపూరిత ప్రచారం చేస్తున్నది. -జగదీశ్‌రెడ్డి
సూర్యాపేట, ఆగస్టు 6 (నమస్తే తెలంగాణ) : ఏపీ బనకచర్ల ప్రాజెక్టు కోసం మన కాళేశ్వరం ప్రాజెక్టు మేడిగడ్డ బరాజ్‌ను బలిపెడుతున్నారని మాజీ మంత్రి, సూర్యాపేట ఎమ్మెల్యే జగదీశ్‌రెడ్డి నిప్పులు చెరిగారు. స్థానిక ఎన్నికల్లో లబ్ధి పొందేందుకు కమిషన్‌ నివేదిక పేరిట కాంగ్రెస్‌ డ్రామాలకు తెరలేపిందని మండిపడ్డారు. సూర్యాపేట నియోజకవర్గ పరిధిలోని ఆత్మకూర్‌.ఎస్‌ మండలంలో రేషన్‌కార్డులు, ఇండ్ల నిర్మాణాలకు మంజూరు పత్రాలు పంపిణీ చేసిన అనంతరం మీడియాతో జగదీశ్‌రెడ్డి మాట్లాడారు. ఏడాదిన్నరగా రైతులను ఎండబెడుతూ కేసీఆర్‌ను బద్నాం చేయాలనే ఏకైక లక్ష్యంతో కాళేశ్వరం ప్రాజెక్టుపై కుట్రలు చేస్తున్న కాంగ్రెస్‌ సర్కారు తగిన మూల్యం చెల్లించుకోక తప్పదని హెచ్చరించారు. కాళేశ్వరంపై ఘోష్‌ కమిషన్‌ ఇచ్చిన నివేదికలో కొంచెం కూడా వాస్తవం లేదని, ఇదంతా మోదీ, చంద్రబాబు డైరెక్షన్‌లో కేసీఆర్‌ను బద్నాం చేసేందుకు జరుగుతున్న కుట్ర అని ఆగ్రహం వ్యక్తంచేశారు.
నివేదిక పేరి ట ప్రభుత్వం మోసపూరిత ప్రచారం చేస్తున్నదని, అరెస్టులు ఉండొచ్చని చిల్లర ప్రచా రం చేస్తున్నారని,పత్రికల్లో విషపు రాతలు రాయిస్తున్నారని మండిపడ్డారు. ‘ఉద్యమం నుంచి వచ్చినోళ్లం.. బెదిరింపులకు భయపడే ప్రసక్తే లేదు’ అని తేల్చిచెప్పారు. అసలు కమిషన్‌ రిపోర్టును తొక్కిపెట్టి కాంగ్రెస్‌ సొంత కథలు అల్లుతున్నదని వివరించారు. స్థానిక ఎన్నికల్లో రాజకీయ లబ్ధి కోసమే కమిషన్‌ నివేదిక పేరిట విషప్రచారం చేస్తూ ప్రజలను మరోసారి మోసం చేయాలని కాంగ్రెస్‌ చూస్తున్నదని నిప్పులు చెరిగారు. కేసీఆర్‌ ముందుచూ పు పాలన వల్లే తెలంగాణలో అద్భుత ఫలితాలు వచ్చాయని, ఆయన ప్రవేశపెట్టిన పథకాలు దేశానికే ఆదర్శంగా నిలిచాయని గుర్తుచేశారు. అన్ని రంగాల్లో కాంగ్రెస్‌ ప్ర భుత్వం విఫలమైందని, కేసీఆర్‌కు పేరొస్తుందనే విషం కక్కుతున్నదని ధ్వజమెత్తారు. కాళేశ్వరం ప్రాజెక్టును తమకు అప్పగిస్తే మోతె వరకూ నీళ్లిచ్చి చూపిస్తామని వెల్లడించారు. ఇటీవల తాను కాళేశ్వరం ప్రాజెక్టుపై పవర్‌ పాయింట్‌ ప్రజెంటేషన్‌తో అందరికీ వివరించానని ప్రాజెక్టును కేసీఆర్‌కు అప్పగిస్తే మూడంటే మూడు రోజుల్లో నీళ్లిస్తామని స్పష్టం చేశారు. కాళేశ్వరంపై జరుగుతున్న కుట్రలపై శాసనసభలో కాంగ్రెస్‌ ప్రభుత్వాన్ని నిలదీస్తామని.. ఇందుకు సిద్ధంగా ఉండాలని సవాల్‌ చేశారు.
కామారెడ్డి డిక్లరేషన్‌ దగా
కాంగ్రెస్‌ ఇచ్చిన కామారెడ్డి డిక్లరేషన్‌ అంతా దగా అని జగదీశ్‌రెడ్డి నిప్పులు చెరిగారు. బీసీలకు 42 శాతం రిజర్వేషన్లు కల్పిస్తామని నాడు ఓట్లు వేయించుకుని మోసం చేసిందని మండిపడ్డారు. 420 దొంగ హామీలు ఇచ్చి గద్దెనెక్కిందని విమర్శించారు. 2 లక్షల ఉద్యోగాల పేరిట నిరుద్యోగులను, తులం బంగారం, రూ.2500 ఇస్తామని మహిళలను, రూ.15000 ఇస్తామని రైతులను మోసం చేసిందని ఫైర్‌ అయ్యారు. రైతులకు నీళ్లు, ఎరువులు ఇవ్వకుండా అరిగోస పెడుతున్నదని వాపోయారు. కాంగ్రెస్‌పై ప్రజల్లో తీవ్ర వ్యతిరేకత ఉన్నదని తెలిపారు. 42 శాతం రిజర్వేషన్ల పేరుతో మరోసారి బీసీలను కాంగ్రెస్‌ మోసం చేస్తున్నదని ధ్వజమెత్తారు. ప్రజలకు ముఖం చూపెట్టలేక, మభ్యపెట్టేందుకు, వ్యతిరేకతను కప్పిపుచ్చుకొనేందుకు ఇప్పుడు జంతర్‌మంతర్‌ వద్ద డ్రామాల ఫీట్లు వేస్తున్నదని విమర్శించారు. వరుస మోసాలతో కాంగ్రెస్‌ ప్రభుత్వం రికార్డులు సృష్టిస్తున్నదని చురకలంటించారు. రాబోయే రోజుల్లో కాంగ్రెస్‌ సర్కార్‌కు ప్రజలే గుణపాఠం చెప్తారని హెచ్చరించారు.
కేవలం స్థానిక సంస్థల ఎన్నికల్లో రాజకీయ లబ్ధి పొందేందుకు కమిషన్‌ నివేదిక పేరిట కాంగ్రెస్‌ విషప్రచారం చేస్తున్నది. మరోసారి ప్రజలను మోసం చేయాలని చూస్తున్నది. రెండేండ్లుగా చెప్పిందే చెప్పి కేసీఆర్‌పై ఏడుపు తప్ప ప్రజలకు ప్రభుత్వం ఒరగబెట్టిందేమీ లేదు. ఎవరెన్ని కుట్రలు చేసినా కేసీఆర్‌ను ఏమీ చేయలేరు.
-జగదీశ్‌రెడ్డి
