స్కాన్‌ చేస్తే.. అటెండెన్స్‌ పడినట్టే

వచ్చే విద్యాసంవత్సరం నుంచి రాష్ట్రంలోని ప్రభుత్వ బడుల్లో ఆర్టిఫిషియల్‌ ఇంటెలిజెన్స్‌ ఆధారిత ఫేషియల్‌ అటెండెన్స్‌ను అమలు చేయనున్నారు.

• ప్రభుత్వ బడుల్లో ఎఫ్‌ఆర్‌ఎస్‌ అమలు
• త్వరలో మంత్రి కేటీఆర్‌ చేతుల మీదుగా టీచర్లకు ట్యాబ్‌ల అందజేత
• వీటి ద్వారానే హాజరు నమోదు
• వచ్చే విద్యాసంవత్సరం నుంచి ఆచరణలోకి..

హైదరాబాద్‌, ఏప్రిల్‌ 7 (నమస్తే తెలంగాణ) : వచ్చే విద్యాసంవత్సరం నుంచి రాష్ట్రంలోని ప్రభుత్వ బడుల్లో ఆర్టిఫిషియల్‌ ఇంటెలిజెన్స్‌ ఆధారిత ఫేషియల్‌ అటెండెన్స్‌ను అమలు చేయనున్నారు. స్మార్ట్‌ఫోన్‌, ట్యాబ్‌లలో యాప్‌ను ఇన్‌స్టాల్‌ చేసి, కెమెరా ఆధారంగా స్కాన్‌ చేసి విద్యార్థుల హాజరును నమోదు చేయడం ఈ విధానం ప్రత్యేకత. ఇదే తరహా హాజరు విధానాన్ని టీచర్లకు వర్తింపజేస్తారు.

టీచర్లకు 20 వేల ట్యాబ్‌లు

రాష్ట్రంలో 26 వేలకు పైగా ప్రభుత్వ బడులున్నాయి. ఈ బడుల్లో 20వేల ట్యాబ్‌లను తెలంగాణ స్టేట్‌ టెక్నాలజీ సర్వీసెస్‌ (టీఎస్‌టీఎస్‌) ద్వారా టెండర్ల ప్రక్రియను పూర్తి చేసి తెప్పించారు. త్వరలోనే ఈ ట్యాబ్‌లను మంత్రి కేటీఆర్‌ టీచర్లకు అందజేస్తారు. వెయ్యిలోపు విద్యార్థులున్న బడికి ఒకటి, వెయ్యి మంది కంటే ఎక్కువ మంది విద్యార్ధులున్న బడులకు రెండు ట్యాబ్‌లను అందజేయనున్నట్టు విద్యాశాఖ ఉన్నతాధికారి ఒకరు తెలిపారు. ఈ ట్యాబ్‌లలో హాజరు నమోదుతో పాటు మధ్యాహ్న భోజన విద్యార్థుల సమాచారం, వారి ప్రగతిని అప్‌లోడ్‌ చేస్తామని పేర్కొన్నారు.

అమలు ఇలా

• ట్యాబ్‌/ స్మార్ట్‌ఫోన్లల్లో ఫేషియల్‌ రికగ్నిషన్‌ సిస్టం (ఎఫ్‌ఆర్‌ఎస్‌)ను ఇన్‌స్టాల్‌ చేస్తారు.
• మొదట తరగతుల వారీగా విద్యార్థుల ముఖచిత్రాలు (ఫొటోలను) యాప్‌లో లోడ్‌చేస్తారు.
• క్లాస్‌ టీచర్‌ స్మార్ట్‌ఫోన్‌/ ట్యాబ్‌ కెమెరాతో తరగతి గదిని స్కాన్‌ చేయగానే డాటాబేస్‌లో ఉన్న చిత్రాలతో పోల్చుకొంటుంది.
• ఆయా ముఖాల (చిత్రాల) ఆధారంగా ఆ రోజు క్లాసుకు ఎంత మంది హాజరయ్యారో, ఎంత మంది గైర్హాజరయ్యారో అప్పటికప్పుడే తేల్చేస్తుంది.