కొలిక్కి రాని విభజన సమస్యలు.. తూతూమంత్రంగా సమావేశం

రాష్ట్ర విభజన జరిగి ఎనిమిదేండ్లు దాటినా ఇరురాష్ర్టాల మధ్య సమస్యలను పరిష్కరించడంలో కేంద్రం మరోసారి నిర్లక్ష్య వైఖరి కనబర్చింది.

• కేంద్రం తేల్చదు..నాన్చుడే
• ఏపీ వింత వాదనలు

హైదరాబాద్‌, సెప్టెంబర్‌ 27 (నమస్తే తెలంగాణ): రాష్ట్ర విభజన జరిగి ఎనిమిదేండ్లు దాటినా ఇరురాష్ర్టాల మధ్య సమస్యలను పరిష్కరించడంలో కేంద్రం మరోసారి నిర్లక్ష్య వైఖరి కనబర్చింది. మంగళవారం ఢిల్లీలో రెండు రాష్ట్రాల ప్రధాన కార్యదర్శులు, పలు శాఖల ఉన్నతాధికారులతో కేంద్ర హోంశాఖ నిర్వహించిన సమావేశంలో కేంద్రం ఏ ఒక్క అంశాన్ని పరిష్కరించకుండా నాన్చుడు ధోరణి ప్రదర్శించింది. మొత్తం 11 అంశాలతో ఎజెండాను రాష్ట్రాలకు పంపిన కేంద్రం ఏ ఒక్క అంశంపై స్పష్టత ఇవ్వకుండా రెండు గంటల్లో సమావేశాన్ని ముగించింది. షెడ్యూల్‌ 9,10 సంస్థల విభజన సమస్యలకు శాశ్వత పరిష్కారం చూపాలని తెలంగాణ సీఎస్‌ సోమేశ్‌కుమార్‌ బలంగా వాదించారు. గిరిజన విశ్వవిద్యాలయం, కాజీపేట రైల్‌ కోచ్‌ ఫ్యాక్టరీ ఏర్పాటును ప్రస్తావించారు.

అంశాల వారీగా..

• షెడ్యూల్‌ 9 సంస్థల విభజనపై షీలాబిడే కమిటీ 90 సంస్థలకు సిఫార్సులు చేసింది. 45 సంస్థల విభజనకు తెలంగాణ, ఏపీలు అంగీకరించాయి.15 సంస్థలపై తెలంగాణ అంగీకరించినా, ఏపీ ఒప్పుకోలేదు.
• హైదరాబాద్‌ ఆదాయంపై కన్నేసిన ఏపీ.. హైదరాబాద్‌కు వచ్చే ఆదాయంలో వాటా కోసం విభజన చట్టాన్ని సవరించాలని వింత ప్రతిపాదన తెచ్చింది. దీనిపై తెలంగాణ తీవ్రఅభ్యంతరం తెలిపింది.
• డెకన్‌ ఇన్‌ఫ్రాస్ట్రక్చర్‌ అండ్‌ ల్యాండ్‌ హోల్డింగ్స్‌ లిమిటెడ్‌కు కేటాయించిన భూములను ఉపయోగించకపోవడంతో తెలంగాణ ప్రభుత్వం వెనక్కు తీసుకుంది. ఈ భూములను హెడ్‌క్వార్టర్‌ ఆస్తులుగా పరిగణించి పంపిణీ చేయాలని ఏపీ వింత వాదన చేసింది.
• ఏపీ డెయిరీ డెవలప్‌మెంట్‌ కార్పొరేషన్‌ విభజన కేసులో కేంద్రానికి అధికార పరిధి లేదని న్యాయస్థానం ప్రకటించిన విషయాన్ని తెలంగాణ తెలిపింది.
• 142 సంస్థలను షెడ్యూల్‌ 10లో చేర్చారు. ఇందులోని సంస్థల నగదును జనాభా నిష్పత్తి ప్రకారం, ఆస్తులను స్థానం ఆధారంగా విభజించాలని తెలంగాణ తెలిపింది. షెడ్యూల్‌ 10 సంస్థల ఆస్తులనూ జనాభా నిష్పతితో పంచాలని ఏపీ మొండికేసింది.
• సింగరేణిలో 51 శాతం ఈక్విటీ పూర్తిగా తెలంగాణకు చెందుతుందని చట్టంలో నిబంధన ఉన్నందున సింగరేణి విభజన ప్రశ్న ఉత్పన్నం కాదని సీఎస్‌ స్పష్టం చేయడంతో దీన్ని పరిశీలించాలని హోంసెక్రటరీ ఆ శాఖ అధికారులను ఆదేశించారు.
•  తెలంగాణకు రావాల్సిన 354 కోట్ల సబ్సిడీని కేంద్రం ఏపీకి పంపింది. ఆ నిధులను తిరిగి ఇవ్వాలని రాష్ట్రం డిమాండ్‌ చేసినా తర్వాత ఇస్తామని ఏపీ దాటవేసింది.