Mortality Rate | రాష్ట్రంలో తగ్గిన ప్రసూతి మరణాలు.. మూడో స్థానంలో తెలంగాణ

రాష్ట్రంలో గత ఏడాది ప్రసూతి మరణాలు తగ్గినట్టు వైద్యారోగ్యశాఖ తెలిపింది. 2022-23లో 340 మరణాలు నమోదుకాగా, 2023-24లో 260కి తగ్గినట్టు తాజా నివేదిక వెల్లడించింది. ప్రస్తుతం దేశంలోనే అతి తక్కువ ప్రసూతి మరణాలు నమోదవుతున్న రాష్ర్టాల్లో తెలంగాణ మూడో స్థానంలో ఉన్నది.

• 2023-24లో 260 నమోదు
• అంతకుముందు ఏడాది కన్నా తక్కువ
• వైద్యారోగ్యశాఖ తాజా నివేదిక

Mortality Rate | హైదరాబాద్‌, జూన్‌ 14 (నమస్తే తెలంగాణ): రాష్ట్రంలో గత ఏడాది ప్రసూతి మరణాలు తగ్గినట్టు వైద్యారోగ్యశాఖ తెలిపింది. 2022-23లో 340 మరణాలు నమోదుకాగా, 2023-24లో 260కి తగ్గినట్టు తాజా నివేదిక వెల్లడించింది. ప్రస్తుతం దేశంలోనే అతి తక్కువ ప్రసూతి మరణాలు నమోదవుతున్న రాష్ర్టాల్లో తెలంగాణ మూడో స్థానంలో ఉన్నది. ప్రసూతి మరణాలపై నివేదికను విశ్లేషించగా ఆసక్తికర అంశాలు వెలుగు చూశాయి.

• రాష్ట్రంలో అత్యధిక ప్రసూతి మరణాలు ఉన్న జిల్లాల్లో సంగారెడ్డి మొదటి స్థానంలో ఉన్నది. ఆ జిల్లాలో 27 మరణాలు నమోదయ్యాయి. తర్వాతి స్థానాల్లో హైదరాబాద్‌, నిజామాబాద్‌, మహబూబాబాద్‌, మహబూబ్‌నగర్‌ ఉన్నాయి.
• 2022-23తో పోల్చితే గత ఏడాది మొత్తంగా మరణాలు తగ్గినా నిజామాబాద్‌, నారాయణపేట, మంచిర్యాల, సంగారెడ్డి, జోగులాంబ గద్వాల, ఆసిఫాబాద్‌ జిల్లాల్లో పెరగటం ఆందోళన కలిగిస్తున్నది. మిగతా 27 జిల్లాల్లో తగ్గుదల నమోదైనట్టు నివేదిక తెలిపింది.
• అత్యధిక శాతం ప్రసవించిన వారంలోపే జరుగుతున్నట్టు గుర్తించారు. మొత్తం మరణాల్లో 50 శాతం వారంలోపే జరిగినట్టు తేలింది. ప్రసవ సమయంలో 10 శాతం మాత్రమే మరణాలు నమోదవుతున్నాయి.
• చనిపోయినవారిలో 71 శాతం మందికి సిజేరియన్‌ కాగా, 29 శాతం మంది నార్మల్‌ డెలివరీ అయినట్టు వెల్లడైంది.
• మరణించినవారిలో 21-25 ఏండ్ల వయస్కులే 40 శాతం మంది ఉన్నారు. 26-30 ఏండ్ల మధ్యవయస్కులు ఉండగా, తర్వాత స్థానంలో 18 నుంచి 20 ఏండ్లలోపు వారు ఉన్నారు.
• మరణాలకు దారితీస్తున్న కారణాల్లో గుండె సంబంధ సమస్యలు, రక్తపోటు, ఊబకాయం, రక్తస్రావం, అబార్షన్‌ వంటివి ఎక్కువగా ఉన్నట్టు తేలింది.