కాంగ్రెస్‌కు చెంపపెట్టులా కాగ్‌ నివేదిక

గత కేసీఆర్‌ ప్రభుత్వ హయాంలో ఆర్థిక పరిస్థితిపై కాంగ్రెస్‌ ప్రభుత్వం ప్రజలను తప్పుదోవ పట్టిస్తున్నది. ప్రతినెలా రూ.7,000 కోట్ల వడ్డీ చెల్లింపు అన్నది శుద్ధ అబద్ధం.

• 7 వేల కోట్ల వడ్డీ చెల్లింపు శుద్ధఅబద్ధం
• నెలవారీగా 2,300 కోట్లేనని కాగ్‌ వెల్లడి
• కేసీఆర్‌ సర్కార్‌పై కాంగ్రెస్‌ దుష్ప్రచారం
• వర్షాలతో జనజీవనం స్తంభించిపోతే అభినవ నీరోలా సీఎం రేవంత్‌రెడ్డి
• ప్రజల గోడు గాలికొదిలి.. పైసలపైనే ధ్యాస
• బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌

హైదరాబాద్‌, ఆగస్టు 29 (నమస్తే తెలంగాణ): ‘గత కేసీఆర్‌ ప్రభుత్వ హయాంలో ఆర్థిక పరిస్థితిపై కాంగ్రెస్‌ ప్రభుత్వం ప్రజలను తప్పుదోవ పట్టిస్తున్నది. ప్రతినెలా రూ.7,000 కోట్ల వడ్డీ చెల్లింపు అన్నది శుద్ధ అబద్ధం. కాంగ్రెస్‌ సర్కార్‌కు చెంపపెట్టులా ఆ వాదన తప్పని కంప్ట్రోలర్‌ అండ్‌ ఆడిటర్‌ జనరల్‌ (కాగ్‌) జూలై నివేదిక తేల్చి చెప్పింది’ అని బీఆర్‌ఎస్‌ వర్కింగ్‌ ప్రెసిడెంట్‌, మాజీ మంత్రి కే తారక రామారావు వెల్లడించారు. కాంగ్రెస్‌ దుష్ప్రచారాన్ని బయటపెడుతూ శుక్రవారం ఎక్స్‌ వేదికగా విమర్శలు గుప్పించారు. రాష్ట్రంలో కాంగ్రెస్‌ ప్రభుత్వం ఆర్థిక దుష్ప్రచారానికి పాల్పడుతున్నదని, సీఎం రేవంత్‌రెడ్డి, ఇతర మంత్రులు.. గత బీఆర్‌ఎస్‌ ప్రభుత్వం చేసిన అప్పలకు ప్రతి నెలా రూ.7,000 కోట్ల రుణ వడ్డీ చెల్లిస్తున్నట్టు తప్పుడు ప్రచారం చేస్తున్నారని కేటీఆర్‌ విమర్శించారు.

కాగ్‌ జూలై నివేదిక ఈ వాదన తప్పని తేల్చిందని స్పష్టంచేశారు. గత నాలుగు నెలల్లో సగటు నెలవారీ వడ్డీ చెల్లింపు కేవలం రూ.2,300 కోట్లు మాత్రమేనని (4 నెలల్లో రూ.9,355 కోట్లు) పేరొన్నారు. కాంగ్రెస్‌ ప్రభుత్వం తమ వైఫల్యాలను కప్పిపుచ్చుకోవడానికి ఉద్దేశపూర్వకంగా రాష్ట్ర రుణ భారాన్ని ఎకువ చేసి చూపిస్తున్నదని విమర్శించారు. తెలంగాణ ప్రజలను తప్పుదారి పట్టించే ఈ దుష్ప్రచారాన్ని వెంటనే ఆపాలని, రాష్ట్ర ఆర్థిక వ్యవస్థను గాడిలో పెట్టాలని డిమాండ్‌ చేశారు.

కాస్ట్‌లీ ప్రాజెక్టులపై రేవంత్‌కు మోజు
భారీ వర్షాలతో జనజీవనం స్తంభించి ప్రజలు అల్లాడుతుంటే సీఎం రేవంత్‌రెడ్డి అభినవ నీరో చక్రవర్తి తరహాలో వ్యవహరిస్తున్నారని కేటీఆర్‌ విమర్శించారు. తెలంగాణలో కురుస్తున్న భారీ వర్షాల వల్ల పెద్ద ఎత్తున ప్రాణ, ఆస్తినష్టం జరిగిందని, ప్రజలు సాయం కోసం ఎదురు చూస్తున్నారని పేర్కొన్నారు. కానీ, సీఎం రేవంత్‌రెడ్డి మాత్రం ప్రజల కష్టాలను పట్టించుకోకుండా, విలాసవంతమైన, లాభదాయకమైన ప్రాజెక్టులపై సమీక్షలు నిర్వహిస్తున్నారని ఆగ్రహం వ్యక్తంచేశారు. వరద ముంపుతో ప్రజలు అవస్థలు పడుతుంటే.. సీఎం మాత్రం రూ.3,50,000 కోట్ల 2036 ఒలింపిక్స్‌ నిర్వహణ, రూ.1,50,000 కోట్ల మూసీ సుందరీకరణ, రూ.225 కోట్ల హైదరాబాద్‌ బీచ్‌ ప్రాజెక్టుల గురించి చర్చలు జరుపుతున్నారని మండిపడ్డారు. ప్రజల గోడును గాలికొదిలి, డబ్బు సంపాదించే పనులపైనే రేవంత్‌ అండ్‌ కో దృష్టి పెట్టిందని దుయ్యబట్టారు. కాంగ్రెస్‌ ప్రభుత్వం సిగ్గు లేకుండా వ్యవహరిస్తున్నదని, ఇది ప్రజాపాలన కాదని మండిపడ్డారు.

ఆటలు పోరాటస్ఫూర్తిని నేర్పిస్తాయి
ఆటలు మనకు సహకారం, పోరాట స్ఫూర్తిని నేర్పిస్తాయని కేటీఆర్‌ తెలిపారు. జాతీయ క్రీడా దినోత్సవం సందర్భంగా ధ్యాన్‌చంద్‌ జయంతిని గుర్తు చేసుకుంటూ కేటీఆర్‌ ట్వీట్‌ చేశారు. ‘మనం కిందపడిన విషయం ముఖ్యం కాదని, మళ్లీ ఎలా పైకి లేచామన్నదే ముఖ్యం’ అని పేరొన్నారు. కష్టాలను అధిగమించి మనకు స్ఫూర్తినిచ్చిన అద్భుతమైన క్రీడాకారులను మనం గౌరవించుకోవాలని పిలుపునిచ్చారు.