కేఆర్‌ఎంబీ రిజర్వాయర్‌ మేనేజ్‌మెంట్‌ కమిటీ ఏర్పాటు
కృష్ణా నదీయాజమాన్య బోర్డు (కేఆర్‌ఎంబీ) రిజర్వాయర్‌ మేనేజ్‌మెంట్‌ కమిటీని నియమించింది. కేఆర్‌ఎంబీ సభ్యుడు బీ రవికుమార్‌ పిైళ్లె ఈ కమిటీకి కన్వీనర్‌గా వ్యవహరించనున్నారు
విధివిధానాలు ఖరారు చేస్తూ ఉత్తర్వులు
హైదరాబాద్‌, మే 10 (నమస్తే తెలంగాణ) : కృష్ణా నదీయాజమాన్య బోర్డు (కేఆర్‌ఎంబీ) రిజర్వాయర్‌ మేనేజ్‌మెంట్‌ కమిటీని నియమించింది. కేఆర్‌ఎంబీ సభ్యుడు బీ రవికుమార్‌ పిైళ్లె ఈ కమిటీకి కన్వీనర్‌గా వ్యవహరించనున్నారు. కమిటీ సభ్యులుగా కేఆర్‌ఎంబీ మెంబర్‌ ఎల్‌బీ మాంథంగ్‌ , తెలంగాణ ఇంజనీర్‌ ఇన్‌ చీఫ్‌ సీ మురళీధర్‌, ఆంధ్రప్రదేశ్‌ ఇంజినీర్‌ ఇన్‌ చీఫ్‌ సీ నారాయణరెడ్డి, టీఎస్‌ జెన్‌కో డైరెక్టర్‌ (హైడల్‌) సీహెచ్‌ వెంకటరాజం, ఏపీ జెన్‌కో చీఫ్‌ ఇంజినీర్‌ ఎం. సంజయ్‌కుమార్‌ వ్యవహరించనున్నారు. ఈ మేరకు కేంద్రజల్‌శక్తి మంత్రిత్వశాఖ మంగళవారం ఉత్తర్వులు జారీ చేసింది.
- ఈ కమిటీ నాగార్జునసాగర్‌, శ్రీశైలం ప్రాజెక్టుల నుంచి విద్యుత్తు ఉత్పత్తి సంబంధించిన ప్రొటోకాల్‌పై 15 రోజుల్లోగా మార్గదర్శకాలను రూపొందించాలి. వాటిని తిరిగి బోర్డులో ఆమోదింపజేసుకోవాలి.
- ఉమ్మడి ప్రాజెక్టుల నిర్వహణకు రూల్‌ కర్వ్‌ను రూపొందించాలి. ప్రాజెక్టుల్లో ఎంత నీరు నిల్వ ఉంచాలి? ఏ సీజన్‌లో ఏయే అవసరాలకు ఎంత వినియోగించుకోవాలి? అనే అంశాలు, ప్రాజెక్టుల వారీగా నెలలోగా ఖరారు చేయాలి.
- డ్యామ్‌ సేఫ్టీపై మార్గదర్శకాలు రూపొందించాలి.
- పులిచింతల డ్యామ్‌ గేట్‌ ఎలా కొట్టుకుపోయిందనే అంశంపై నివేదికివ్వాలి
- కృష్ణా బేసిన్‌లోని వరద ఆధారిత ప్రాజెక్టుల ప్రస్తుత స్థితిగతులపై తెలంగాణ, ఏపీ రాష్ర్టాలు బోర్డుకు నివేదికలను అందజేయాలి.
- శ్రీశైలం ప్రాజెక్టు భద్రత అంశాలపై అధ్యయనం చేసి ప్రతిపాదనలు పంపాలి.
Read Today's Latest Telangana News in Telugu and Telugu News
- Follow Us :
-
