ప్రభుత్వ భూములు.. ‘ప్రైవేట్‌’ హద్దులు!

ఇటీవల ఏసీబీకి చిక్కిన రంగారెడ్డి జిల్లా సర్వే సెటిల్‌మెంట్‌ అండ్‌ ల్యాండ్‌ రికార్డుల అసిస్టెంట్‌ డైరెక్టర్‌ శ్రీనివాసులు అవినీతి బాగోతం భారీగానే ఉన్నట్టు తెలుస్తున్నది.

హైదరాబాద్‌ సిటీబ్యూరో ప్రధాన ప్రతినిధి, డిసెంబర్‌ 6(నమస్తే తెలంగాణ) : ఇటీవల ఏసీబీకి చిక్కిన రంగారెడ్డి జిల్లా సర్వే సెటిల్‌మెంట్‌ అండ్‌ ల్యాండ్‌ రికార్డుల అసిస్టెంట్‌ డైరెక్టర్‌ శ్రీనివాసులు అవినీతి బాగోతం భారీగానే ఉన్నట్టు తెలుస్తున్నది. ప్రభుత్వ భూములు అన్యాక్రాంతం కా కుండా కాపాడాల్సిన ఆ అధికారి.. అవినీతికి తెగమరిగి వాటిని ప్రైవేట్‌ వ్యక్తులకు కట్టబెట్టేందుకు భారీగా ‘సెటిల్‌మెంట్లు’ చేసినట్టు తెలుస్తున్నది. వివాదాలున్నవి, గిట్టుబాటయ్యే భూముల్లోనే ఆయన టేపు తో చుట్టిరావడమే గాక సర్కారీ పెద్దలకు ముట్టజెప్పినట్టు వెల్లడవుతున్నది. రెండేళ్లుగా కోట్లు కొల్లగొట్టి ప్రభుత్వ, వివాదాస్పద భూములపై ప్రైవేట్‌ వ్యక్తులకు అనుకూలంగా నివేదికలు ఇచ్చినట్టు ఆరోపణ లున్నాయి. కేవలం ఆరు దస్ర్తాలపైనే ఏసీబీ విచారణ చేస్తున్నదని.. తవ్వితే కొండంత చిట్టా వెలుగులోకి వస్తుందని తెలుస్తున్నది.

ఆరు దస్ర్తాలపై లోతుగా విచారణ
హైదరాబాద్‌, రంగారెడ్డి, మహబూబ్‌నగర్‌ ప్రాంతాల్లో ఆదాయానికి మించి ఆస్తులు వెలుగుచూసిన ఏడీ శ్రీనివాసులు అవినీతిలో కొన్నింటిపై ఏసీబీ లోతుగా విచారణ చేస్తున్నట్టు తెలిసింది. దాడులు జరిగిన రోజున రంగారెడ్డి కలెక్టరేట్‌లోని ఆయన ఛాంబర్‌లోనూ తనిఖీలు చేసి ఆరు సర్వే నివేదికల దస్ర్తాలను అధికారులు స్వాధీనం చేసుకున్నట్టు తెలిసింది. ఆ దస్ర్తాలన్నీ వెస్ట్‌జోన్‌లోని శేరిలింగంపల్లి, గండిపేట మండలాలవే కావడం గమనార్హం.

రికార్డుల్లో ఒకలా.. నివేదికలు మరోలా!

• శేరిలింగంపల్లి మండలం గుట్టల బేగంపేట పరిధిలోని సర్వే నెంబర్‌ 63 డాక్యుమెంట్లను ఏసీబీ స్వాధీనం చేసుకున్నది. రెవెన్యూ రికార్డుల్లో 78.73 ఎకరాల ప్రభుత్వ భూమి ఉన్నది. మరి న్యాయస్థానం నుంచి ఇది తన భూమిగా ప్రైవేట్‌ వ్యక్తి హక్కులు పొందారనే ప్రచారం జరుగుతున్నది. ఇందులో శ్రీనివాసులు ఎలాంటి అవకతవకలకు పాల్పడ్డారనేది వెల్లడి కావడం లేదు.
• శేరిలింగంపల్లి మండలం గోపన్‌పల్లి పరిధిలోని 36, 37 సర్వే నెంబర్లలో ప్రభుత్వ భూములున్నాయి. ఉమ్మడి రాష్ట్రంలో ఏపీ ఎన్జీవోలకు ఇందులోనుంచి 182 ఎకరాలను కేటాయించగా, ఉద్యోగులు జీహెచ్‌ఎంసీకి రూ.18 కోట్లు చెల్లించి 142 ఎకరాల్లో అధికారంగా లేఅవుట్‌ చేశారు. 2019లో తెలంగాణ ఉద్యోగులు భాగ్యనగర్‌ టీఎన్జీవోలుగా ఏర్పడి ఈ భూముల్లో ఇండ్ల స్థలాల కోసం న్యాయపోరాటం చేస్తున్నారు. కేసీఆర్‌ ప్రభుత్వ హయాంలోనే ఉద్యోగులకు ఈ భూములు కేటాయించే ప్రక్రియ చివరి దశ కొచ్చినప్పటికీ అంతలోనే అసెంబ్లీ ఎన్నికలు రావడం.. ఆపై కాంగ్రెస్‌ ప్రభు త్వం ఏర్పడటంతో కేటాయింపు పూర్తి కాలేదు. కాంగ్రెస్‌ ప్రభుత్వం వచ్చిన తర్వాత ఇందులో ఏకంగా 91 ఎకరాలను ప్రైవేట్‌ వ్యక్తులకు కట్టబెట్టేందుకు రంగారెడ్డి కలెక్టర్‌ ఎన్‌వోసీలను కూడా జారీ చేశారు. ప్రభుత్వంలోని పెద్దలు ఈ భూ బాగోతాన్ని నడిపించారనే వాస్తవాలతో ‘నమస్తే తెలంగాణ’ బిగ్‌ డీల్‌ ను బట్టబయలు చేసింది. ఏడీ శ్రీనివాసులు ఎవరికీ నోటీసులు ఇవ్వకుండానే న్యాయస్థానంలో కేసు పెండింగ్‌ ఉన్న భూముల్లో సర్వే చేసి ప్రైవేట్‌ వ్యక్తులకు కట్టబెట్టారు. వాస్తవానికి కలెక్టర్‌ సర్వేనెంబరు 36లో 17.04 ఎకరాలకు ఎన్‌వోసీ ఇస్తే క్షేత్రస్థాయిలో ఏకంగా 40 ఎకరాలకు పైగా ప్రైవేట్‌ వ్యక్తులు కబ్జా చేసి రోడ్లు వేసి, ఫెన్సింగ్‌ వేసుకున్నారు. వీరికి ఆ హద్దులు చూపడంలో ఏడీ శ్రీనివాసులు కీలక పాత్ర పోషించారనే ఆరోపణలున్నాయి.
• విచారణలో ఉన్న గోపన్‌పల్లి పరిధిలోని సర్వేనెంబర్‌ 124లో 240 ఎకరాలు ఉన్నట్టు తెలిసింది. ఇందులో ఒక కాలనీ ఉండగా వైఎస్‌ హయాంలో ఒక ప్రైవేట్‌ కంపెనీకి వంద ఎకరాలకు పైగా నామమాత్రపు ధరకు భూమి కేటాయించినట్టు సమాచా రం. మిగిలిన ప్రభుత్వ భూమి ఎంత? ఇంతకూ ఉందా? లేదా? ఉంటే ఎవరి ఆధీనంలో ఉంది? ధారాదత్తం కావడంలో ఏడీ తప్పుడు నివేదికలు ఏమైనా ఇచ్చారా? అనే సందేహాలున్నాయి.
• శేరిలింగంపల్లి మండలం హఫీజ్‌పేట, కొండాపూర్‌ పరిధిలోని సర్వే నెంబరు 80, 86, 87, 97లోని భూముల సమగ్ర వివరాలపై అధికారుల్లోనూ స్పష్టత లేదు. సీలింగ్‌ భూములు ఉన్నట్టు తెలుస్తున్నది. ఒక సర్వేనెంబరులో మాత్రం ఏపీలోని ఓ రాజకీయ నాయకుడికి చెందిన భూమిపై గతంలో వివాదం నెలకొని కేసుల దాకా వెళ్లింది. కాంగ్రెస్‌ ప్రభుత్వ పెద్దల సన్నిహితులు ఇందులో భాగస్వాములు అయ్యారు. మరి ఈ వ్యవహారంలో ఏడీ పాత్రనే పలు రకాల ప్రచారాలు వినిపిస్తున్నాయి.
• గండిపేట మండలం వట్టినాగులపల్లి గ్రామ పరిధిలోని సర్వే నెంబరు 187, 188 లోనివి భూదాన్‌ భూములని తెలుస్తున్నది. ఈ భూములపై కోర్టు వివాదాలు కూడా చాలానే ఉన్నాయి. ఏడీ లీలలు ఇందులోనూ ఉండటంతోనే ఏసీబీ డాక్యుమెంట్లు స్వాధీనం చేసుకున్నట్టు తెలిసింది. వీటితోపాటు శేరిలింగంపల్లి పరిధిలోని సర్వే నెంబర్‌ 94 నుంచి 101వరకు ఉన్న భూములు భూభారతిలో నిషేధిత జాబితాలో కనిపించడం లేదు.

ఇదంతా ఒకవైపు మాత్రమేనా?
ఏడీ శ్రీనివాసులు అవినీతి లీలలకు సంబంధించి ఏసీబీ స్వాధీనం చేసుకున్నవి కొన్ని మాత్రమే. అందునా అవి వెస్ట్‌జోన్‌ పరిధిలోని శేరిలింగంపల్లి మండలంలోనివే. కానీ ఇంకా గండిపేట, రాజేంద్రనగర్‌తో పాటు మహేశ్వ రం, ఇబ్రహీంపట్నం నియోజకవర్గం, మేడ్చల్‌ జిల్లా పరిధిలోని పలుచోట్ల ప్రభు త్వ భూములు హద్దులు మారి ప్రైవేట్‌ వ్యక్తుల చేతుల్లో కి వెళ్లడంలో ఏడీ శ్రీనివాసులు సర్వే నివేదికలు కీలకమయ్యాయనే ఆరోపణలున్నాయి. ఆయన భారీస్థాయిలో మూటగట్టుకున్నట్టు విమర్శలున్నా యి. ముఖ్యంగా గత రెండేండ్లుగా ప్రభుత్వంలోని కొందరు కీలక వ్యక్తుల భూ దందాలకూ శ్రీనివాసులు సహకరించారనే ఆరోపణలు ఉన్నాయి.

ఏడీ శ్రీనివాసులు టేపు పట్టేది వివాదాస్పద భూముల్లోనే..

• విచారణలో బయటకొస్తున్న ‘సర్వే సెటిల్‌మెంట్‌’ అధికారి లీలలు
• ఆరు భూ దస్ర్తాలను స్వాధీనం చేసుకున్న అవినీతి నిరోధక శాఖ
• ఇవన్నీ ప్రభుత్వ, భూదాన్‌ భూములుగా రికార్డుల్లో నమోదు
• కోట్లు కొల్లగొట్టి తప్పుడు నివేదికలిచ్చినట్టు ఏసీబీకి ఫిర్యాదులు
• వెలుగులోకి రానివి పదుల సంఖ్యలో ఉంటాయని ఆరోపణలు