ఐటీ కారిడార్‌లో రిటర్న్‌ టు ఆఫీస్‌

వర్క్‌ ఫ్రం హోం విధానానికి ఐటీ కంపెనీలు క్రమంగా వీడ్కోలు పలుకుతున్నాయి. చాలా కంపెనీల్లో ఉద్యోగులు వారంలో కనీసం రెండు, మూడు రోజులు కార్యాలయాలకు వచ్చి విధులు నిర్వహించే (రిటర్న్‌ టు ఆఫీస్‌-ఆర్టీవో) విధానం క్రమంగా పెరుగుతున్నది.

• కార్యాలయాల్లో టెకీల సందడి
• చిన్న, మధ్య తరహా కంపెనీల్లో 100% కళకళ
• హైసియా సర్వేలో వెల్లడి

హైదరాబాద్‌ సిటీబ్యూరో, ఏప్రిల్‌ 20 (నమస్తే తెలంగాణ): వర్క్‌ ఫ్రం హోం విధానానికి ఐటీ కంపెనీలు క్రమంగా వీడ్కోలు పలుకుతున్నాయి. చాలా కంపెనీల్లో ఉద్యోగులు వారంలో కనీసం రెండు, మూడు రోజులు కార్యాలయాలకు వచ్చి విధులు నిర్వహించే (రిటర్న్‌ టు ఆఫీస్‌-ఆర్టీవో) విధానం క్రమంగా పెరుగుతున్నది. దాదాపు 34% కంపెనీల్లో 60 శాతానికి పైగా ఉద్యోగులు వర్క్‌ ఫ్రం హోంకు స్వస్తి చెప్పి.. కార్యాలయాల్లోనే విధులు నిర్వహిస్తున్నట్టుగా హైసియా (హైదరాబాద్‌ సాఫ్ట్‌వేర్‌ ఎంటర్‌ప్రైజెస్‌ అసోసియేషన్‌) సర్వేలో వెల్లడైంది.

హైదరాబాద్‌ ఐటీ, ఐటీఈఎస్‌, వాటి అనుబంధ రంగాల్లోని కంపెనీలపై గత మార్చిలో హైసియా నిర్వహించిన సర్వేలో అనేక ఆసక్తికర విషయాలు వెల్లడయ్యాయి. ఐదు వందల నుంచి ఐదు వేల మంది ఉద్యోగులు పనిచేస్తున్న కంపెనీలకు సర్వేకు ఎంచుకున్నారు. అత్యధిక కంపెనీలు హైబ్రిడ్‌ విధానాన్ని అమలు చేస్తున్నట్టు హైసియా నివేదిక పేర్కొన్నది.

సర్వే ముఖ్యాంశాలు

• చిన్న, మధ్యతరహా కంపెనీల్లో 38% మందికిపైగా, పెద్ద కంపెనీల్లో 22% మందికిపైగా కార్యాలయాలకు వచ్చి పని చేస్తున్నారు.
• 26% కంపెనీలు ఉద్యోగులు అందరూ కార్యాలయానికి రావాలనే నిబంధన అమలుచేస్తున్నాయి.
• 28% కంపెనీలు వారంలో మూడు రోజులు రావాలని సూచిస్తున్నాయి.
• 4% కంపెనీలు పూర్తిస్థాయిలో వర్క్‌ ఫ్రం హోం సౌకర్యాన్ని కొనసాగిస్తున్నాయి.
• 60% కంపెనీలు 2023 చివరినాటికి 100% ఉద్యోగులను కార్యాలయాలకు రప్పించాలని భావిస్తున్నాయి.
• 69% కంపెనీల్లో 19% మంది మాత్రమే వర్క్‌ ఫ్రం హోంకు ఇష్టపడుతున్నారు.
• 14% కంపెనీల్లో 20-39% మంది వర్క్‌ ఫ్రం హోంకు ఇష్టపడుతున్నారు.
• 11% కంపెనీల్లో 40-60% మంది వర్క్‌ ఫ్రం హోంకు మొగ్గు చూపుతున్నారు.
• కార్యాలయాల్లో ఉద్యోగులు విధులు నిర్వహించడం వల్ల టీంవర్క్‌, ఉద్యోగుల మధ్య సమన్వయం, పని వాతావరణం, ఉద్యోగులకు గుర్తింపు, ఉద్యోగుల వ్యక్తిగత, వృత్తిపరమైన వృద్ధి కూడా ఉంటుందని సర్వేలో పాల్గొన్న కంపెనీలు అభిప్రాయపడ్డాయి.