Junior colleges | ఇంటర్‌లో ధ్యానం, యోగా తప్పనిసరి.. నెలకొకసారి పేరెంట్స్‌ మీటింగ్స్‌

రాష్ట్రంలోని ప్రభుత్వ, కార్పొరేట్‌, ప్రైవేట్‌ జూనియర్‌ కాలేజీల్లో ధ్యానం, యోగా, రిలాక్సేషన్‌ ఎక్సర్‌సైజులను ప్రవేశపెట్టాలని ఇంటర్‌ విద్యాశాఖ ఆదేశించింది. ఈ మేరకు బుధవారం ఇంటర్‌ విద్య కమిషనర్‌ నవీన్‌మిట్టల్‌ ఉత్తర్వులు జారీ చేశారు.

• కాలేజీలకు ఇంటర్‌ విద్యాశాఖ ఆదేశం

Junior colleges | హైదరాబాద్‌, ఆగస్టు 9 (నమస్తే తెలంగాణ) : రాష్ట్రంలోని ప్రభుత్వ, కార్పొరేట్‌, ప్రైవేట్‌ జూనియర్‌ కాలేజీల్లో ధ్యానం, యోగా, రిలాక్సేషన్‌ ఎక్సర్‌సైజులను ప్రవేశపెట్టాలని ఇంటర్‌ విద్యాశాఖ ఆదేశించింది. ఈ మేరకు బుధవారం ఇంటర్‌ విద్య కమిషనర్‌ నవీన్‌మిట్టల్‌ ఉత్తర్వులు జారీ చేశారు. వీటిని అన్ని కాలేజీ యాజమాన్యాలు తప్పనిసరిగా అమలు చేయాలని పేర్కొన్నారు. విద్యార్థుల, శారీరక, మానసిక శ్రేయస్సు కోసం చర్యలు తీసుకోవాలని ఆదేశించారు. ఇంటర్‌ కాలేజీల్లో విద్యార్థుల ఆత్మహత్యల నివారణకు ఈ మేరకు చర్యలు చేపట్టినట్టు చెప్పారు. విద్యార్థుల్లో ఒత్తిడి, ఆందోళనను దూరం చేసేందుకు ఈ నిర్ణయం తీసుకొన్నట్టు తెలిపారు.

తీసుకొనే చర్యలిలా..

• నెలకొకసారి తల్లిదండ్రులతో సమావేశాలు ఏర్పాటు చేసి. విద్యార్థుల ప్రగతిని తెలియజేయడంతోపాటు వారు ఎదుర్కొనే సమస్యలకు పరిష్కారాలు చూపుతారు.
• సాయంత్రం వేళల్లో ఆటలు, క్రీడలు తప్పనిసరి చేశారు.
• విద్యార్థులకు కౌన్సెలింగ్‌ ఇచ్చేందుకు ప్రత్యేకంగా సైకాలజికల్‌ కౌన్సిలర్లను నియమించారు.
• కాలేజీలు అకడమిక్‌ పనితీరే కాకుండా విద్యార్థుల మానసిక ఒత్తిడిని పరిశీలించాలి.
• ఆందోళన, ఒత్తిడిలను అధిగమించడంతోపాటు, కెరీర్‌ కౌన్సిలింగ్‌, ఏకాగ్రతను మెరుగుపరిచే చర్యలు చేపట్టాలని సూచించారు.
• నిపుణులతో ఉపన్యాసాలు, స్ఫూర్తినిచ్చే ప్రసంగాలు ఏర్పాటు చేయాలి.