Dharani Portal | ధరణిని ఎత్తేస్తే రికార్డులన్నీ ఆగమాగం అయితయ్‌

కాంగ్రెస్‌ మళ్లీ అధికారంలోకి వస్తే అవినీతి భూతాన్ని తరిమికొట్టి రైతులకు భరోసా కల్పించిన సంస్కరణలు కాలగర్భంలో కలిసిపోతాయి. ధరణిని ఎత్తేస్తే మళ్లీ భూముల రికార్డుల నిర్వహణ గ్రామస్థాయి, మండలస్థాయి అధికారుల చేతుల్లోకి వెళ్తుంది.

Dharani Portal |  హైదరాబాద్‌, నవంబర్‌ 27 (నమస్తే తెలంగాణ): కాంగ్రెస్‌ మళ్లీ అధికారంలోకి వస్తే అవినీతి భూతాన్ని తరిమికొట్టి రైతులకు భరోసా కల్పించిన సంస్కరణలు కాలగర్భంలో కలిసిపోతాయి. ధరణిని ఎత్తేస్తే మళ్లీ భూముల రికార్డుల నిర్వహణ గ్రామస్థాయి, మండలస్థాయి అధికారుల చేతుల్లోకి వెళ్తుంది. భూములు కొత్తగా కొనుగోలు చేసేవారికి చుక్కలు కనిపిస్తాయి. పాస్‌బుక్‌ పొందాలంటే సవాలక్ష అడ్డంకులు కల్పిస్తారు. కాంగ్రెస్‌ పాలనలో డబ్బు ఇవ్వకుంటే రైతు దరఖాస్తు చెత్తబుట్టలోకి చేరేది. ధరణి పోర్టల్‌ను ప్రారంభించిన తర్వాత ప్రభుత్వం పెండింగ్‌ మ్యుటేషన్లకు అవకాశం కల్పిస్తే.. ఏకంగా 1.80 లక్షల దరఖాస్తులు రావడమే నాటి అవినీతికి, అవగాహన లేమికి నిదర్శనం. ఈ సమస్యలన్నింటికీ కేసీఆర్‌ చేపట్టిన సంస్కరణలు చెక్‌ పెట్టాయి.

• 2017లో భూ రికార్డుల ప్రక్షాళణకు శ్రీకారం చుట్టారు. రాష్ట్రవ్యాప్తంగా ఉన్న 2.56 కోట్ల ఎకరాల భూముల రికార్డులను డిజిటలైజ్‌ చేశారు. కొత్త పాస్‌ పుస్తకాలను మంజూరు చేశారు. రికార్డులను ఇష్టం వచ్చినట్టు మార్చే సంస్కృతికి చరమగీతం పాడారు.
• పాస్‌ పుస్తకాల్లో ఉన్న కాలమ్‌లన్నింటినీ తొలగించి, హక్కుదారు కాలం మాత్రమే ఉంచారు. మరో పేరు చేర్చే అవకాశం లేకుండా చేశారు.
• రికార్డులు డిజిటలైజ్‌ కావటంతో వీఆర్వో వ్యవస్థను రద్దు చేశారు. తమను పీల్చి పిప్పిచేస్తున్న వ్యవస్థ నుంచి రైతులకు విముక్తి కలిగింది.
• కొత్త రెవెన్యూ చట్టం, ధరణి పోర్టల్‌తో అధికారుల విచక్షణాధికారాలను కత్తిరించారు. రైతుకు తెలియకుండా, వేలిముద్ర వేయకుండా పట్టా మార్పిడి జరగకుండా చేశారు. ఎవరూ రికార్డును మార్చే పరిస్థితి లేదు.
• లావాదేవీలన్నీ ఆన్‌లైన్‌లో జరుగుతున్నాయి. అప్పటికప్పడే రిజిస్ట్రేషన్‌, మ్యుటేషన్‌ జరిగిపోతున్నది. అవినీతికి చెక్‌ పడింది.
• రికార్డులన్నీ సురక్షితంగా ఉండటంతో భూ వివాదాలకు చెక్‌ పడింది. రైతులు గుండెల మీద చేయి వేసుకొని నిద్రపోతున్నారు.
• కాంగ్రెస్‌కు ఓటేస్తే ఈ సంస్కరణలన్నీ సమాధి అవుతయ్‌. రైతులను ఆగం చేసే పాత వ్యవస్థలు వస్తాయి.