వచ్చే రెండ్రోజులు అత్యంత భారీ వర్షాలు

రానున్న ఐదురోజులు రాష్ట్రవ్యాప్తంగా విస్తారంగా వర్షాలు కురిసే అవకాశం ఉన్నదని హైదరాబాద్‌ వాతావరణ కేంద్రం సోమవారం ఒక ప్రకటనలో వెల్లడించింది.

• హైదరాబాద్‌ వాతావరణ కేంద్రం వెల్లడి

హైదరాబాద్‌, ఆగస్టు 11 (నమస్తే తెలంగాణ): రానున్న ఐదురోజులు రాష్ట్రవ్యాప్తంగా విస్తారంగా వర్షాలు కురిసే అవకాశం ఉన్నదని హైదరాబాద్‌ వాతావరణ కేంద్రం సోమవారం ఒక ప్రకటనలో వెల్లడించింది. ప్రస్తుతం కొనసాగుతున్న ఉపరితల ఆవర్తనం కారణంగా వర్షాలు కురుస్తున్నాయని.. 13న మధ్య బంగాళాఖాతంలో మరో అల్పపీడనం ఏర్పడే అవకాశం ఉండటంతో 13,14 తేదీల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరించింది. సోమవారం ఆదిలాబాద్‌, కుమ్రంభీం ఆసిఫాబాద్‌, హనుమకొండ, వరంగల్‌, మహబూబాబాద్‌ జిల్లాల్లో భారీ వర్షాలు కురిశాయని, దీంతో ఆయా జిల్లాలకు ఎల్లో అలర్ట్‌ జారీ చేసినట్టు పేర్కొన్నది.

మంగళవారం హైదరాబాద్‌లో తేలికపాటి నుంచి మోస్తరు వర్షాలు కురిసే అవకాశం ఉన్నదని, మిగతా అన్నిచోట్ల ఉరుములు, మెరుపులు, ఈదురుగాలులతో కూడిన వర్షాలు కురుస్తాయని వివరించింది. భారీ నుంచి అతి భారీ, అత్యంత భారీ వర్షాలు కురిసే అవకాశమున్న క్రమంలో ప్రభుత్వ యంత్రాంగాలు అప్రమత్తంగా ఉండాలని సూచించింది. వర్షాలు కురిసే సమయంలో అత్యవసరమైతే తప్ప బయటికి వెళ్లొద్దని తెలిపింది. ఇప్పటికే జీహెచ్‌ఎంసీ, హైడ్రా, మాన్సూన్‌, డీఆర్‌డీఎఫ్‌, పోలీస్‌ సిబ్బందికి ముందస్తు హెచ్చరికలు జారీచేసినట్టు వెల్లడించింది. ప్రజలు అప్రమత్తంగా ఉండాలంటూ సూచించింది.

గడిచిన 24గంటల్లో యదాద్రి భువనగిరి, వికారాబాద్‌, జోగులాంబ గద్వాల, నిర్మల్‌, ఆదిలాబాద్‌ జిల్లాల్లో వర్షాలు కురిసినట్టు తెలిపింది. అత్యధికంగా యాదాద్రి భువనగిరి జిల్లా బీబీనగర్‌లో 8.55 సెం.మీ, బొమ్మలరామారంలో 6.37 సెం.మీ, వికారాబాద్‌ జిల్లా బొంరాస్‌పేటలో 7.91 సెం.మీ, జోగులాంబ గద్వాల జిల్లా అలంపూర్‌లో 7.91 సెం.మీ, నిర్మల్‌ జిల్లా నిర్మల్‌రూరల్‌లో 7.35 సెం.మీ, ఆదిలాబాద్‌ జిల్లా ఇచ్చోడలో 7.25 సెం.మీ, నారాయణపేట జిల్లా కోస్గీలో 6.84 సెం.మీ వర్షపాతం నమోదైనట్టు కేంద్రం వెల్లడించింది.