సైట్‌ విజిట్‌తో అక్రమాలకు ఆజ్యం..సింగరేణిలో పెద్దఎత్తున నిధుల గోల్‌మాల్‌

తెలంగాణకు తలమానికంగా ఉన్న సింగరేణి కాలరీస్‌ కంపెనీ లిమిటెడ్‌ (ఎస్‌సీసీఎల్‌)లో కొన్ని నెలలుగా నిబంధనలకు విరుద్ధంగా టెండర్లు, కొనుగోళ్లు, పాలసీ నిర్ణయాలు జరుగుతున్నాయని బీఆర్‌ఎస్‌ నేతలు గవర్నర్‌ జిష్ణుదేవ్‌ వర్మకు వివరించారు.

 

• సైట్‌విజిట్‌తో టెండర్‌ ఫలితాల్లో వ్యత్యాసాలు
• ధరలు పెంచి పేలుడు పదార్థాల కొనుగోలు
• సీఎస్‌ఆర్‌ నిధులు కోట్లల్లో దుర్వినియోగం
• ఆర్థిక అంశాల్లో విజిలెన్స్‌ లేనందువల్లే కుట్రలు
• పారదర్శకత, సంస్థాగత పర్యవేక్షణ ప్రశ్నార్థకం
• పీఎస్‌యూ నిబంధనలకు సర్కార్‌ పాతర
• గవర్నర్‌కు ఆధారాలు అందజేసిన బీఆర్‌ఎస్‌

హైదరాబాద్‌, జనవరి 27 (నమస్తే తెలంగాణ) : తెలంగాణకు తలమానికంగా ఉన్న సింగరేణి కాలరీస్‌ కంపెనీ లిమిటెడ్‌ (ఎస్‌సీసీఎల్‌)లో కొన్ని నెలలుగా నిబంధనలకు విరుద్ధంగా టెండర్లు, కొనుగోళ్లు, పాలసీ నిర్ణయాలు జరుగుతున్నాయని బీఆర్‌ఎస్‌ నేతలు గవర్నర్‌ జిష్ణుదేవ్‌ వర్మకు వివరించారు. ఈ వ్యవహారంపై సమగ్ర విచారణ జరిపించాలని ప్రత్యక్షంగా కలిసి వినతిపత్రాన్ని అందించారు. సింగరేణిలో ఆర్థిక పరమైన అంశాలపై విజిలెన్స్‌ లేదని, ప్రజలు, కార్మికుల సొమ్మును ఇష్టారీతిన ఖర్చు చేస్తున్నారని తెలిపారు. 2023 డిసెంబర్‌ నుంచి టెండరింగ్‌, వస్తుసామగ్రి సేకరణ, విధాన నిర్ణయాలు, కార్పొరేట్‌ సామాజిక బాధ్యత (సీఎస్‌ఆర్‌) అంశాలు ప్రభుత్వ రంగ సంస్థల (పీఎస్‌యూ) నిబంధనలకు అనుగుణంగా జరగడం లేదని చెప్పారు. దీని ఫలితంగా సింగరేణి సంస్థకు తీవ్రంగా ఆర్థిక నష్టం జరుగుతున్నదని.. పారదర్శకత, సంస్థాగత పర్యవేక్షణ ప్రశ్నార్థకంగా మారిందని తెలిపారు.

వినతిపత్రంలో ముఖ్యమైన అంశాలు

• సైట్‌ విజిట్‌ కన్ఫర్మేషన్‌ సర్టిఫికెట్‌ : మే 2025 నుంచి ఓపెన్‌ కాస్ట్‌ (ఓబీ) టెండర్లలో పాల్గొనడానికి ఎస్‌సీసీఎల్‌ ప్రతినిధుల ద్వారా ‘సైట్‌ విజిట్‌ కన్ఫర్మేషన్‌ సర్టిఫికెట్‌’ తప్పనిసరి అనే కొత్త నిబంధన తెచ్చారు. ఇది అనేక అనుమానాలకు దారితీస్తున్నది. గతంలో ఎన్నడూ లేని ఈ నిబంధనను ఇప్పుడు అకస్మాత్తుగా అమలు చేయడం వెనుక ఆంతర్యం ఏమిటి? కోల్‌ ఇండియా వంటి సంస్థల్లో కూడా ఇలాంటి నిబంధనల్లేవు. కేవలం రెండు మూడు ఏజెన్సీలకు మాత్రమే సర్టిఫికెట్లు జారీ చేసి, మిగిలిన వారిని కావాలనే నిరోధించారనే ఆరోపణలు ఉన్నాయి.
• టెండర్‌ ఫలితాల్లో వ్యత్యాసాలు : జనవరి 2025లో భూపాలపల్లి ఓపెన్‌ కాస్ట్‌ టెండర్లలో ఈ నిబంధన లేనప్పుడు ఆరోగ్యకరమైన పోటీ జరిగి, అంచనా ధర కంటే 7% తకువకు పనులు ఖరారయ్యాయి. కానీ మే 2025లో వీ కే ఓపెన్‌ కాస్ట్‌ టెండర్లలో ఈ నిబంధన వల్ల పోటీ తగ్గి, అంచనా వ్యయం కంటే ఎకువ ధరలకు పనులు కేటాయించారు.
• టెండర్ల రద్దు, అధిక ధరలకు కేటాయింపు: తకువ ధరలకు ఖరారైన పాత టెండర్లను రద్దు చేసి, కొత్త నిబంధనలతో అధిక ధరలకు తిరిగి టెండర్లు పిలువడం వల్ల సింగరేణిపై అనవసర ఆర్థిక భారం పడుతున్నది.
• సోలార్‌ పవర్‌ ప్రాజెక్టుల కొనుగోళ్లు: 107 మెగావాట్ల సోలార్‌ ప్రాజెక్టుల్లో ఎంఎస్‌ఎంఈలను తప్పించి, జాతీయ సగటు కంటే భారీ ధరలకు కాంట్రాక్టులిచ్చారు. దీనివల్ల సుమారు రూ.200-250 కోట్ల మేర అదనపు భారం పడే అవకాశం ఉన్నది.
• పేలుడు పదార్థాల కొనుగోలు: ఇతర ప్రభుత్వ సంస్థల కంటే 30% అధిక ధరలకు పేలుడు పదార్థాలను కొనుగోలు చేస్తున్నట్టు సమాచారం. దీన్ని వ్యతిరేకించిన అధికారులపై చర్యలు తీసుకోవడం విజిలెన్స్‌ పరంగా ఆందోళన కలిగిస్తున్నది.
• భారీ ఓపెన్‌ కాస్ట్‌ టెండర్ల వాయిదా: మణుగూరు ప్రకాశం ఖని వంటి రూ.1,000 కోట్లకు పైబడిన టెండర్లను ఎలాంటి కారణం లేకుండా పదే పదే వాయిదా వేయడం వెనుక అవినీతి కోణం ఉన్నదనే అనుమానాలు వ్యక్తమవుతున్నాయి.
• డీజిల్‌ కొనుగోలులో మార్పు: నేరుగా చమురు సంస్థల నుంచి కొనే విధానాన్ని మార్చివేసి, కాంట్రాక్టర్లకే ఆ బాధ్యత అప్పగించడం వల్ల ఖర్చులు పెరగడమే కాకుండా అనుభవం లేని ఏజెన్సీలు రంగంలోకి వస్తున్నాయి.
• సీఎస్‌ఆర్‌ నిధుల దుర్వినియోగం సింగరేణి పరిసర ప్రాంతాల అభివృద్ధికి వాడాల్సిన సీఎస్‌ఆర్‌ నిధులను, సంబంధం లేని లియోనెల్‌ మెస్సీ ఫుట్‌బాల్‌ ఎగ్జిబిషన్‌ మ్యాచ్‌ స్పాన్సర్‌ షిప్‌ కోసం కేటాయించడం నిబంధనలకు విరుద్ధం.
• పర్యవేక్షణ లోపం: సంస్థకు పూర్తిస్థాయి చైర్మన్‌, మేనేజింగ్‌ డైరెక్టర్‌ లేకపోవడం వల్ల జవాబుదారీతనం లోపించి, ఇలాంటి అక్రమాలు జరుగుతున్నాయి. ప్రజా నిధుల రక్షణ, సంస్థ ప్రతిష్ట దృష్ట్యా గవర్నర్‌ తక్షణ చర్యలు తీసుకోవాలని కోరుతున్నాం.

సమగ్ర విచారణ చేయించండి
ఎస్‌సీసీఎల్‌లో జరుగుతున్న అక్రమాలపై వెంటనే తగిన సంస్థాగత విచారణ జరిపించాలని బీఆర్‌ఎస్‌ నేతలు గవర్నర్‌ను కోరారు. పారదర్శకమైన, పోటీతత్వంతో కూడిన టెండర్‌ విధానాన్ని పునరుద్ధరించాలని విజ్ఞప్తి చేశారు. ‘సైట్‌ విజిట్‌ సర్టిఫికెట్‌’ నిబంధనతో పిలిచిన అన్ని టెండర్లను రద్దు చేసి సమీక్షించాలని కోరారు. ప్రకాశం ఖని వంటి భారీ టెండర్ల వాయిదాలపై విచారణ చేపట్టాలని, సంస్థకు సమర్థవంతమైన నాయకత్వాన్ని, పటిష్ఠమైన పర్యవేక్షణను ఏర్పాటు చేయాలని విజ్ఞప్తి చేశారు. కార్యక్రమంలో బీఆర్‌ఎస్‌ ముఖ్యనేతలు కేటీఆర్‌, హరీశ్‌రావు, సబితా ఇంద్రారెడ్డి, తలసాని శ్రీనివాస్‌యాదవ్‌, మల్లారెడ్డి, మధుసూదనాచారి, సురభి వాణీదేవి, ఎల్‌.రమణ, దీవకొండ దామోదర్‌రావు, వద్దిరాజు రవిచంద్ర, పల్లా రాజేశ్వర్‌రెడ్డి, కేపీ వివేకానందగౌడ్‌, బండారి లక్ష్మారెడ్డి, మర్రి రాజశేఖర్‌రెడ్డి, కల్వకుంట్ల సంజయ్‌, మాణిక్‌రావు, సునీతా లక్ష్మారెడ్డి, కాలేరు వెంకటేశ్‌, పోచంపల్లి శ్రీనివాస్‌రెడ్డి తదితరులు పాల్గొన్నారు.