Congress | ప్రభుత్వ పథకాలకు కాంగ్రెస్‌ ‘మార్క్‌’ పేర్లు.. బీఆర్‌ఎస్‌ ప్రభుత్వ ఆనవాళ్లను చెరిపేందుకే!!

బీఆర్‌ఎస్‌ ప్రభుత్వ ఆనవాళ్లను చెరిపివేసే క్రమంలో ప్రభుత్వ పథకాల్లో భారీగా మార్పులు, చేర్పులు చేసేందుకు రాష్ట్ర ప్రభుత్వం సిద్ధమైంది. గత ప్రభుత్వం అమలు చేసిన పథకాల్లో కొన్నింటిని పూర్తిగా తొలగించాలని, మరికొన్నింటి పేర్లు మార్చి ‘కాంగ్రెస్‌' మార్కు చూపెట్టాలని నిర్ణయించింది.

• పథకాల పేర్ల మార్పునకు సిద్ధమైన ప్రభుత్వం
• ఇందిర, రాజీవ్‌, అమ్మ వంటివి వచ్చేలా ప్లాన్‌
• దాదాపు అన్ని శాఖల్లో సిద్ధమైన నివేదికలు
• జూన్‌ 4 తర్వాత వరుసగా ప్రకటనలు

Congress | హైదరాబాద్‌, జూన్‌ 2 (నమస్తే తెలంగాణ): బీఆర్‌ఎస్‌ ప్రభుత్వ ఆనవాళ్లను చెరిపివేసే క్రమంలో ప్రభుత్వ పథకాల్లో భారీగా మార్పులు, చేర్పులు చేసేందుకు రాష్ట్ర ప్రభుత్వం సిద్ధమైంది. గత ప్రభుత్వం అమలు చేసిన పథకాల్లో కొన్నింటిని పూర్తిగా తొలగించాలని, మరికొన్నింటి పేర్లు మార్చి ‘కాంగ్రెస్‌’ మార్కు చూపెట్టాలని నిర్ణయించింది. ఇందిరాగాంధీ, రాజీవ్‌గాంధీ, హస్తం పేర్లు కలిసొచ్చేలా పథకాల పేర్లను మార్చనున్నట్టు తెలిసింది.

ఈ మేరకు ఇప్పటికే ఆయా పథకాల జాబితాను అన్ని శాఖలు సిద్ధం చేసినట్టు తెలుస్తున్నది. ఇప్పటికే కొన్ని పథకాలను అంతర్గతంగా కొత్త పేర్లతో పిలుచుకుంటున్నారని, ఎన్నికల కోడ్‌ పూర్తయ్యాక అధికారికంగా ఉత్తర్వులు జారీ అవుతాయని చెప్తున్నారు. రద్దు చేయబోయే పథకాలనూ అధికారికంగా వెల్లడించే అవకాశం ఉన్నది.

• ఆసరా పెన్షన్ల పేరును ‘అభయ హస్తం’గా మార్చనున్నారు. ఇప్పటికే జనవరి నుంచి శాఖాపరంగా అంతర్గతంగా అభయ హస్తం పెన్షన్లు అనే సంబోధిస్తున్నారు. కలెక్టర్లు, ఇతర అధికారులకు ఇచ్చే మెసేజ్‌లలోనూ అభయ హస్తం అని పిలుస్తున్నారు.
• దేశంలోనే తొలిసారి రైతులకు పెట్టుబడి సాయాన్ని అందించేందుకు రైతుబంధును ప్రవేశపెట్టిన సంగతి తెలిసిందే. ఈ పథకాన్ని రైతు భరోసాగా మార్చి అమలు చేస్తామని కాంగ్రెస్‌ మొదటి నుంచే చెప్తున్నది. ఇటీవల వేసిన పెట్టుబడి సాయం సమయంలోనూ అంతర్గతంగా రైతుభరోసా పేరుతోనే పిలుచుకున్నారు.
• వైద్యారోగ్యశాఖలో అమలవుతున్న కేసీఆర్‌ కిట్‌ పథకాన్ని తాత్కాలికంగా ‘మదర్‌ అండ్‌ చైల్డ్‌ హెల్త్‌ కిట్‌’ పేరుతో అమలు చేస్తున్నారు. దీన్ని కేంద్రప్రభుత్వ పథకం ప్రధానమంత్రి మాతృవందన యోజనతో కలిపి కొత్త పేరుతో అమలు చేయాలని నిర్ణయించారట. ఇందిరమ్మ కిట్‌ లేదా అమ్మ కిట్‌ పేర్లను పరిశీలిస్తున్నట్టు సమాచారం.
• దళితులు ఆర్థికంగా స్వావలంబన సాధించేందుకు కేసీఆర్‌ ప్రభుత్వం దళితబంధు పథకాన్ని ప్రవేశపెట్టిన సంగతి తెలిసిందే. దీనిని ప్రస్తుతం ప్రభుత్వం హోల్డ్‌లో పెట్టేసింది. దీనిని పేరు మార్చి అంబేద్కర్‌ అభయహస్తం పేరుతో ప్రవేశపెడుతామని ఇప్పటికే కాంగ్రెస్‌ ప్రకటించింది.
• ఏటా మొక్కలను నాటి, పచ్చదనం పెంచేందుకు ఉద్దేశించిన తెలంగాణకు హరితహారం పథకం పేరును ‘ఇందిర వనప్రభ’గా మార్చుతారనే ప్రచారం జోరుగా సాగుతున్నది.
• ఇప్పటికే డబుల్‌ బెడ్రూం ఇండ్ల పథకాన్ని నిలిపివేసి.. ఇందిరమ్మ ఇండ్లుగా మార్చిన సంగతి తెలిసిందే.
• మన ఊరు మన బడి కార్యక్రమాన్ని ‘అమ్మ ఆదర్శ పాఠశాలలు’గా మార్చి అమలు చేస్తున్నారని చెప్తున్నారు.
• రెవెన్యూ సంస్కరణల్లో భాగంగా తీసుకొచ్చిన ‘ధరణి’ పోర్టల్‌ను రద్దు చేసి ‘మా భూమి’ పోర్టల్‌ను ప్రవేశపెడతామని ఎన్నికల సమయంలో ప్రచారం చేశారు. అయితే ధరణిని పూర్తిగా రద్దు చేయడం సాధ్యం కాదని తేలడంతో, త్వరలో ‘మా భూమి’గా పేరు మార్చనున్నారు.
• విదేశాలకు వెళ్లి చదువుకోవాలనుకునే విద్యార్థులకు ప్రభుత్వం రూ.20 లక్షల వరకు స్కాలర్‌షిప్‌ అందించే విదేశీ విద్యానిధి పథకానికి సైతం కాంగ్రెస్‌ మార్క్‌ పేరు తేవాలని ప్రతిపాదించినట్టు తెలిసింది.