ప్లాట్ల వేలంతో రూ.65 కోట్ల ఆదాయం.. హౌసింగ్‌ బోర్డు వైస్‌ చైర్మన్‌ గౌతం వెల్లడి

హైదరాబాద్‌ పరిసర ప్రాంతాల్లోని హౌజింగ్‌ బోర్డు భూములు మరోసారి రికార్డు స్థాయి ధరలు పలికాయి. వివిధ ప్రాంతాల్లోని ఇంటి స్థలాలు (ప్లాట్లు), కమర్షియల్‌ స్థలాలు, అపార్ట్‌మెంట్‌ ఫ్లాట్లు కలిపి 11 ఆస్తులకు సోమవారం బహిరంగ వేలం నిర్వహించడంతో రూ.65.02 కోట్ల ఆదాయం సమకూరినట్టు హౌసింగ్‌ బోర్డు వైస్‌ చైర్మన్‌, హౌసింగ్‌ శాఖ కమిషనర్‌ వీపీ గౌతం వెల్లడించారు.

హైదరాబాద్‌, జూన్‌ 23 (నమస్తే తెలంగాణ): హైదరాబాద్‌ పరిసర ప్రాంతాల్లోని హౌజింగ్‌ బోర్డు భూములు మరోసారి రికార్డు స్థాయి ధరలు పలికాయి. వివిధ ప్రాంతాల్లోని ఇంటి స్థలాలు (ప్లాట్లు), కమర్షియల్‌ స్థలాలు, అపార్ట్‌మెంట్‌ ఫ్లాట్లు కలిపి 11 ఆస్తులకు సోమవారం బహిరంగ వేలం నిర్వహించడంతో రూ.65.02 కోట్ల ఆదాయం సమకూరినట్టు హౌసింగ్‌ బోర్డు వైస్‌ చైర్మన్‌, హౌసింగ్‌ శాఖ కమిషనర్‌ వీపీ గౌతం వెల్లడించారు. గచ్చిబౌలిలోని 3,271 చదరపు గజాలు, చింతల్‌లోని 799.98 చదరపు గజాల స్థలాలతోపాటు నిజాంపేటలో 1,653 చదరపు అడుగుల విస్తీర్ణంలోని ఫ్లాట్లకు కేపీహెచ్‌బీ కాలనీ కమ్యూనిటీ హాల్‌లో నిర్వహించిన వేలంలో 55 మంది పాల్గొన్నట్టు తెలిపారు. గచ్చిబౌలిలోని ఓ కమర్షియల్‌ ప్లాట్‌ రూ.33 కోట్లు, మరో చోట ఇంకో ప్లాట్‌ రూ.13.51 కోట్లు, రెండు ఎంఐజీ ప్లాట్లు దాదాపు రూ.4.50 కోట్ల ధర పలికినట్టు వివరించారు.

వేలం వేసిన స్థలాలు

• గచ్చిబౌలి హౌజింగ్‌ బోర్డు కాలనీలోని 1,487 గజాల కమర్షియల్‌ ల్యాండ్‌ను చదరపు గజానికి రూ.2.22 లక్షలు చొప్పున వెచ్చించి రూ.33 కోట్లకు కొనుగోలు చేశారు. ఈ స్థలం ఆఫ్‌ సెట్‌ ధరను చదరపు గజానికి రూ.1.20 లక్షలుగా నిర్ణయించగా వేలంలో అది రూ.2.22 లక్షలు పలకడం విశేషం.
• గచ్చిబౌలిలోని మరో 1,200 గజాల పాఠశాల భూముల ఆఫ్‌ సెట్‌ ధరను చదరపు గజానికి రూ.80 వేలుగా నిర్ధారించగా.. వేలంలో రూ.1.12 లక్షలకు కొనుగోలు చేశారు.
• గచ్చిబౌలిలోనే మరో 2 ఎంఐజీ ప్లాట్లు వరుసగా చదరపు గజం రూ.1.86 లక్షలు, రూ.1.32 లక్షల ధర పలికాయి. దీంతో ఒక గచ్చిబౌలి ప్రాంతంలోని స్థలాల వేలం ద్వారానే హౌజింగ్‌ బోర్డుకు దాదాపు రూ.55.57 కోట్ల ఆదాయం సమకూరింది.
• కుత్బుల్లాపూర్‌ మండలంలోని చింతల్‌ ప్రాంతంలో 10 ప్లాట్లను వేలం వేశారు. వాటిలో కేవలం మూడు (నంబర్‌ 113, 114, 115) ప్లాట్ల ద్వారానే సుమారు రూ.8.11 కోట్ల ఆదాయం వచ్చింది.
• నిజాంపేట-బాచుపల్లిలోని 4 ప్లాట్లను వేలంలో దాదాపు రూ.70 లక్షలకు కొనుగోలు చేశారు.