Ganesh Puja | గంటలోగా పూజ పూర్తిచేయాలి.. గణేశ్‌ మండపాలపై హైకోర్టు తాజా మార్గదర్శకాలు

Ganesh Puja | వినాయక చవితి సందర్భంగా గణేశ్‌ మండపాల వద్ద మితిమీరిన సౌండ్‌తో ఉండే మైక్‌లను ఏర్పాటు చేయవద్దంటూ హైకోర్టు మంగళవారం మార్గదర్శకాలను జారీచేసింది.

Ganesh Puja |  హైదరాబాద్‌, ఆగస్టు 26, (నమస్తే తెలంగాణ): వినాయక చవితి సందర్భంగా గణేశ్‌ మండపాల వద్ద మితిమీరిన సౌండ్‌తో ఉండే మైక్‌లను ఏర్పాటు చేయవద్దంటూ హైకోర్టు మంగళవారం మార్గదర్శకాలను జారీచేసింది.

తన ఇంటి వద్ద అనుమతి లేకుండా గణేశ్‌ మండపాన్ని ఏర్పాటు చేశారంటూ సికింద్రాబాద్‌ ఎంఈఎస్‌ కాలనీకి చెందిన 80 ఏళ్ల వృద్ధురాలు ప్రభావతి పిటిషన్‌ దాఖలు చేశారు. ఆమె అభ్యంతరాలను పరిగణనలోకి తీసుకున్నాకే మండపానికి అనుమతులు ఇవ్వాలని సోమవారం హైకోర్టు ఆదేశించింది. అయితే, హైకోర్టు ఉత్తర్వులను ఉల్లఘించి మండపాన్ని ఏర్పాటు చేశారంటూ ఆమె కోర్టు ధికరణ పిటిషన్‌ దాఖలు చేశారు. దీనిని జస్టిస్‌ ఎన్‌వీ శ్రావణ్‌కుమార్‌ మంగళవారం విచారించారు. పండుగ ఆహ్లాదకర వాతావరణలో జరగాలని, ప్రజలను ఇబ్బంది పెట్టకుండా జరుపుకోవాలంటూ మార్గదర్శకాలు జారీచేశారు.

మార్గదర్శకాలు ఇవే

• విగ్రహాల నిమజ్జనం, ఊరేగింపులకు సంబంధించి హైకోర్టు గతంలో ఇచ్చిన వివిధ ఉత్తర్వులను అమలు చేయాలి.
• నిమజ్జనాల తర్వాత ప్రాంగణాలను నిర్వాహకులే శుభ్రం చేయాలి. కాలుష్యాన్ని తగ్గించేందుకు నిర్వాహకులు పర్యావరణ అనుకూల విగ్రహాలు, పూజా వస్తువులను వినియోగించాలి.
• మండపాల వద్ద నిర్వాహకులు అందుబాటులో ఉండాలి. అనుమతులు మంజూరు చేసే ముందు శబ్ద, పర్యావరణ నియమాలను పాటించాలి.