భూదాన్‌ దందాపై కమిషన్‌ వేస్తారో లేదో చెప్పండి.. రాష్ట్రానికి హైకోర్టు ఆదేశం

రంగారెడ్డి జిల్లా మహేశ్వరం మండలం నాగారంలోని భూదాన్‌ భూముల్లో జరిగిన అక్రమ లావాదేవీలపై ప్రభుత్వం విచారణ కమిషన్‌ వేస్తుందో లేదో చెప్పాలని హైకోర్టు రాష్ట్ర ప్రభుత్వాన్ని కోరింది.

హైదరాబాద్‌, జూలై 18 (నమస్తే తెలంగాణ): రంగారెడ్డి జిల్లా మహేశ్వరం మండలం నాగారంలోని భూదాన్‌ భూముల్లో జరిగిన అక్రమ లావాదేవీలపై ప్రభుత్వం విచారణ కమిషన్‌ వేస్తుందో లేదో చెప్పాలని హైకోర్టు రాష్ట్ర ప్రభుత్వాన్ని కోరింది. ఈ మేరకు నోటీసులు జారీచేసింది.

మహేశ్వరం మండలం, నాగారం లోని సర్వే నం 194, 195లో తండ్రి ద్వారా సంక్రమించిన 10.17 ఎకరాలను అధికారులు ప్రైవేటు వ్యక్తుల పేరిట మార్చేశారని ఆరోపిస్తూ అదే గ్రామానికి చెందిన వీ రాములు హైకోర్టును ఆశ్రయించారు. ఈ వ్యాజ్యంపై జస్టిస్‌ కే లక్ష్మణ్‌ విచారణ జరిపారు. తదుపరి విచారణను 28కి వాయిదా వేశారు.