ప్రభుత్వంపై పోరుకు గురుకుల జేఏసీ

బదిలీలు, పదోన్నతుల్లో ఉన్నతాధికారుల అనాలోచిత నిర్ణయాలు, ప్రభుత్వం పట్టించుకోని పరిస్థితులు ఉండటంతో సర్కారుపై ఐక్యంగా పోరుబావుటా ఎగరేయాలని గురుకుల సొసైటీల్లోని సంఘాలు నిర్ణయించుకున్నాయి. ఈ మేరకు 11 సంఘాలు కలిసి గురుకుల విద్యాజేఏసీ ఏర్పాటు చేస్తున్నట్టు ప్రకటించాయి.

• 11 సంఘాలు కలిసి ఏర్పాటు
• బదిలీలు, పదోన్నతుల్లో అక్రమాలను సవరించాలి
• సస్పెండ్‌ చేసిన టీచర్‌ను విధుల్లోకి తీసుకోవాలి
• తక్షణమే సమస్యలు పరిష్కరించాలని అల్టిమేటం

హైదరాబాద్‌, ఆగస్టు 26 (నమస్తే తెలంగాణ): బదిలీలు, పదోన్నతుల్లో ఉన్నతాధికారుల అనాలోచిత నిర్ణయాలు, ప్రభుత్వం పట్టించుకోని పరిస్థితులు ఉండటంతో సర్కారుపై ఐక్యంగా పోరుబావుటా ఎగరేయాలని గురుకుల సొసైటీల్లోని సంఘాలు నిర్ణయించుకున్నాయి. ఈ మేరకు 11 సంఘాలు కలిసి గురుకుల విద్యాజేఏసీ ఏర్పాటు చేస్తున్నట్టు ప్రకటించాయి. జేఏసీలో టీఎస్‌డబ్ల్యూఆర్టీఈఏ అధ్యక్షుడు సీహెచ్‌ బాలరాజు, స్టాఫ్‌ అసోసియేషన్‌ అధ్యక్షుడు ప్రభుదాస్‌, టీఎస్‌డబ్ల్యూఆర్టీయూ బాలస్వామి, ఏటీజీఆర్‌ఐఈడబ్ల్యూఏ యాదయ్య, ప్రిన్సిపాల్స్‌ అసోసియేషన్‌ చలపతి, టీటీఆర్‌ఈఐటీఏ రుషికేశ్‌కుమార్‌, టీఆర్‌ఈఐటీఏ గోవర్ధన్‌రెడ్డి, టీఎస్సీ, ఎస్టీ ఎంప్లాయీస్‌ అసోసియేషన్‌ ఝాన్సీరాణి, టీఆర్‌డీసీఈఏ సాంబలక్ష్మి, టీజీఎస్‌డబ్ల్యూఆర్‌ఈటీఎల్‌ఏ ఆవుల సైదులు, పీడీ అసోసియేషన్‌ వీ చందర్‌ భాగస్వాములుగా ఉన్నారు. అంతేకాదు జేఏసీ ఆధ్వర్యంలో తక్షణం పరిష్కరించాల్సిన పలు డిమాండ్లను ప్రభుత్వం ముందుపెట్టారు.

గురుకుల విద్యాజేఏసీ డిమాండ్లు ఇవే..

• జీవో 80కి విరుద్ధంగా, సొసైటీ మార్గదర్శాలను పట్టించుకోకుండా సాంఘిక సంక్షేమ గురుకుల సొసైటీలో ఇటీవల నిర్వహించిన బదిలీలు, పదోన్నతుల్లో అవకతవకలు జరిగాయి. వాటిపై పూర్తిస్థాయి విచారణ నిర్వహించాలి. దొర్లిన తప్పులన్నీ సవరించాలి. నష్టపోయిన టీచర్లకు న్యాయం చేయాలి.
• అశాస్త్రీయంగా ఉన్న ప్రస్తుత నూతన టైం టేబుల్‌ను ఉపసంహరించుకోవాలి. ఉదయం 9 గంటల నుంచి సాయంత్రం 4.30 గంటలకు టైం టేబుల్‌ మార్చాలి.
• నాన్‌టీచింగ్‌ ఫోర్త్‌క్లాస్‌ ఎంప్లాయీస్‌, జూనియర్‌ అసిస్టెంట్లకు ట్రాన్స్‌ఫర్‌ కౌన్సెలింగ్‌ ఆర్డర్లను విడుదల చేయాలి.
• జీవో 317, ప్రమోషన్స్‌, బదిలీలు, ఎక్సెస్‌ స్టాఫ్‌ 2 కౌన్సెలింగ్‌ ఇవ్వాలి.
• 317 స్టేటస్‌ కో తెచ్చుకున్నవాళ్లను యథాస్థానాల్లో కొనసాగించాలి. స్పౌజ్‌, లోకల్‌, విడో, మెడికల్‌, మెంటర్‌ రిటార్డెడ్‌, డిసెబిలిటీ కేసులను సబ్‌కమిటీ నిర్ణయం వచ్చేవరకు వారి స్థానాల్లోనే కొనసాగించాలి.
• పార్ట్‌టైం, సీవోఈలు, స్పోర్ట్స్‌ అకాడమీ కోచ్‌లు, స్పెషల్‌ సూల్లోని ఉద్యోగులకు సత్వరమే జీతాలు చెల్లించాలి.
• మార్చి నుంచి రిటైరైన ఉద్యోగులందరికీ పెన్షన్‌ బిల్లులు ఏజీ ఆఫీసుకు పంపాలి.
• బీఐఈ నిర్ణయం ప్రకారం ఆగస్టు 31లోగా ఇంటర్‌ అడ్మిషన్లు పూర్తి చేయాలి.
• ఇటీవల 142 మంది డిస్‌లోకేట్‌ అభ్యర్థులకు జారీచేసిన వార్నింగ్‌ను బేషరతుగా ఉపసంహరించుకోవాలి.
• టీజీటీ సోషల్‌ స్టడీస్‌ ఉపాధ్యాయురాలు విజయ నిర్మల సస్పెన్షన్‌ను రద్దు చేయాలి.
• ఉద్యోగులు, ఉపాధ్యాయులకు ప్రతి నెల 1న జీతాలు చెల్లించాలి.