చేనేతపై జీఎస్టీ.. మోదీ ఖ్యాతి

చేనేత ఉత్పత్తులపై కేంద్రం విధించిన 5 శాతం జీఎస్టీని వెంటనే రద్దు చేయాలని రాష్ట్రంలోని పలు చేనేత సహకార సంఘాల అధ్యక్ష, కార్యవర్గసభ్యులు డిమాండ్‌ చేశారు.

• 5 శాతం పన్నును రద్దు చేయాలి
• చేనేత సహకార సంఘాల డిమాండ్‌

హైదరాబాద్‌, అక్టోబర్‌ 26 (నమస్తే తెలంగాణ): చేనేత ఉత్పత్తులపై కేంద్రం విధించిన 5 శాతం జీఎస్టీని వెంటనే రద్దు చేయాలని రాష్ట్రంలోని పలు చేనేత సహకార సంఘాల అధ్యక్ష, కార్యవర్గసభ్యులు డిమాండ్‌ చేశారు. ఇప్పటివరకు ఏ ప్రభుత్వం చేనేత ఉత్పత్తులపై జీఎస్టీ విధించలేదని, ఆ ఖ్యాతి మోదీ సర్కారుకే దక్కిందని ఎద్దేవా చేశారు. కరీంనగర్‌, నారాయణపేట జిల్లాల చేనేత సహకార సంఘాల అధ్యక్షులు సత్యనారాయణ, ఆంజనేయులు, మునుగోడు చేనేత సహకార సంఘం డైరెక్టర్‌ భాస్కర్‌, కరీంనగర్‌ చేనేత సమాఖ్య అధ్యక్షుడు రామచంద్రం, గుండాల వీవర్స్‌ సొసైటీ అధ్యక్షులు ఉప్పలయ్య, బాలరాజు తదితరులు బుధవారం హైదరాబాద్‌లో విలేకరులతో మాట్లాడారు. చేనేత రంగాన్ని నిర్వీర్యం చేసేందుకు కేంద్రం ప్రయత్నాలు మొదలుపెట్టిందని, ఇందులో భాగంగా మొదలు 12శాతం జీఎస్టీ విధించి, 5 శాతానికి కుదించినట్టు చెప్పారు. గుజరాత్‌లో అధికంగా వినియోగంలో ఉన్న పవర్‌లూమ్‌పై పన్నును 18 శాతం నుంచి 12 శాతానికి కుదించడంలో ఆంతర్యం ఏమిటని ప్రశ్నించారు. దేశవ్యాప్తంగా చేనేత వస్త్ర వ్యాపారం రూ.60 వేల కోట్లు కాగా, ప్రభుత్వానికి సుమారు రూ.3 వేల కోట్ల ఆదాయం సమకూరుతున్నదన్నారు. కేంద్ర ప్రభుత్వ వైఖరి శుష్క వాగ్దానాలు-రిక్తహస్తాలు అన్నట్టు తయారయ్యిందని ధ్వజమెత్తారు. కేంద్రం నిర్లక్ష్యం వల్ల నూలు ధరలు ఆకాశాన్నంటుతున్నాయని, దీంతో వస్ర్తాల ధరలు విపరీతంగా పెరిగినట్టు చెప్పారు. మోదీ సర్కారు రద్దు చేసిన పథకాలు, ముఖ్యమంత్రి కేసీఆర్‌ చేపట్టిన పథకాల వివరాలను నేత సంఘాల సభ్యులు మీడియాకు వివరించారు.

టీఆర్‌ఎస్‌ లీగల్‌సెల్‌ ఆధ్వర్యంలో పోస్టుకార్డులు
కవాడిగూడ, అక్టోబర్‌ 26: చేనేత ఉత్పత్తులపై కేంద్రం విధించిన 5 శాతం జీఎస్టీని రద్దు చేయాలంటూ మంత్రి కేటీఆర్‌ పిలుపు మేరకు టీఆర్‌ఎస్‌ లీగల్‌ సెల్‌ విభాగం కేంద్రానికి పోస్టుకార్డులు రాసింది. చేనేత రంగానికి మరణశాసనం లాంటి జీఎస్టీని రద్దు చేయాలని తెలంగాణ అడ్వకేట్‌ జేఏసీ కన్వీనర్‌ పులిగారి గోవర్ధన్‌రెడ్డి, టీఆర్‌ఎస్‌ లీగల్‌ సెల్‌ నాయకులు కొంతం గోవర్ధన్‌రెడ్డి, శ్రీధర్‌రెడ్డి, ఉపేందర్‌, రవికుమార్‌, జగదీశ్‌, అశోక్‌, అరవిందరావు డిమాండ్‌ చేశారు.

కేంద్రం రద్దు చేసిన పథకాలు

• జూలై 2020లో ఆలిండియా హ్యాండ్లూమ్‌ బోర్డును రద్దు చేయడంతో చేనేత అభివృద్ధి, పరిరక్షణకు నిర్ణయాధికారం లేకుండా పోయింది.
• అదే ఏడాది ఆగస్టులో ఆలిండియా హ్యాండీక్రాఫ్ట్స్‌ బోర్డు, ఆలిండియా పవర్‌లూమ్‌ బోర్డును రద్దు చేశారు.
• చిలపనూలు తయారీకి నిర్దేశించిన హాంక్‌ యార్న్‌ ఆబ్లిగేషన్‌ ఆర్డర్‌ను నిర్వీర్యం చేసింది. దీన్ని 40 శాతం నుంచి 15 శాతానికి కుదించింది.
• చేనేత సహకార సంఘ సభ్యుల థ్రిఫ్ట్‌ పథకంలో కేంద్ర వాటా 4% రద్దు.
• చేనేత కార్మికుల లంబార్డ్‌ ఆరోగ్య బీమా పథకాన్ని రద్దు చేశారు.
• హౌస్‌ కం వర్క్‌ షెడ్‌, మహాత్మాగాంధీ బునకర్‌ బీమా యోజన పథకాన్ని 2014లో రద్దు.
• మార్కెటింగ్‌ ఇన్సెంటివ్‌ పథకం నిబంధనలను కఠినం చేసి కార్మికులకు అందకుండా చేశారు.

రాష్ట్ర ప్రభుత్వం అమలు చేస్తున్న పథకాలు

• చేనేత మిత్ర పథకం కింద ముడిసరుకు కొనుగోలుపై 40 శాతం సబ్సిడీ.
• నేతన్నకు చేయూత పథకం కింద పొదుపు చేసుకొనే 8శాతం వేతనానికి ప్రభుత్వం 16శాతం కలిపి వారి ఖాతాలో జమ చేస్తున్నది.
• రుణమాఫీ పథకం కింద ఏప్రిల్‌ 2010 నుంచి మార్చి 2017 వరకు తీసుకొన్న రూ.28.96 కోట్ల రుణాల మాఫీ. ఫలితంగా ఒక్కొక్కరికి రూ.లక్ష వరకు మాఫీ కాగా..10,148 మంది చేనేత కార్మికులకు లబ్ధి.
• నేతన్న పథకం ద్వారా మరణించిన కార్మికుల కుటుంబాలకు రూ.5 లక్షల ఆర్థికసాయం. ఇప్పటివరకు 11 కుటుంబాలకు ప్రయోజనం.
• నేత కార్మికుల నైపుణ్యతను గుర్తించి వారికి కొండా లక్ష్మణ్‌బాపూజీ పేరిట అవార్డుల అందజేత.
• పావలా వడ్డీ పథకం, మార్కెటింగ్‌ ప్రోత్సాహకాలు అందిస్తున్నది.
• చేనేత సంఘాలకు 49 కామన్‌ వర్క్‌షెడ్ల నిర్మాణం.
• ప్రతి సోమవారం ప్రభుత్వ ఉద్యోగులంతా చేనేత వస్ర్తాలు ధరించాలనే నియమంతో విక్రయాలు పెరిగాయి.
• బతుకమ్మ చీరల ఆర్డర్లు, పిల్లల యూనిఫామ్‌లు, ప్రభుత్వ కార్యాలయాల్లో ఉపయోగించే వస్ర్తాల ఆర్డర్లతో చేనేత కార్మికులకు చేతినిండా పని లభిస్తున్నది.