Runa Mafi | రుణమాఫీకి కొర్రీలెన్నో.. కొట్టివేతలన్నీ పోతే సగంమందికైనా ప్రయోజనం దక్కేనా?

రూ.2 లక్షల రుణమాఫీకి ప్రభు త్వం సోమవారం మార్గదర్శకాలు జారీ చేసింది. రాష్ట్రంలో భూమి కలిగిన ప్రతి రైతు కుటుంబానికి రూ.2 లక్షల రుణమాఫీ చేయనున్నట్టు మార్గదర్శకాల్లో పేర్కొన్నారు.

• రేషన్‌కార్డు ఆధారంగా ‘కుటుంబం’ గుర్తింపు..
• ఒక కుటుంబంలో రైతులెందరున్నా 2 లక్షలే మాఫీ
• పీఎం కిసాన్‌ నిబంధనలూ వర్తింపు..
• రూ.2 లక్షల కన్నా ఎక్కువ ఉన్న రుణాన్ని రైతులే చెల్లించాలట!
• తర్వాతే ఖాతాలో డబ్బులేస్తారట!
• అనర్హులకు రుణమాఫీ అయితే.. తిరిగి రికవరీ!
• బంగారం కుదువపెట్టిన పంట రుణాలకు వర్తించదు
• 29 అంశాలపై బ్యాంకుల నుంచి వివరాల సేకరణ
• మార్గదర్శకాలు విడుదల చేసిన రాష్ట్ర ప్రభుత్వం

Runa Mafi | హైదరాబాద్‌, జూలై 15(నమస్తే తెలంగాణ): రూ.2 లక్షల రుణమాఫీకి ప్రభు త్వం సోమవారం మార్గదర్శకాలు జారీ చేసింది. రాష్ట్రంలో భూమి కలిగిన ప్రతి రైతు కుటుంబానికి రూ.2 లక్షల రుణమాఫీ చేయనున్నట్టు మార్గదర్శకాల్లో పేర్కొన్నారు. తెల్లరేషన్‌ కార్డు ఆధారంగా కుటుంబాన్ని గుర్తించనున్నట్టు స్పష్టంచేసింది. కేంద్ర ప్రభుత్వం అమలుచేస్తున్న పీఎం కిసాన్‌ పథకం మినహాయింపులను కూడా వర్తింపజేయనున్న ట్టు పేర్కొన్నది. ఏ కుటుంబానికైనా రూ.2 లక్షలకు మించిన రుణం ఉంటే, ఎక్కువ ఉన్న ఆ మొత్తాన్ని ఆయా రైతులు బ్యాంకులకు చెల్లించాలని, ఆ తరువాతనే రుణమాఫీ నిధులు వారి ఖాతాలో జమ చేస్తామని వెల్లడించింది. 2018 డిసెంబర్‌ 12 నుంచి 2023 డిసెంబర్‌ 9 వరకు ఉన్న స్వల్పకాలిక పంట రుణాలను మాత్రమే మాఫీ చేయనున్నట్టు స్పష్టం చేసింది.

బ్యాంకుల నుంచి రైతుల, రుణాల వివరాలను ప్రత్యేక పోర్టల్‌ ద్వారా సేకరించనున్నారు. ఇందుకోసం వ్యవసాయ శాఖ ఆధ్వర్యంలో ప్రత్యేక పోర్టల్‌ను ప్రారంభించి దీని ద్వారా రుణమాఫీ చేస్తారు. ప్రతి బ్యాంకు నుంచి ఒక నోడల్‌ అధికారిని నియమిస్తారు. ఈ అధికారి ఇటు వ్యవసాయ శాఖ, అటు ఎన్‌ఐసీ(పోర్టల్‌)కి అవసరమైన సమాచారం అందిస్తారు. రుణమాఫీలో రైతులకు ఎదురయ్యే సమస్యలు, ఇబ్బందులు, సందేహాలను తీ ర్చేందుకు పోర్టల్‌ ద్వారా, మండల స్థాయిలో ప్రత్యేక కేంద్రాలను ఏర్పాటు చేయాలని ప్రభుత్వం నిర్ణయించింది. ప్రతి ఫిర్యాదును 30 రోజుల్లోపు పరిష్కరించాలని అధికారులను ఆదేశించింది.

మార్గదర్శకాల్లోని ముఖ్యాంశాలు

• భూమి కలిగిన ప్రతి రైతు కుటుంబానికి రూ.2 లక్షల వరకు గల స్వల్పకాలిక పంట రుణాలను మాఫీ వర్తిస్తుంది.
• 2018 డిసెంబర్‌ 12 నుంచి 2023 డిసెంబర్‌ 9 మధ్య రుణాలు తీసుకున్న, రెన్యువల్‌ చేసిన రైతులకు మాత్రమే రుణమాఫీ.
• కుటుంబాన్ని యూనిట్‌గా తీసుకొని రూ.2 లక్షలు (అసలు, వడ్డీ కలిపి) రుణమాఫీ.
• తెల్ల రేషన్‌కార్డు ఆధారంగా కుటుంబాన్ని నిర్ధారిస్తారు. అందరి ఆధార్‌ నంబర్లను లింకు చేసి కుటుంబాన్ని గుర్తిస్తారు.
• రుణమాఫీ డబ్బులు నేరుగా రైతు బ్యాంకు ఖాతాలో జమవుతాయి.
• అందరికీ ఒకేసారి రుణమాఫీ చేయరు. తక్కువ రుణం తీసుకున్న వారికి ముందు గా మాఫీ చేసి ఆ తర్వాత క్రమంగా ఎక్కువ మొత్తం తీసుకున్న వారికి మాఫీ చేస్తారు.
• ఒక కుటుంబానికి 2లక్షలకుపైగా రుణం ఉంటే..ఎక్కువ ఉన్న రుణాన్ని మొదట రైతులు బ్యాంకుకు చెల్లించాకే రుణమాఫీ వర్తిస్తుంది.
• ఒక కుటుంబంలో రూ.2 లక్షల కన్నా ఎక్కువ రుణం ఉంటే మొదటగా కుటుంబంలోని మహిళ పేరుపై ఉన్న రుణాన్ని మాఫీ చేస్తారు. ఆ తర్వాత అర్హత ఉంటే పురుషుల పేరుపై రుణాన్ని మాఫీ చేస్తారు.
• ఒకవేళ అనర్హులైన రైతులకు రుణమాఫీ జరిగితే ఆ మొత్తాన్ని రైతుల నుంచి తిరిగి రికవరీ చేయనున్నారు.
  వీరికి రుణమాఫీ వర్తించదు
• రుణమాఫీకి కేంద్ర ప్రభుత్వం అమలుచేస్తున్న పీఎం కిసాన్‌ నిబంధనలను వీలైనంత వరకు అమలు చేయనున్నారు. దీంతో ప్రస్తుతం పీఎం కిసాన్‌ అందుకోలేనివారికి రుణమాఫీ వర్తించే అవకాశం లేదు.
• ఎస్‌హెచ్‌జీలు, జెల్‌జీలు, ఆర్‌ఎంజీలు, ఎల్‌ఈసీఎస్‌లకు తీసుకున్న రుణాలకు రుణమాఫీ వర్తించదు.
• రీషెడ్యూల్‌ చేసిన రుణాలకు కూడా రుణమాఫీ వర్తించదు.
• కంపెనీలకు, ఫర్మ్స్‌ వంటి సంస్థలకు ఇచ్చిన పంట రుణాలకు వర్తించదు. అయితే ప్రాథమిక సహకార సంఘాల ద్వారా తీసుకున్న రుణాలకు మాత్రం వర్తిస్తుంది.