సిలబస్‌ ఒకటే పోస్టులు బోలెడు.. ఒకదానికి చదివితే అన్ని పరీక్షలు రాయొచ్చు

రాష్ట్రంలో ప్రభుత్వ ఉద్యోగాల జాతర సాగుతున్నది. నాలుగైదు నెలల్లోనే టీఎస్‌పీఎస్సీ నుంచే 26 రకాల నోటిఫికేషన్లు రాగా, 17 వేలకు పైగా ఉద్యోగాలకు భర్తీ ప్రక్రియ ప్రారంభమైంది.

• గ్రూప్స్‌, ఇతర ఉద్యోగాల పరీక్షలకు కామన్‌ సిలబస్‌
• రాష్ట్రంలో ఉద్యోగాల జాతర

హైదరాబాద్‌, జనవరి 1 (నమస్తే తెలంగాణ): రాష్ట్రంలో ప్రభుత్వ ఉద్యోగాల జాతర సాగుతున్నది. నాలుగైదు నెలల్లోనే టీఎస్‌పీఎస్సీ నుంచే 26 రకాల నోటిఫికేషన్లు రాగా, 17 వేలకు పైగా ఉద్యోగాలకు భర్తీ ప్రక్రియ ప్రారంభమైంది. ఇవి కాకుండా పోలీసు రిక్రూట్‌మెంట్‌ బోర్డు ద్వారా 17వేల పైచిలుకు పోస్టుల భర్తీ చురుగ్గా సాగుతున్నది. త్వరలో మరిన్ని ఉద్యోగాలను నింపేందుకు ఆయా నియామక సంస్థలు సన్నాహాలు చేస్తున్నాయి. అయితే ఇన్ని పోస్టులు ఉన్నాయి.. దేనికి చదవాలి ? ఎలా చదవాలి ? అని అభ్యర్థులు ఆందోళన చెందుతున్నారు. అయితే సిలబస్‌, పరీక్ష విధానంపై సరైన అవగాహన లేనివారే కంగారు పడుతున్నారని నిపుణులు చెప్తున్నారు.

సిలబస్‌ను నిశితంగా పరిశీలిస్తే అన్ని ఉద్యోగ నోటిఫికేషన్లకు 40-60 శాతం కామన్‌ సిలబస్సేనని అంటున్నారు. ఇప్పటివరకు విడుదలైన నోటిఫికేషన్లన్నింటిని పరిశీలిస్తే పలు సబ్జెక్టుల సిలబస్‌ అన్నింటికి ఒకేలా ఉన్నది. పాలిటీ, హిస్టరీ, జాగ్రఫీ, కరెంట్‌ అఫైర్స్‌, ఎకానమీ, అర్థమెటిక్‌ రీజనింగ్‌, ఎన్విరాన్‌మెంటల్‌ సైన్స్‌, ఎకాలజీ, తెలంగాణ ఉద్యమ చరిత్ర అన్నింట్లో కామన్‌గా ఉంచారు. గ్రూప్‌-1 ప్రిలిమ్స్‌ పూర్తికాగా, త్వరలో ఫలితాలు విడుదలయ్యే అవకాశం ఉన్నది.

ఇటీవల గ్రూప్‌-2, 3, 4 నోటిఫికేషన్లు విడుదలయ్యాయి. ఈ నాలుగు నోటిఫికేషన్లకు సిలబస్‌ దాదాపు ఒకేలా ఉండగా, మార్కులు మాత్రం వేర్వేరుగా ఉన్నాయి. ప్రధానంగా గ్రూప్‌-1, 2 సిలబస్‌ దాదాపుగా ఒకేలా ఉన్నది. వీటిలో ఏదో ఒకదానికి సన్నద్ధమైతే సమాంతరంగా గ్రూప్‌-3,4లకు ప్రిపేర్‌ అయినట్టే. దీంతోపాటు హాస్టల్‌ వెల్ఫేర్‌ ఆఫీసర్‌, జూనియర్‌ లెక్చరర్‌, అసిస్టెంట్‌ ప్రొఫెసర్‌ ఉద్యోగాలకు జనరల్‌ స్టడీస్‌ పేపర్‌ కామన్‌గా ఉంటుంది.

కామన్‌ సిలబస్‌ ఇదే

• జూనియర్‌, పాలిటెక్నిక్‌ లెక్చరర్‌, డిగ్రీ కాలేజీల్లో అసిస్టెంట్‌ ప్రొఫెసర్‌ పోస్టులకు పోటీపడే వారికి జనరల్‌ స్టడీస్‌ అండ్‌ జనరల్‌ ఎబిలిటీస్‌ పేపర్‌-1 పరీక్ష నిర్వహిస్తారు. గ్రూప్‌-2, గ్రూప్‌-4 వారికి ఇదే పేపర్‌ ఉంటుంది. ఆశావహులు ఒక పేపర్‌కు ప్రిపేరైతే అన్నింటికీ అనుకూలంగా ఉంటుంది.
• లెక్చరర్‌ పోస్టులకు రెండో పేపర్‌ సంబంధిత సబ్జెక్టు చదవాల్సి ఉంటుంది. ఇలా సివిక్స్‌, ఎకనమిక్స్‌, హిస్టరీ లెక్చరర్‌ అభ్యర్థులు ప్రత్యేకంగా సన్నద్ధం కావొచ్చు.
• భూగర్భ జలశాఖలో గెజిటెడ్‌, నాన్‌గెజిటెడ్‌ పోస్టులకు జనరల్‌ స్టడీస్‌, జనరల్‌ ఎబిలిటీస్‌ పేపర్‌ ఉన్నది. వీరు గ్రూప్స్‌తోపాటు ఈ పోస్టులకు సమాంతరంగా ప్రిపేర్‌ కావొచ్చు.
• హాస్టల్‌ వెల్ఫేర్‌ ఆఫీసర్‌ పోస్టులకు కూడా జనరల్‌ స్టడీస్‌ పేపర్‌-1 పరీక్ష నిర్వహిస్తారు. వీరికి రెండోపేపర్‌గా మరో ఎడ్యుకేషన్‌పై పరీక్ష ఉంటుంది. వీరు గ్రూప్స్‌తోపాటు, ఉపాధ్యాయ ఉద్యోగాలకు, రెండింటికి సమాంతరంగా పోటీపడొచ్చు.

గ్రూప్‌ -4 సిలబస్‌

• పేపర్‌ -1 జనరల్‌ స్టడీస్‌ (కరెంట్‌ అఫైర్స్‌, ఇంటర్నేషనల్‌ రిలేషన్స్‌, జనరల్‌ సైన్స్‌, పర్యావరణ అంశాలు, విపత్తు నిర్వహణ, జాగ్రఫీ, ఎకానమీ, భారత రాజ్యాంగం, ఆధునిక భారత చరిత్ర -జాతీయోద్యమం, తెలంగాణ చరిత్ర, ఉద్యమం, తెలంగాణ సమాజం, సంస్కృతి, వారసత్వం, కళలు, సాహిత్యం, తెలంగాణ ప్రభుత్వ విధానాలు)

గ్రూప్‌ -1 మెయిన్స్‌ సిలబస్‌

• పేపర్‌ -2 హిస్టరీ, కల్చర్‌ అండ్‌ జాగ్రఫీ (ఇండియన్‌, తెలంగాణ హిస్టరీ, జాగ్రఫీ రెండింటికి సంబంధించి ప్రశ్నలిస్తారు.
• పేపర్‌ – 3 ఇండియన్‌ సొసైటీ, రాజ్యాంగం, గవర్నెన్స్‌
• పేపర్‌ -4 ఎకానమీ అండ్‌ డెవలప్‌మెంట్‌ (ఇండియన్‌, తెలంగాణ ఎకానమీ, అభివృద్ధి, పర్యావరణ సమస్యలు)
• పేపర్‌ -6 తెలంగాణ ఉద్యమం, రాష్ట్ర ఆవిర్భావం (1948 నుంచి 2014 వరకు ఉద్యమ ప్రస్థానం)

గ్రూప్‌ -2 సిలబస్‌

• పేపర్‌ -1 జనరల్‌ స్టడీస్‌ అండ్‌ జనరల్‌ ఎబిలిటీస్‌
• పేపర్‌ -2 హిస్టరీ, పాలిటీ అండ్‌ సొసైటీ (భారతదేశ, తెలంగాణ సామాజిక, సాంస్కృతిక చరిత్ర, భారత రాజ్యాంగం, రాజకీయాలు, సామాజిక వ్యవస్థలు, సమస్యలు, పబ్లిక్‌ పాలసీలు
• పేపర్‌ -3 ఎకానమీ అండ్‌ డెవలప్‌మెంట్‌ (ఇండియన్‌ ఎకానమీ సమస్యలు, సవాళ్లు, తెలంగాణ ఎకానమీ అండ్‌ డెవలప్‌మెంట్‌, అభివృద్ధిలో మార్పులు, సమస్యలు
• పేపర్‌ -4 తెలంగాణ ఉద్యమం, రాష్ట్ర ఆవిర్భావం (1948 నుంచి 2014 వరకు మూడు దశలు)

గ్రూప్‌-2 చదివితే గ్రూప్‌-3,4 చదవాల్సిన పనిలేదు

నోటిఫికేషన్ల వెల్లువలో చాలామంది గందరగోళానికి గురవుతున్నారు. ఇదే సరైన సమయం. ఇప్పుడు అవకాశాన్ని చేజార్చుకుంటే మళ్లీ రాదు. అలా అని కంగారుపడొద్దు. దాదాపు అన్నిపోటీ పరీక్షలకు కామన్‌ సిలబస్సే ఉన్నది. గ్రూప్‌-2కు చదువుకొంటే.. గ్రూప్‌ 3,4లకు ప్రత్యేకంగా ప్రిపేర్‌ కావాల్సిన అవసరం లేదు. అన్ని ఉద్యోగాలకు జనరల్‌ స్టడీస్‌ కామన్‌ పేపర్‌. వచ్చిన నోటిఫికేషన్లను జాగ్రత్తగా పరిశీలించాలి. పద్ధతి ప్రకారం సబ్జెక్టులు చదవాలి.

-ప్రసన్న హరికృష్ణ, పోటీపరీక్షల విశ్లేషకుడు