పానం పైలం.. పైసలు భద్రం

రాజధానిలోని పేదలందరికీ ఉచితంగా అన్ని రకాల రోగ నిర్ధారణ పరీక్షలు అందుబాటులోకి రానున్నాయి. జీహెచ్‌ఎంసీలో మరో 10 మినీ హబ్స్‌ (రేడియాలజీ)ను బుధవారం ఆర్థిక, వైద్యారోగ్యశాఖ మంత్రి హరీశ్‌రావు ప్రారంభించనున్నారు. సీఎం కేసీఆర్‌ ఆలోచనల మేరకు హైదరాబాద్‌

జీహెచ్‌ఎంసీలోని పేదలకు ఉచిత వైద్య పరీక్షలు
నేడు మరో 10 రేడియాలజీ హబ్స్‌ ప్రారంభం
ఇప్పటికే సేవలందిస్తున్న 8 మినీ హబ్‌లు
15 నెలల్లోనే పేదలకు రూ.4.2 కోట్లు ఆదా

హైదరాబాద్‌, మే 10 (నమస్తే తెలంగాణ): రాజధానిలోని పేదలందరికీ ఉచితంగా అన్ని రకాల రోగ నిర్ధారణ పరీక్షలు అందుబాటులోకి రానున్నాయి. జీహెచ్‌ఎంసీలో మరో 10 మినీ హబ్స్‌ (రేడియాలజీ)ను బుధవారం ఆర్థిక, వైద్యారోగ్యశాఖ మంత్రి హరీశ్‌రావు ప్రారంభించనున్నారు. సీఎం కేసీఆర్‌ ఆలోచనల మేరకు హైదరాబాద్‌ వాసుల కోసం టీ-డయాగ్నోస్టిక్స్‌ కింద మొత్తం 20 మినీ హబ్‌లు ప్రారంభించాలని ప్రభుత్వం నిర్ణయించింది. నిరుడు జనవరిలో 8 హబ్స్‌ను ప్రారంభించిన సర్కారు.. బుధవారం మరో పదింటిని ప్రారంభిస్తున్నది. ఒకట్రెండు వారాల్లో మరో రెండు సిద్ధమవుతాయి. దీంతో జీహెచ్‌ఎంసీ పరిధిలోని పేదలకు బస్తీ దవాఖానలు, యూపీహెచ్‌సీలు, రోగ నిర్ధారణ పరీక్షల కోసం పాథాలజీ, రేడియాలజీ ల్యాబ్స్‌ అందుబాటులోకి వస్తాయి. ఇప్పటికే టీ-డయాగ్నోస్టిక్స్‌ ద్వారా 57 రకాల రక్త పరీక్షలు ఉచితంగా చేస్తున్నారు. 12 మినీ హబ్స్‌తో ప్రజల ఆరోగ్యం, పైసలను కాపాడవచ్చు.

రూ.4 కోట్లకు పైగా ఆదా..
వైద్యారోగ్య శాఖ గత జనవరిలో 8 మినీ హబ్స్‌ ప్రారంభించింది. బారస్‌, జంగంపేట, అంబర్‌పేట, పురానాపూల్‌, పనిపురా, శ్రీరాంనగర్‌, సీతాఫల్‌మండి, లాలాపేటలో ఇవి సేవలు అందిస్తున్నాయి. వీటిలో ఎక్స్‌రే, ఈసీజీ, ఆల్ట్రాసౌండ్‌ పరీక్షలు చేస్తున్నారు. 129 బస్తీ దవాఖాన / పీహెచ్‌సీ / సీహెచ్‌సీల నుంచి పరీక్షల కోసం రోగులు ఈ హబ్స్‌కు వస్తారు. ఈ ఏడాది ఏప్రిల్‌ చివరినాటికి 15 నెలల్లో ఈ 8 మినీ హబ్స్‌లో 54,100 రోగులు రిజిస్టర్‌ కాగా, 60,281 పరీక్షలు చేశారు. వీటి ద్వారా పట్టణ పేదలకు రూ.4.26 కోట్లు ఆదా అయ్యాయి.

• ఈసీజీకి ప్రైవేట్‌ ల్యాబుల్లో రూ.300 వసూలు చేస్తున్నారు. మినీ హబ్స్‌లో 9,536 ఈసీజీల ద్వారా రూ.28.60 లక్షలు ఆదా అయ్యాయి.
• ఎక్స్‌రేకు అవయవాన్ని బట్టి రూ.170-450 మధ్య వసూలు చేస్తున్నారు. సగటున రూ.350 లెక్కించినా.. మినీ హబ్స్‌ ద్వారా 16,654 ఎక్స్‌రేలకు రూ.58.20 లక్షలు ఆదా అయ్యింది.
• ఆల్ట్రాసౌండ్‌ స్కానింగ్‌ (యూఎస్‌జీ)కు అవయవాన్ని బట్టి రూ.200 నుంచి రూ.2000 వరకు వసూలు చేస్తున్నారు. సగటున రూ.వెయ్యి లెక్కించినా.. మినీ హబ్స్‌లో 34,091 స్కానింగ్‌లు నిర్వహించడం ద్వారా పేదలకు రూ.3.40 కోట్లు మిగిలాయి.
  నూతనంగా ఏర్పాటు చేయనున్న 10 మినీ హబ్స్‌ 151 దవాఖానలకు సేవలు అందించనున్నాయి. బుధవారం అమీర్‌పేట మినహా 9 హబ్స్‌ను ప్రారంభిస్తారు. ఒక్కో హబ్‌ను మంత్రి లేదా ఎమ్మెల్యే ప్రారంభిస్తారు. నార్సింగిలోని రూరల్‌ హెల్త్‌ సెంటర్‌ను ఆర్థిక, వైద్యారోగ్య శాఖ మంత్రి హరీశ్‌రావు ప్రారంభిస్తారు. వీటితోపాటు కూకట్‌పల్లి, ఉప్పల్‌లో మరో రెండు వారాల్లో మినీ హబ్‌లు అందుబాటులోకి వస్తాయి. ఒకో మినీ హబ్‌ కింద కొన్ని బస్తీ దవాఖాన, యూపీహెచ్‌సి, యుసిహెచ్‌సి ఉంటాయి. ఇక్కడికి వచ్చిన రోగుల్లో రేడియాలజీ టెస్టులు అవసరమైనవారిని మినీ హబ్స్‌కు రెఫర్‌ చేస్తారు. అక్కడే రిజిస్టర్‌ చేసి, బార్‌ కోడ్‌ కేటాయించి దగ్గరలో ఉన్న మినీ హబ్‌కు పంపుతారు. హబ్‌లో బార్‌కోడ్‌ స్కాన్‌ చేసిన తర్వాత టెస్ట్‌ను చేసి, రిపోర్ట్‌ను అందిస్తారు. ఫలితం ఆధారంగా చికిత్స అందిస్తారు.