Science fairs | సైన్స్‌ ఫెయిర్‌తో వసూళ్ల దందా.. టార్గెట్లు పెట్టి మరీ ప్రైవేట్‌ స్కూళ్ల నుంచి వసూళ్లు

విద్యార్థుల్లో సృజనాత్మకత, ప్రతిభను వెలికితీసేందుకు నిర్వహించే సైన్స్‌ ఫెయిర్లు, ఎగ్జిబిషన్లు అవినీతికి అడ్డాగా మారాయని, అక్రమార్కుల పంట పండిస్తున్నాయన్న ఆరోపణలు వినిపిస్తున్నాయి. సైన్స్‌ ఫెయిర్‌ నిర్వహించేందుకు ప్రభుత్వం నిధులు విడుదల చేసినప్పటికీ జిల్లాల్లోని ప్రైవేట్‌ స్కూళ్ల నుంచి విద్యాశాఖ అధికారులు లక్షల్లో వసూలు చేసినట్టు విమర్శలొస్తున్నాయి.

• పైనుంచి కింది స్థాయి వరకు అధికారులకు వాటాలు

హైదరాబాద్‌, జనవరి 7(నమస్తే తెలంగాణ) : విద్యార్థుల్లో సృజనాత్మకత, ప్రతిభను వెలికితీసేందుకు నిర్వహించే సైన్స్‌ ఫెయిర్లు, ఎగ్జిబిషన్లు అవినీతికి అడ్డాగా మారాయని, అక్రమార్కుల పంట పండిస్తున్నాయన్న ఆరోపణలు వినిపిస్తున్నాయి. సైన్స్‌ ఫెయిర్‌ నిర్వహించేందుకు ప్రభుత్వం నిధులు విడుదల చేసినప్పటికీ జిల్లాల్లోని ప్రైవేట్‌ స్కూళ్ల నుంచి విద్యాశాఖ అధికారులు లక్షల్లో వసూలు చేసినట్టు విమర్శలొస్తున్నాయి. పైస్థాయి నుంచి కింది స్థాయి వరకు వాటాలేసుకుంటున్నారన్న గుసగుసలు జోరుగా వినిపిస్తున్నాయి. ఎస్సీఈఆర్టీ, డీఈవోలు, సైన్స్‌ అధికారుల వరకు తలాపాపం తిలా పిడికెడు అన్న చందంగా తయారైందన్న ప్రచారం జరుగుతున్నది. గతంలో పంపకాల్లో తేడాలొచ్చి గొడవలు, రచ్చకు దారితీసిన ఉదంతాలున్నాయని సాక్షాత్తు టీచర్లే అంటున్నారు. మొత్తంగా సైన్స్‌ ఎగ్జిబిషన్ల పేరిట కొందరు జేబులు నింపుకుంటున్నారని బహిరంగంగానే చెబుతున్నారు.

టార్గెట్లు పెట్టి..

జిల్లా స్థాయి సైన్స్‌ ఎగ్జిబిషన్లు ముగిశాయి. రాష్ట్రస్థాయి ఎగ్జిబిషన్‌ బుధవారం కామారెడ్డిలో ప్రారంభమైంది. వాస్తవానికి ఒక జిల్లా సైన్స్‌ ఫెయిర్‌ను ఎంత ఘనంగా నిర్వహించి నా గరిష్ఠంగా రూ.3.5లక్షలు సరిపోతాయని కానీ చాలాచోట్ల టార్గెట్లు పెట్టి అంతకుమించి వసూలు చేస్తున్నట్లు తెలుస్తున్నది. ఉమ్మడి వరంగల్‌ జిల్లాల్లో స్పాన్సర్‌షిప్‌ పేరిట వసూళ్లు చేశారట. కొన్ని జిల్లాల్లో ఎగ్జిబిషన్‌కు హాజరైన వారి టిఫిన్‌, భోజనాల ఖర్చులు ప్రైవేట్‌ స్కూ ళ్ల ఖాతాలో వేశారట. ఇంకా కొన్ని జిల్లాల్లో అ యితే డీసీఈబీ నిధులు వినియోగించారట. గతంలో సైన్స్‌ ఫెయిర్లకు కొందరు ఎమ్మెల్యేలే సొంతంగా నిధులు సమకూర్చేవారు. కొందరైతే ప్రైవేట్‌ స్కూళ్ల నుంచి వసూళ్లు చేస్తే ఊరుకోబోమని హెచ్చరించిన దాఖలాలున్నాయి. తన నియోజకవర్గంలో వసూళ్లుచేస్తే ఊరుకోబోమని నాగర్‌కర్నూల్‌ మాజీ ఎమ్మెల్యే మర్రి జనార్దన్‌రెడ్డి(ఆయన ఎమ్మెల్యేగా ఉన్నంతకా లం) అధికారులను హెచ్చరించారు. ఆయనే సొంతంగా నిధులు సమకూర్చారు కూడా. కానీ ఇప్పుడు ఇదే అదునుగా కొందరు వసూళ్లు చేసి. జేబులు నింపుకొన్నట్టు ఆరోపణలు గుప్పుమంటున్నాయి.

మచ్చుకు కొన్ని..

• వనపర్తి జిల్లాలో ఓ ప్రజాప్రతినిధి రూ. 8 లక్షలు ఇచ్చారు. విద్యాశాఖ నుంచి రూ.లక్ష వచ్చాయి. మళ్లీ ఈ జిల్లాలో విద్యార్థులకు భోజనాలు సమకూర్చే బాధ్యత ప్రైవేట్‌ స్కూళ్ల నెత్తిన పెట్టినట్టు సమాచారం.
• సైన్స్‌ఫెయిర్‌కు ముందు ఎగ్జిబిట్‌కు వెయ్యి చొప్పున ఇస్తారు. తర్వాత బిల్లు పెడితే మళ్లీ వెయ్యి ఇవ్వాల్సి ఉం డగా, రెండో విడతలో ఇవ్వాల్సిన వెయ్యి ఇవ్వడం లేదని గగ్గోలు పెడుతున్నారు. వీటిని కొందరు అధికారులు స్వాహా చేస్తున్నట్టు ఆరోపిస్తున్నారు.
• వికారాబాద్‌ జిల్లాలోని ఒక్కో నియోజకవర్గానికి ఇంత అని టార్గెట్‌ ఫిక్స్‌ చేసి మరీ వసూలు చేసినట్టు సమాచారం. జిల్లా సైన్స్‌ ఫెయిర్‌ నిర్వహించిన పరిగి నియోజకవర్గంలోని ప్రైవేట్‌ స్కూళ్ల నుంచి రూ.1.50 లక్ష లు, వికారాబాద్‌, తాండూర్‌లోని ప్రైవేట్‌ స్కూళ్ల నుంచి లక్ష చొప్పున, కొడంగల్‌లోని ప్రైవేట్‌ స్కూళ్ల నుంచి రూ.70 వేల చొప్పున వసూలు చేసినట్టు తెలిసింది. మరోవైపు సైన్స్‌ఫెయిర్‌కు ప్రభుత్వమే రూ.1.06 లక్ష లు విడుదల చేసినా ప్రైవేట్‌ స్కూళ్ల నుంచి వసూళ్లకు పాల్పడటంపై విమర్శలు వెల్లువెత్తుతున్నాయి. ఈ వ్యవహారమంతా డిప్యుటేషన్‌పై వచ్చి జిల్లా విద్యాశాఖ కార్యాలయంలో విధులు నిర్వహిస్తున్న ఓ అధికారి చూసుకున్నట్టు తెలిసింది.
• కామారెడ్డిలో రాష్ట్రస్థాయి ఎగ్జిబిషన్‌కు రూ. 20లక్షలు ఖర్చుచేయగా, ఎక్కువ మొత్తం వసూళ్లేనన్న గుసగుసలు వినిపిస్తున్నాయి.
• మహబూబాబాద్‌, కొత్తగూడెం, సూర్యాపేట జిల్లాల్లో ఒక్కో ప్రైవేట్‌ స్కూల్‌ నుంచి విద్యార్థుల సంఖ్యను బట్టి వసూలు చేసినట్టు సమాచారం. 300-600 మంది ఉంటే రూ. 5వేలు, అంతకు మించి విద్యార్థుల సంఖ్య ఉంటే ఒక్కో స్కూల్‌ నుంచి రూ.10వేల చొప్పున వసూళ్లు చేసినట్టు విశ్వసనీయవర్గాల ద్వారా తెలిసింది.
• ఖమ్మంలో జిల్లా యంత్రాంగం రూ.5 లక్షలు ఇవ్వగా, భోజనాలు, టిఫిన్ల ఖర్చులను ప్రైవేట్‌ స్కూళ్ల యాజమాన్యాలకు అప్పగించి చేతులు దులుపుకొన్నారట.
• మహబూబ్‌నగర్‌లో నిరుడు జరిగిన స్టేట్‌ ఎగ్జిబిషన్‌లో పెద్ద ఎత్తున అవినీతి జరిగినట్టు విద్యాశాఖలో ప్రచారం జరుగుతున్నది. మరో సైన్స్‌ ఫెయిర్‌ పేరిట ఇదే జిల్లాల్లో పెద్ద ఎత్తున వసూళ్లు చేసినట్టు విద్యాశాఖ అధికారులు చెవులు కొరుక్కుంటున్నారు.